ავტორიზაციის საბჭომ შავი ზღვის საერთაშორისო უნივერსიტეტს (IBSU) სტუდენტების ახალი ნაკადის მიღება ერთი წლით შეუზღუდა. ამის შესახებ ინფორმაციას უნივერსიტეტი ავრცელებს.

IBSU-ში აცხადებენ, რომ უნივერსიტეტი ავტორიზაციის სტანდარტებს აკმაყოფილებს, თუმცა ავტორიზაციის საბჭომ ექსპერტების დასკვნასთან შეუსაბამო გადაწყვეტილება მიიღო.

როგორც უნივერისტეტში განმარტავენ, საბჭოს გადაწყვეტილების მიზეზი ისაა, რომ IBSU-ს 2013 წელს დაეკისრა საგადასახადო ჯარიმა, რის გამოც უნივერსიტეტის ქონება დაყადაღდა.

უნივერისტეტი მხარდაჭერისთვის არასამთავრობო სექტორსა და საერთაშორისო ორგანიზაციებს, დიპლომატიურ კორპუსსა და საზოგადოებას მიმართავს.

ავტორიზაციის საბჭომ შავი ზღვის საერთაშორისო უნივერსიტეტს სტუდენტების ახალი ნაკადის მიღება ერთი წლით უსამართლოდ შეუზღუდა

2018 წლიდან საქართველოში მოქმედ უმაღლეს სასწავლებლებში ახალი სტანდარტებით ავტორიზაციის პროცესი დაიწყო. შავი ზღვის საერთაშორისო უნივერსიტეტს 24-27 აპრილს ეწვია ექსპერტთა ჯგუფი, რომელსაც ხელმძღვანელობდა განათლების დარგში საერთაშორისო ექსპერტი გაერთიანებული სამეფოდან, პროფესორი ენდი გიბსი.

განათლების ხარისხის განვითარების ცენტრის განცხადებით, შავი ზღვის საერთაშორისო უნივერსიტეტს აბიტურიენტების მიღება 1 წლით  შეეზღუდა.

ცენტრის ხელმძღვანელის, თამარ სანიკიძის განმარტებით, უნივერსიტეტს დავალიანება აქვს სახელმწიფოს მიმართ, რაც სტუდენტების მიღების შეჩერების მიზეზი გახდა. სანიკიძის განმარტებით, სტუდენტებს არანაირი პრობლემა არ შეექმნებათ.

„რისკებთან დაკავშირებით და პრობლემების მოგვარების მიზნით, წლების განმავლობაში მიმდინარეობდა ხარისხის ცენტრსა და უნივერსიტეტის ხელმძღვანელობას შორის კომუნიკაცია. ამის მიუხედავად, პრობლემები ვერ მოგვარდა. იმისათვის, რომ გათვალისწინებული იყოს სტუდენტთა ინტერესები, მათთვის სასწავლო პროცესთან დაკავშირებით რისკების თავიდან ასაცილებლად, უნივერსიტეტს სტუდენტების მიღების უფლება 1 წლის ვადით შეეზღუდა”, – დასძინა სანიკიძემ.

რაც შეეხება იმ აბიტურიენტებს, რომლებიც წელს აბარებდნენ შავი ზღვის საერთაშორისო უნივერსიტეტში, სანიკიძის თქმით, ისინი მობილობის პრინციპით სხვა ავტორიზებულ სასწავლებლებში ისწავლიან.

„შეზღუდვა მხოლოდ ეხება იმ აბიტურიენტებს, ვინც წელს ერთიანი ეროვნული გამოცდების შედეგად აირჩიეს შავი ზღვის უნივერსიტეტი. წელს მათ შევთავაზებთ სხვა ავტორიზებულ დაწესებულებებს, რომ გადანაწილდნენ და შეუფერხებლად დაიწყონ სასწავლო წელი“, – განაცხადა თამარ სანიკიძემ.

უნივერისტეტი გადაწყვეტილებას უსამართლოდ მიიჩნევს და მხარდაჭერისთვის არასამთავრობო სექტორსა და საერთაშორისო ორგანიზაციებს, დიპლომატიურ კორპუსსა და საზოგადოებას მიმართავს.

სანიკიძე კი ამბობს, რომ გადაწყვეტილება სამართლიანია.

წყარო: imedinews.ge

დატოვეთ კომენტარი

კომენტარები

Загрузка...