27 ოქტომბერს, 11:30 საათზე, ქ,თბილისის საქალაქო სასამართლოში გაიმართა პოლიციაში ნაწამები ადვოკატის, გიორგი მდინარაძის სასამართლო პროცესი. წინა დღეს, ადვოკატთა ასოციაციის თავმჯდომარემ, ზაზა ხატიაშვილმა ფეისბუქის ოფიციალური გვერდიდან კოლეგებს მიმართა და მათ სასამართლო პროცესზე დასწრება სთხოვა, რათა სოლიდარობა გამოეხატათ პოლიციელის მიერ ნაწამები ადვოკატის მიმართ.

„პროფესიის ერთგულებისათვის ნაწამები ჩვენი კოლეგის მხარდასაჭერად მობრძანდით პროცესზე. ადვოკატის წამება არ უნდა იყოს მხოლოდ ჩემი და რამოდენიმე, თითზე ჩამოსათვლელი ადვოკატის საქმე. გიორგი მდინარაძის მწამებლების დასჯა უნდა იყოს მთელი ადვოკატთა კორპუსის პრესტიჟის საქმე“ _ აცხადებდა ხატიაშვილი და იქვე აღნიშნავდა, რომ სტრასბურგში ესაუბრა ევროპის საბჭოს ადამიანის უფლებათა დაცვის კომისარს, რომელსაც აუცილებლად მიაწვდის უახლეს ინფორმაციას გიორგი მდინარაძის საქმეზე.

27 ოქტომბერს, საღამოს, ხატიაშვილმა სასამართლოს ეზოში რამდენიმე კოლეგასთან ერთად გადაღებული ფოტო გამოაქვეყნა, რის შემდეგაც წამებაში ბრალდებულმა პოლიციელმა ლაშა კვირკვაიამ, ასევე ფეისბუქის საკუთარ გვერდზე გამოქვეყნა პოსტი, სადაც ხატიაშვილი დაადანაშაულა პოლიციის აგენტობაში. მან ასევე განაცხადა, რომ აქვს დოკუმენტი, რომელიც ხატიაშვილის ბრალდებას ადასტურებს, თუმცა და ცხადია, ეს დოკუმენტი არ გამოუქვეყნებია და მისი საუბარი ცარიელ სიტყვებად დარჩა.

სანამ ამ ბრალდებაზე ჩემს კომენტარს შემოგთავაზებდეთ, მკითხველს შევახსენებ, როგორ დაიწყო ყველაფერი:

2015 წლის 8 ნოემბერს, როდესაც საქართველოში იმყოფებოდა ადვოკატთა დელეგაციები მთელი მსოფლიოდან და ადვოკატის დღესთან დაკავშირებით მოწყობილ ღონისძიებებს ესწრებოდნენ, ერთ-ერთი ამ შეკრებიდან წასული ადვოკატი _ გიორგი მდინარაძე, პოლიციის ვაკე-საბურთალოს განყოფილებაში სასტიკად სცემეს. როგორც ითქვა, ის ხელბორკილით დააბეს და აწამეს. საქართველოს პროკურატურამ ადვოკატ გიორგი მდინარაძის მიმართ განხორციელებულ ძალადობის ფაქტზე საგამოძიებო მოქმედებები განახორციელა და სასამართლოს მიერ გაცემული განჩინების საფუძველზე, ბრალდებულის სახით დააკავა შს სამინისტროს ვაკე-საბურთალოს სამმართველოს, მე-5 განყოფილების უფროსი_ ლაშა კვირკვაია, საქართველოს სსკ-ის 333-ე მუხლის მე-3 ნაწილის „ბ“ქვეპუნქტით, რაც გულისხმობს სამსახურებრივი უფლებამოსილების გადამეტებას, ჩადენილს ძალადობით. სოციალური ქსელით და მედიასაშუალებებით ვრცელდებოდა ნაცემი ადვოკატის ფოტოები. ის საავადმყოფოში რამდენჯერმე მოინახულა საქართველოს პრეზიდენტის წარმომადგენელმა _ კახა კოჟორიძემ, თუმცა დაკავებული კვირკვაია ბრალს არ აღიარებდა. გამომძიებელი გაფრინდაშვილის ჩვენებით კი, ადვოკატი თავად შეეჯახა ფანჯრის ჩარჩოს და დაზიანებები განზრახ მიიყენა. კვირკვაიამ საპატიმროში, პროტესტის ნიშნად შიმშილობა გამოაცხადა, რის გამოც, ის ციხის საავადმყოფოში გადაიყვანეს, შემდეგ კი გირაოს სანაცვლოდ გამოუშვეს სასჯელაღსრულების დაწესებულებიდან.

