ჩინეთში გუანსის პროვინციაში მსოფლიოში პირველი “ქალაქი ტყის” მშენებლობა იწყება. ახალი დასახლების მშენებლობა ჩინეთის ხელისუფლების მიერ შემუშავებული იმ პროექტის ნაწილია, რომელიც მიზნად გარემოს დაბინძურების წინააღმდეგ ბრძოლას ისახავს. თავად ქალაქი და მისი ინფრასტრუქტურა იტალიური დიზაინერული ჯგუფის Stefano Boeri Architetti-ის მიერ არის შემუშავებული. აღნიშნულმა ჯგუფმა მსოფლიო ბაზარზე თავი ეკოლოგიურად სუფთა პროექტებით გაითქვა. გეგმის თანახმად, ფუტურისტული ქალაქის მოსახლეობა დაახლოებით 30 ათასი იქნება.

ქალაქი ნარგავებით მთლიანად იქნება დაფარული. საერთო ჯამში აქ 100 სხვადასხვა სახეობის მილიონამდე მცენარის დარგვას გეგმავენ, მათ შორის 400 ათასი ხე იქნება. არსებობს ვარაუდი, რომ მცენარეების მსგავსი რაოდენობა 10 ათას ტონა ნახშიროჟანგისა და 57 ტონა სხვა ნივთიერებების შთანთქმა-გადამუშავებას შეძლებს, გამოიმუშავებს რა ამასთანავე ყოველწლიურად 900 ტონა ჟანგბადს.

გარდა იმისა, რომ ახალი საცხოვრებელი ფართები გაჩნდება, “ქალაქი ტყე” მიმდებარე ტერიტორიაზე საშუალო ტემპერატურის შემცირებას, ჰაერის ხარისხის გაუმჯობესებას, ხმაურასწინააღმდეგო ბარიერისა და რეგიონში ბიომრავალფეროვნების შექმნას შეუწყობს ხელს. ქალაქი თვითუზრუნველყოფის პრინციპით იფუნქციონირებს – აქვე იგეგმება განახლებადი ენერგიის მოსაპოვებლად საჭირო ინფრასტრუქტურის განვითარება.

ქალაქში იქნება კომერციული ზონა, დასვენებისა და გართობის ადგილები, საავადმყოფო და ორი სკოლა. მისი მშენებლობა კი 2020 წლისთვის დასრულდება.

აღნიშნულ პროექტს ჩინეთის ხელისუფლება პრიორიტეტად მიიჩნევს, თუ ყველაფერი გეგმის მიხედვით განვითარდა, “ქალაქ ტყეს” ქვეყნის სხვა ნაწილებშიც ააშენებენ.

წყარო:ALLNEWS.GE

დატოვეთ კომენტარი

კომენტარები

Загрузка...