აშშ-ის პრეზიდენტი ბარაკ ობამა გერმანიაში ოფიციალური ვიზიტით იმყოფებოდა და, რა თქმა უნდა, თავისი ”მხეციც” იახლა. ჩვენი გერმანელი კოლეგები ამ დღეებში სწორედ ობამას ავტომობილს, The Beast-ად წოდებულ, შეჯავშნულ და მნიშვნელოვნად გადაკეთებულ Cadillac DTS-ს აკვირდებოდნენ.

Auto Bild

Secret Service-ის ბიჭები ირწმუნებიან, ეს მსოფლიოში ყველაზე უსაფრთხო ავტომობილიაო. თუმცა ობამას ”კადილაკი”, რომლის არაერთი ეგზემპლარი არსებობს, გერმანიაში, სავარაუდოდ, უკანასკნელად იმყოფებოდა. საქმე იმაშია, რომ 2017 წლიდან აშშ-ის პრეზიდენტი ახალ ავტომობილს მიიღებს. ეს ინფორმაცია ცოტა ხნის წინ თავად ობამამ, დეტროიტის ავტოშოუზე დაადასტურა. როგორი იქნება ახალი საპრეზიდენტო ლიმუზინი? ამ კითხვაზე პასუხის გაცემა ახლა ისევე რთულია, როგორც იმის ცოდნა, თუ ვინ შეცვლის თავად ბარაკ ობამას მომავალ საპრეზიდენტო არჩევნებში.

Auto Bild

აქტუალურ ”მხეცს” Cadillac DTS-თან საერთო, რეალურად, მხოლოდ ბაზა აქვს. დეტალების შესახებ ინფორმაცია საიდუმლოა, ერთი ეგზემპლარის ფასი კი, როგორც ამბობენ, ერთ მილიონ დოლარზე მეტია. აშშ-ის პრეზიდენტის ”კადილაკი” ლიმუზინია, მაგრამ სატვირთო ავტომობილის წონა აქვს – სავარაუდოდ 5-დან 8 ტონამდე იწონის. ცნობილია ისიც, რომ ობამას ”კადილაკის” ძრავა 8-ცილინდრიანი აგრეგატია (V8), რომლის მოცულობაც 8,1 ლიტრი გახლავთ. ზოგიერთ ეგზემპლარს კი დიზელის 6,6-ლიტრიანი V8 ძრავა უდგას. დაუდასტურებელი ცნობების თანახმად, ეს ”კადილაკი” თავისი წონის გამო მაქსიმუმ 97 კმ/სთ-ს ავითარებს და 100 კილომეტრზე მინიმუმ 27 ლიტრ საწვავს მოიხმარს.

Auto Bild

ობამას ”მხეცი” სიგრძეში თითქმის 7 მეტრია. როგორც უკვე ვთქვით, ავტომობილის უსაფრთხოების დეტალების შესახებ ოფიციალურად ცნობილი არაფერია და თუ მოარულ ხმებს დავუჯერებთ, იდეალურად შეჯავშნულია როგორც საწვავის ავზი, ისე ფანჯრებიც. ავტომობილი დაცულია ნაღმების, ხელყუმბარების, ცრემლსადენი გაზის შეტევისგან. აქვს ღამით ხილვადობის რეჟიმი, სატელიტური ტელეფონი და როგორც ირკვევა, ავტომობილში ყოველთვის არის სისხლით სავსე კონსერვები – ცხადია, იმ ჯგუფის, რომელიც პრეზიდენტს აქვს.

Auto Bild

ამ ”კადილაკის” შემცვლელი კი, სავარაუდოდ, კიდევ უფრო უსაფრთხო იქნება. ახალი საპრეზიდენტო ლიმუზინის შექმნისთვის კონკურსი 2013 წლის სექტემბერში დაიწყო და 2015 წლის ზაფხულში დასრულდა. ჯერ, რა თქმა უნდა, უცნობია, რომელი ავტომწარმოებელი შექმნის ახალ ”მხეცს”. ცნობილია მხოლოდ ის, რომ კონკურსში მონაწილეობის უფლება მხოლოდ იმ ავტომწარმოებლებს ჰქონდათ, რომლებსაც სათაო ოფისი აშშ-ში აქვთ.

Auto Bild

წყარო: Autobild.ge

დატოვეთ კომენტარი

კომენტარები

Загрузка...