ჩრდილოეთ კორეის საგარეო საქმეთა მინისტრი, რი იონგი შვედეთს ორდღიანი ვიზიტით ეწვია. ინფორმაციას Reuters-ი ავრცელებს.

დიპლომატის ვიზიტის მიზანი ორი ქვეყნის მმართველის, აშშ-ს პრეზიდენტის, დონალდ ტრამპისა და ჩრდილოეთ კორეის ლიდერის, კიმ ჩენ ინის შეხვედრის დღის წესრიგის დაზუსტებაა.

იონგი სტოკჰოლმში შვედ კოლეგას, მარგოტ ვალსტრომს შეხვდა.

შვედეთი, რომელიც არაა ნატოს წევრი ქვეყანა, ტრამპისა და კიმ ჩენ ინის შეხვედრის სავარაუდო ადგილად სახელდება.

“თუ ორი მსხვილი მოთამაშე შვედეთს განიხილავს მოლაპარაკებების ხელის შემწყობად, ჩვენ მზად ვართ ამისთვის, მაგრამ მათ უნდა გადაწყვიტონ, რა როლი ექნება ამ პროცესში შვედეთს” – თქვა შვედეთის პრემიმერმინისტრმა, სტეფან ლევენმა ადგილობრივ მედიასთან საუბრისას.

ამერიკის შეერთებული შტატების პრეზიდენტი აცხადებს, რომ მოსალოდნელი მოლაპარაკებები ჩრდილოეთ კორეის ლიდერ კიმ ჩენ ინთან კოლოსალურ წარმატებას მოიტანს.

“ვფიქრობ ჩრდილოეთ კორეა სწორად იქცევა, დარწმუნებული ვარ, რომ მივაღწევთ კოლოსალურ წარმატებას, რადგან ჩვენ ძალიან დიდი მხარდაჭერა გვაქვს“, – განაცხადა დონალდ ტრამპმა ჟურნალისტებთან საუბარში.

ამასთანავე  თეთრი სახლის ლიდერი იმედოვნებს, რომ კიმ ჩენ ინთან დაანონსებულ შეხვედრამდე ჩრდილოეთ კორეაში ბალისტიკურ რაკეტას აღარ გამოცდიან. ამის შესახებ დონალდ ტრამპმა მიკრობლოგ Twiter-ზე დაწერა.

“ჩრდილოეთ კორეას ბალისტიკური რაკეტა 2017 წლის 28 ნოემბრის შემდეგ არ გამოუცდია და მათ პირობა დადეს, რომ ჩვენ შეხვედრამდე ასე იქნება. მჯერა, რომ ისინი თავიანთ პირობას პატივს სცემენ”, – განაცხადა დონალდ ტრამპმა.

აშშ-ის პრეზიდენტის დონალდ ტრამპის და ჩრდილოეთ კორეის ლიდერის კიმ ჩენ ინის შეხვედრა, მაისის ბოლოს გაიმართება. აშშ-ის სახელმწიფო მდივანის რექს ტილერსონის განმარტებით, შეხვედრის ადგილისა და ზუსტი თარიღის შერჩევის ორგანიზებას რამდენიმე კვირა დასჭირდება.

დატოვეთ კომენტარი

კომენტარები

Загрузка...