2016 წლის 17 ივნისს ადვოკატთა ასოციაციის თავმჯდომარე ზაზა ხატიაშვილმა ქართველი ადვოკატების დევნის შეწყვეტის მოთხოვნით, ევროპის საბჭოს მთვარი შესასვლელითან, მჯდომარე აქცია გამართა. მან ევროპელ დიპლომატებს მიმართა დახმარების თხოვნით, რათა საქართველოს ხელისუფლებას ქართველ ადვოკატებზე განხორციელებული ძალადობის ფაქტები გამოეძიებინა და დამნაშავეები დაესაჯა. ხატიაშვილი აცხადებდა, არსად მსმენია სახელმწიფოს ხარჯზე დანიშნული ადვოკატი პოლიციაში ეწამებინოთ მხოლოდ იმიტომ, რომ მან არასრულწლოვან, დაცვის ქვეშ მყოფ პირს განუმარტა უფლებებიო.

ადვოკატის ცემის სასამართლო პროცესის განახლებას და ადვოკატთა კორპუსის გააქტიურებას დამნაშავის დასჯის მოთხოვნით, კვირკვაიას ფეისბუქგამოხმაურება მოჰყვა, სადაც მან ადვოკატთა ასოციაციის თავმჯდომარე კუდის აგენტად დაასახელა და უკვე ამ გზით შეეცადა მის გზიდან ჩამოცილებას.

კვირკვაია წერს: „არ მინდოდა ხმის ამოღება და ერთი წელია ჩუმად ვარ, მაგრამ არ ისვენებს ეს კაცი და რა ვქნა, უნდა ვთქვა, მითუმეტეს ყველაფერი დღევანდელი დღესავით მახსოვს, მახსოვს როგორ დარბოდა კუდი პოლიციაში და როგორ არკვევდა რომელ პოლიციელს რომელ ადვოკატთან ჰქონდა მიდგომა ( ნათესაური კავშირი, კომპრომატი და ა.შ.) ეს ხდებოდა არამარტო პოლიციაში, არამედ სხვა სახელმწიფო უწყებებშიც და საერთო ძალისხმევამ, რა თქმა უნდა, შედეგი გამოიღო და ზაზა გახდა მთავარი ადვოკატი, უსამართლობის წინააღმდეგ მებრძოლი და კუდის ნომრიანი აგენტი, ამ დღის მერე დარბოდა ზაზა დღისით უსამართლობის წინააღმდეგ მებრძოლად, ღამით კი კუდის ბნელ კაბინეტებში მირბოდა დღის შედეგების ჩასაბარებლად, ახლა გამოხვალ ზაზა და იტყვი, მე ნაცების დროს იმდენ რამეს ვაპროტესტებდი და ყველა აქციაზე ვიდექიო, სწორედ ეგ იყო ზაზა შენი აგენტურული დავალება : სადაც ორი კაცი შეიკრიბებოდა, ასინეთასავით მესამე შენ უნდა ყოფილიყავი, რათა მერე კუდისთვის მოგეყოლა მათი სამომავლო გეგმების შესახებ. მარტივ მაგალითს ვიტყვი, შენ დაანონსე, თუ კვირკვაიას არ დაიჭერენ ადვოკატთა კორპუსი სასამართლო პროცესებს ბოიკოტს გამოვუცხადებთ და არცერთი არ შევა სასამართლო სხდომებზეო ))) ეს მაშინ უნდა გექნა, როცა ადვოკატები საკუთარ თავს მკვდარზე ვენოკს ეძახდით, როცა სასამართლოში, წლების განმავლობაში არცერთ ადვოკატს არ დაუყენებია გამამართლებელი განაჩენი, (სულ რამდენიმე განაჩენი დადგა პროკურატურასთან შეთანხმებით, იმიტომ რომ ზემოდან მოდიოდა დავალება, რომ მრავალფეროვნებისთვის ერთი გამამართლებელი განაჩენი ყოფილიყო, ერთ-ერთი გლდანი ნაძალადევის საქმე იყო ძებნილ ადამიანზე), და მოსამართლე არცერთ თეთრს არ აკლებდა პროკურატურის მოთხოვნილ თანხას და არცერთ დღეს მოთხოვნილ სასჯელს , აი მაშინ უნდა გამოგეყენებინათ პროტესტის ეს ფორმა და მთელი მსოფლიო გაიგებდა რეალურად რა ხდებოდა საქართველოში, მაგრამ მაშინ რატომღაც ეს აზრი არ მოგსვლია თავში და კულტურულად აპრავებდი რაც ხდებოდა. პ.ს. რა ვქნა ზაზა,სადამდეც შემეძლო შევინახე შენი საიდუმო, მაგრამ ძალიან გულის ამრევია შენნაირი ნომრიანისგან ასეთი თავხედობა, თავი უფლებადამცველად რომ მოგაქვს, მე ხომ ვიცი გულის სიღრმეში როგორი პატარა ნაცუკა ხარ“.

