ქარიშხალ „ოფელიას“ მიახლოების გამო, ირლანდიაში, რამდენიმე საგრაფოში განგაშის ყველაზე მაღალი, წითელი დონე გამოცხადდა – იუწყება The Independent. ეროვნული მეტეოროლოგიური სამსახურის ინფორმაციით, წითელი დონე გოლუეის, მეიოს, კორკისა და კერის საგრაფოებში მოქმედებს, დანარჩენ ოლქებში კი, განგაშის ნარინჯისფერი კატეგორიაა გამოცხადებული. ეს რეჟიმი 16 და 17 ოქტომბერს ქვეყნის დასავლეთ ნაწილში იმოქმედებს.

სინოპტიკოსების განმარტებით, ქარის სიჩქარე საათში 130 კილომეტრს შეადგენს. სანაპირო დასახლებებში არსებობს დატბორვის საფრთხე. 

ხვალ დილიდან, ირლანდიის მთავრობის განკარგულებით, სტიქიისთვის მოსამზადებლად სპეციალური საგანგებო შტაბის სხდომა გაიმართება. იმ რაიონებში, სადაც საფრთხის წითელი დონე გამოცხადდება, არ იმუშავებენ სკოლები. მოსახლეობას დაურიგდება ქვიშის ტომრები, რათა მათ სახლების და მდინარის ნაპირების გამაგრება შეძლონ.

მსგავსი მასშტაბის ქარიშხალი ირლანდიას 1961 წლის შემდეგ არ დასტყდომია თავს.

1tv.ge

დატოვეთ კომენტარი

კომენტარები

Загрузка...