საქართველოს ერთ-ერთი მთიანი რეგიონიდან  წამოსული მთელი გზა ვფიქრობდი, ეს ამბავი უნდა დამეწერა თუ არა? საქმე იმაშია, რომ ჩვენი ჯგუფი იქ არსებული  სასტუმროს ადმინისტრაციას შეპირდა, არ გიჩივლებთო.  დაპირება შევასრულეთ და არ გვიჩივლია, მაგრამ მხოლოდ ჩივილი, სასამართალოს მიერ დასჯის შიში, შემოწმებების ,,თავზე დატყდომა,, და ა.შ. ხომ არ არის მთავარი?! უფრო მნიშვნელოვანია ის, რომ ერთ-ერთი ორგანიზაციიდან ( რადგან ოფიციალურად არ იჩივლეს, ორგანიზაციასაც აღარ ვასახელებ _ ნ.ვ.) ჩასული ადამიანების ჯგუფს, რომლებიც ამ რეგიონში, ყველაზე პრესტიჟულ, 5 ვარსკვლავიან სასტუმროში დაბინავდნენ და მათი შეხვედრები ერთ-ერთმა დონორმა ორგანიზაციამ საკმაოდ სოლიდური თანხით დააფინანსა (დღე-ღამეში ამ სასტუმროში, თითოეული ადამიანის გაჩერება 180 ევროზე მეტი ღირს), 15  ოქტომბერს, ჯანმრთელობის პრობლემები შეექმნათ. ისინი საკვებით მოიწამლნენ. მოწამლულებიდან თითქმის ყველა ამბობდა, რომ  სასტუმროს მიერ  შეთავაზებული, ერთ-ერთი სახეობის თევზი მიირთვეს. ზოგს სახეც კი შეუშუპდა და `დექსამეტაზონის` მიღება დასჭირდა, ზოგს კიდევ კუჭ-ნაწლავის ,,გამრეცხი` საშუალებების... ღვთის წყალობით გადავრჩით და თბილისში დავბრუნდით _ არც ისე ჯანმრთელები. ამ წერილს ასე თამამად იმიტომ ვწერ, რომ მეც მათთან ერთად ვიყავი და ზოგიერთი ავადმყოფის მოვლა თავად მომიხდა. 

პროფესიით ექიმი არ გახლავართ, ჟურნალისტი ვარ, თუმცა ქართული მრავალვარსკვლავიანი სასტუმროებიდან მწარე გამოცდილება გამაჩნია და როცა სადმე წასვლა მიწევს, ყოველთვის მიმაქვს წნევის აპარატი, სიცხის საზომი და პირველადი დახმარების მედიკამენტები, რომელიც ამჯერად, ,,ჩემს პაციენტებს,,ძალიან გამოადგათ. ერთ-ერთის მდგომარობა კი იმდენად რთული აღმოჩნდა, რომ ექიმთან წაყვანა გახდა საჭირო. როგორც გაირკვა, 5 ვარსკვლავის მქონე, ,,ბრენდ,, სასტუმროში, რომელსაც ხელისუფლების წარმომადგებლებიც ხშირად სტუმრობენ, 6 საათის შემდეგ ექიმი არ ჰყავთ და აქედან გამომდინარე, ვერც სამედიცინო დანიშნულების ელემენტარული აპარატებით(ვგულისხმობ წნევის აპარატს,სიცხის საზომს...)ემსახურებიან სტუმრებს... სწორედ იმ სტუმრებს, რომლებიც მის მფლობელს დიდ შემოსავალს უტოვებენ. განა რა უნდა დაუჯდეს ამხელა ფინანსების მქონე სასტუმროს ერთი ექიმის კაბინეტის მოწყობა და იქ, სადღეღამისოდ, სამედიცინო წარმომადგენლის მომსახურეობა?! ასეთ დროს ხომ მისი კლიენტები უფრო დაცულები იქნებიან?!სამწუხაროდ, იგივე უნდა ვთქვა სხვა სასტუმროებზე, რომლებიც სოციალურ ქსელებსა თუ სხვა სარეკლამო ბლოკებში საზოგადოებას ისე უხატავენ საკუთარ მომსახურეობას, აუცილებლად იფიქრებ, იქ თუ წავედი, საქართველოში კი არა, მე-9 ცაზე აღმოვჩნდებიო. არადა, სინამდვილეში, წნევის აპარატი რომ მოსთხოვო მომსახურე პერსონალს, მხრებს აიჩეჩავენ და გაუგებარი ჟესტებით შეგატყობინებენ, რომ არ აქვთ.