რამდენიმე საინფორმაციო სააგენტოს მიერ გავრცელებულ ამ ფეისბუქგანცხდებას ცხადია, კვირკვაიას მხარდამჭერთა გამოხმაურებები, ანუ კომენტარებიც მოჰყვა,სადაც ხატიაშვილის აგენტობის არგუმენტად ასეთი რამ არის დასახელებული: _ „ ეგ რომ აგენტი არ ყოფილიყო, სააკაშვილი ამდენს ალაპარაკებდა?!“

ლაშა კვირკვაიას წერილიდან ჩანს, რომ ის კარგად ერკვევა, რა ხდებოდა სააკაშვილის დროს კუდის ჯურღმულებსა თუ ლაბირინთებში, სადაც უამრავი ადამიანია ნაწამები, გაუბედურებული და რომლებიც დღემდე, უშედეგოდ ითხოვენ სამართლიანობის აღდგენას. ცხადია, მათ სჭირდებათ მოწმეები, რომ ის საშინელი ფაქტები დაასაბუთონ, რაც თავს გადახდათ. მე, ჟურნალისტი, ნელი ვარდიაშვილი მოვითხოვ, პროკურატურამ დაკითხოს კვირკვაია აღნიშნულ ფაქტებთან დაკავშირებითაც, რადგან ვფიქრობ (მისი წერილიც ერთ-ერთი მტკიცებულებაა ამისი), რომ ის ფლობს საკმაო ინფორმაციებს კუდთან დაკავშირებით, მოეპოვება დოკუმენტები და ა.შ. ათქმევინონ ამ ადამიანს რა იცის, რადგან სხვა შემთხვევაში, ის შესაძლოა, გახდეს საზოგადოებრივი ,,ბომბი,, და პერიოდულად, მისთვის არასასურველ და მიუღებელ პიროვნებებზე გამოაცხადოს, რომ კუდის ოთახებში ხედავდა, ანდა მასზე აქვს მაკომპრომენტირებელი დოკუმენტები და ასე, „უპრაგონოდ“ ავრცელოს ადამიანის ღირსებაშემლახავი დეზინფორმაცია.

მოეთხოვოს კვირკვაიას, წარმოადგინოს მის მიერ დასახელებული დოკუმენტი, შემოწმდეს მისი ავთენტურობა, წინააღმდეგ შემთხვევაში, ცრუ ინფორმაციის გავრცელებისთვის დაისაჯოს სათანადოდ. ყოფილი სამართალდამცველის მხრიდან ასეთი განცხადება, არ არის ყურსმიღმა მისატოვებელი ფაქტი, რადგან სხვანაირად, ძალიან მალე, ჩვენ აღმოვჩნდებით ცილიწამებების ისეთ მორევში, საიდან გამოსვლაც ალბათ შეუძლებელი გახდება.

