ყვარლის მუნიციპალიტეტში მე-16-ე საუკუნის ტაძარში, რომელიც ენისელის შიხიანის, იგივე აღდგომის ეკლესიის სახელით არის ცნობილი, წყალი ჩადის.

როგორც ადგილობრივები პირველ არხთან აცხადებენ, ტაძარში წყალი გუმბათიდან ჯერ კიდევ წლების წინ ჩადიოდა, მაგრამ მიმდინარე წლის აპრილში, მას შემდეგ, რაც სარეაბილიტაციო სამუშაოების მოსამზადებელ ეტაპზე, დაზიანებული კრამიტის სახურავი გადახადეს და ხე-მცენარეებისგან გაწმინდეს, უამინდობის დროს, ტაძარშიც ისევე წვიმს, როგორც გარეთ.

ენისელები ამბობენ, რომ მათ სპეციალისტების გარეშე, ტაძრის გადახურვის უფლება არ აქვთ, წყალი კი ისედაც დაზიანებულ კედლებს, კიდევ უფრო აზიანებს. მათი თქმით, ტაძარს განსაკუთრებული საფრთხე შემოდგომა-ზამთრის პერიოდში ემუქრება, ვინაიდან თოვლი და წვიმა თავღია ეკლესიას მთლიანად დააზიანებს.

საქართველოს კულტურული მემკვიდრეობის დაცვის ეროვნულ სააგენტოში განმარტავენ, რომ ენისელის აღდგომის ტაძარი სპეციალისტებმა დაათვალიერეს.

უწყების ცნობით, შესაბამისი რეკომენდაციების გათვალისწინებით, პროექტი უკვე შემუშავებულია და ძეგლის სრული რეაბილიტაცია 2018 წელს დაიწყება. მანამდე კი ტაძარი დროებით გადაიხურება. კულტურული მემკვიდრეობის დაცვის ეროვნული სააგენტო გადახურვის სამუშაოებს უახლოეს პერიოდში დაიწყებს.

1tv.ge

დატოვეთ კომენტარი

კომენტარები

Загрузка...