 ასეთი ფაქტი მოხდა ზაფხულში, ყვარლის ერთ-ერთ სასტუმროშიც. იქ ღამით გახდა საჭირო წნევის აპარატი და რადგან არ ჰქონდათ,არც ექიმი ჰყავდათ, სასწრაფო ორჯერ გამოვიძახეთ, რაც იმასაც ნიშნავს, რომ სახელმწიფო რესურს კერძო სტრუქტურა უდიერად იყენებს. ხომ შეიძლებოდა, ზუსტად იმ დროს, როცა სასწრაფოს ბრიგადა ჩვენთან წამოვიდა, ვიღაცას უფრო მეტად დასჭირდა ის და უთხრეს, ბრიგადა დაკავებულია და ლოდინი მოგიწევთო? ადამიანის ყოფნა-არყოფნას კი ზოგჯერ წამები წყვეტს... ისე, რატომ არ უნდა ჰყავდეს ვარსკვლავიან თუ უვარსკვლავო სასტუმროს მედიცინის მუშაკი 24 საათიანი განრიგით, რომელიც პირველად დახმარებას ადგილზე აღმოუჩენს საკუთარ კლიენტს, ან ბოლოს და ბოლოს, ერთი წნევის აპარატის, სიცხის საზომის ყიდვას რა ისეთ ფინანსები სჭირდება, რომ უდიდესი შემოსავლების სასტუმროებს არ ემეტებათ? რატომ არავინ აკონტროლებს, რამდენად არიან დაცულნი ასეთ დაწესებლებებში მყოფი ქართველი თუ უცხოელი დამსვენებლები? ჩვენ ხომ ვამბობთ, რომ ,,ევროპელები,, ვართ და ქვეყანაში ტურიზმის აყვავებას ვუწყობთ ხელს? 

  ამ შემთხვევაში, ერთ-ერთი მთიანი რეგიონის პრესტიჟული სასტუმროს ნომრებში არ იყო ყველა ადამიანისთვის აუცილებელი ატრიბუტი _ კბილის ჯაგრისი და კბილის პასტა. იმის გამო, რომ ის შემეძინა ჩემთვის და კიდევ რამდენიმე ადამიანისთვის (ცალ-ცალკე ნომრებში ვიყავით და მათაც შემომჩივლეს, არ წამოვიღეთ, გვეგონა 5 ვარსკვლავიან სასტუმროში აუცილებლად იქნებოდაო _ ნ.ვ.) წვიმაში, საკმაოდ გრძელი გზის გავლა მიმიხდა. სასტუმროში დაბრუნებულმა მაინც ვიკითხე, ნომერში კბილის ჯაგრისი და კბილის პასტა არ გაქვთ მეთქი? უნდა მოითხოვოთო, _ მივიღე პასუხად, რაც სასაცილო კი არის, მაგრამ ვერ გავიცინებ.

    ერთი წლის წინ, ამ სასტუმროში ვიყავი ზამთარშიც. საღამოს ვისეირნეთ და სიცივით გათოშილმა გადავწყვიტე, ცხელი წყლის შხაპი მიმეღო და ისე დამეძინა, მაგრამ თქვენც არ მომიკვდეთ, ეს ვერაფრით მოვახერხე. როცა დახმარება სასტუმროს თანამშრომლებს ვთხოვე, მითხრეს, რომ მილები შეცდომით ყოფილა შეერთებული და თბილი წყალი არ წამოვიდოდა ჩემს აბაზანაში. ახლაც, დილით, ცხელი წყლის გადავლება უნდოდა საუნიდან გამოსულ ჩვენი ჯგუფის ერთ-ერთ-წევრს, ეს ვერ მოახერხა და კინაღამ გაიყინა. უთხრეს, რომ თბილ წყალს უნდა დალოდებოდა. როდემდე, ეს არავის აღუნიშნავს.

   აი,ასეთი მომსახურებაა სინამდვილეში სასტუმროებში, რომელთაც იმდენი ვარსკვლავი აყრიათ, ზოგჯერ ცაზე რომ არ მოიპოვება და ისეთი პიარი უკეთდებათ ტელეარხებზე, შოუებით, მართლაც მდიდარი შეიხის სასახლეები გეგონებათ.

   ამ წერილს საჩივრის სახე ნამდვილად არ აქვს _ ეს ალბათ წინდაწინვე უნდა აღმენიშნა და ამიტომაც არ ვასახელებ სასტუმროების სახელწოდებებს ( თუ კიდევ მოვხვდი და იგივე პრობლემები ვნახე, აუცილებლად დავასახელებ და ფაქტის დამამტკიცებელ ფოტომასალასაც გამოვიყენებ! _ ნ.ვ.).ამჯერად, ამ ინფორმაციის გამოქვეყნების არსი ერთადერთია _ გამოსწორდით... ნუ კი იბრალებთ, მართლა გაევროპელდით; მომხმარებელს ნუ ატყუებთ და მაღალფარდოვნად აღწერილ მომსახურეობაში ის მინუსებიც მიუთითეთ,რაც რეალურად გაქვთ (მაინც ხომ არ იმალება და რა აზრი აქვს?! _ ნ.ვ.), რათა თქვენთან სტუმრობამდე გავითვალისწინოთ; მხოლოდ ჩივილისა და სასამართლოებში სირბილის კი ნუ გეშინიათ და ამის გამო ნუ კანკალებთ, თქვენს ავტორიტეტზე და პასუხისმგებლობის მაღალ დონეზეც იზრუნეთ, რომელიც ყველა პიარზე უკეთესია.  

საინფორმაციო სააგენტოს ,,პოსტალიონის,, ერთ-ერთი რედაქტორი და დამფუძნებელი _ ნელი ვარდიაშვილი.

წყარო postalioni.com

დატოვეთ კომენტარი

კომენტარები

Загрузка...