ბოლოს კი, მინდა მივმართო პირადად მას: ბატონო კვირკვაია, 9 წლიანი რეჟიმის დროს, მე ვიყავი გაზეთ „ალია-ქრონიკა“ -ს ჟურნალიტი და სიტყვით ვიბრძოდი იმ საშინელებების წინააღმდეგ, რომელიც  ხდებოდა. არ გამიცდენია არცერთი აქცია, რომელიც სააკაშვილისა და მისი დამქაშების ქმედებების წინააღმდეგ იმართებოდა წლების განმავლობაში და დღემდე ვინახავ, ყველა აქციიდან წამოღებულ სამახსოვრო ნივთებს, რომელთაც, მხოლოდ იმ ეტაპზე გამოვფენ ფართო საზოგადოების წინაშე, როცა ქვეყნის მმართველ და ძალოვან სტრუქტურებში ჯალათი რეჟიმის გადმონაშთები აღარ იქნებიან. დიდი იმედი მაქვს, რომ ეს დრო აუცილებლად დადგება და საზოგადოებას მხოლოდ ჩემს მიერ შეგროვებული ნივთებით გავახსენებ რეჟიმის სისხლიან ხელებს. ყველა აქციისა და სააკაშვილის რეჟიმის მიერ განხორციელებული თითქმის ყველა ძალადობის შესახებ ვწერდი გაზეთში. იყო დრო, როცა დამსდევდნენ კიდეც შენს მიერ ნახსენები კუდელები, მაგრამ მაინც ვწერდი და გაჩერება ერთი წამითაც არ მიფიქრია. თუ გინდა გადაამოწმე, როგორც ამბობ, კუდის ნამოქმედარზე ხელი მიგიწვდება. იმედია, ახლაც არ გამოხტები და არ იტყვი, რომ მათ ჯურღმულებში ოდესღაც მეც მნახე, ან გაქვს ფურცელი, როცა ვინმე მავერბოვკებდა, ნომრიან თუ უნომრო აგენტობას მთავაზობდა. რომ მხოლოდ ვინმეს დავალებით  დავრბოდი დღისით და ღამით აქციებზე, და გაზეთშიც ამიტომ  ვუძღვებოდი რუბრიკას _ `სისხლიანი ჯალათები`. ასეთ შემთხვევაში, მე უკვე სხვა გზას მივმართავ…

ადვოკატი მდინარაძის ცემის ფაქტზე ალბათ, სასამართლო ობიექტურად იმსჯელებს და დამნაშავეს აუცილებლად სათანადოდ დასჯის, თუმცა მე, როგორც ჟურნალისტს შემიძლია გამოვთქვა აზრი, რომ შენ, პოლიციის ყოფილ უფროსს, არასასურველი ადამიანებისთვის ჩირქის მოცხება არ გეძნელება. სიმართლე თუ გინდა იცოდე, ესეც მიშას რეჟიმის ხელწერაა. სწორედ მისი მმართველობის პერიოდში ჰპოვა სასათბურე პირობები მსგავსმა ქმედებამ _ „მე ახლა ნებისმიერ რამეს დაგაბრალებ და მერე შენ დადექი და როგორც გაგიხარდება ისე იმართლე თავი“. რეჟიმზე გამარჯვებული „ოცნების “ მმართველობის პერიოდის პოლიციის უფროსს, საიდან გაქვთ ამდენი ცოდნა კუდელების კულუარულ ქმედებებზე?შენც ხომ ის ერთ-ერთი ჩაფხუტიანი პოლიციელი-რობოკოპი არ ხართ, რომლებიც 7 ნოემბერს, 26 მაისს და კიდევ სხვა დღეებში, ნიღაბაფარებული არბევდა იმ მშვიდობიან მოქალაქეებს, რომლებიც სწორედაც რომ რეჟიმს ებრძოდნენ? საზოგადოებამ მხოლოდ ზოგიერთი მათგანი გაშიფრა, ბევრს კი კვლავ ნიღაბი აქვს აკრული და თანამდებობაც არ დაუტოვებია.

თქვენს შესახებ საზოგადობამ მხოლოდ ის იცის, რომ პოლიციელების ოჯახი გაქვთ. ძმა, ლევან კვირკვაია პოლიციელია და ზემო სვანეთი-სამეგრელოს პოლიციის დეპარტამენტის, წალენჯიხის რაიონული სამმართველოს უფროსის მოადგილეა. თქვენმა ფეისბუქწერილმა კი თქვენს ირგვლივ უფრო მეტი კითხვები გააჩინა, ამიტომ იქნებ ჩამოიხსნათ ნიღაბი და დაგვანახოთ ნამდვილი სახე _ ვინ ხართ? რა გაგიკეთებიათ? როდის გახდით პოლიციელი? სად მოღვაწეობდით 9 წლიანი რეჟიმის დროს? ვისი რეკომენდაციით დაინიშნეთ ისეთ მაღალ თანამდებობაზე, როგორიც არის პოლიციის უფროსობა? ამის შემდეგ საზოგადოება თავად შეგაფასებთ და იმასაც თავად გადაწყვეტს, თქვენი ნათქვამი უნდა დაიჯეროს, თუ არა.

რაც შეეხება ზაზა ხატიაშვილს, მას ცილისმწამებლებისგან არავის დაცვა აღარ სჭირდება, რადგან გაწეული ღვაწლით, უკვე შექმნა პოზიტიური ისტორია.

დატოვეთ კომენტარი

კომენტარები

Загрузка...