ჩრდილოეთ კორეის ხელისუფლება გაეროს უშიშროების საბჭოს მიერ ფხენიანის წინააღმდეგ მიღებულ რეზოლუციას უკანონოს უწოდებს და საპასუხო ნაბიჯების გადადგმისთვის ემზადება.

ამის შესახებ შესახებ ჟენევაში გაეროში ჩრდილოეთ კორეის მუდმივმა წარმომადგენელმა ჰან ტხე სონმა განაცხადა.

“ვაშინგტონმა ეკონომიკური, პოლიტიკური და სამხედრო წინააღმდეგობის კურსი აიღო. მომავალი ზომები, რომლებსაც ჩრდილოეთ კორეის ხელისუფლება მიმართავს, აშშ-ს მიაყენებს ყველაზე დიდ ტკივილს, რაც კი ოდესმე განუცდია”, – აცხადებს ჰან ტხე სონმა.

მანამდე ჩრდილოეთ კორეის ლიდერი ამერიკის შეერთებულ შტატებს სამაგიეროს გადახდით დაემუქრა, თუ გაეროს უშიშროების საბჭო ფხენიანის წინააღმდეგ ვაშინგტონის მიერ ინიცირებული სანქციების გაფართოების რეზოლუციას მხარს დაუჭერდა.

11 სექტემბერს გაეროს უშიშროების საბჭოს სხდომა გაიმართა, სადაც ფხენიანის წინააღმდეგ ვაშინგტონის მიერ ინიცირებული რეზოლუცია მიიღეს. აღსანიშნავია, რომ რეზოლუციის თავდაპირველი პროექტი ვაშინგტონმა შეცვალა და მისი ტონი შეარბილა.

დოკუმენტის თანახმად, შეზღუდვები ჩრდილოეთ კორეისთვის ნავთობპროდუქტების მიწოდებაზე დაწესდა. განსაზღვრულია ასევე ლიმიტი ფხენიანისთვის ნედლი ნავთობის მიწოდებაზე, კერძოდ მოცულობამ, არ უნდა გადააჭარბოს გასული 12 თვის მაჩვენებლებს. ჩრდილოეთ კორეა ვერ იყიდის ასევე კონდენსატებს და აირისკონდენსატურ სითხეს და ვერ შეძლებს ტექსტილის პროდუქციის გაყიდვას.

ბოლო პერიოდში ჩრდილოეთ კორეამ თავისი ბირთვული პროგრამის დახვეწის მიზნით არაერთი ბალისტიკური რაკეტა გამოსცადა. 3 სექტემბერს ფხენიანმა წყალბადის ბომბიც გაუშვა. ტრამპი კიმ ჩენ ინის მუქარაზე საპასუხო ბირთვული დარტყმების განხორციელებას ჰპირდება.

 pia.ge

დატოვეთ კომენტარი

კომენტარები

Загрузка...