ამერიკელი ინვესტორი უორენ ბაფეტი, რომელიც მსოფლიოს უმდიდრეს ადამიანებს შორისაა, მიზანშეუწონლად მიიჩნევს კრიპტოვალუტებში ინვესტირებას და ელექტრონული ფულის კრახს გარდაუვლად მიიჩნევს.

ამის შესახებ მილიარდერმა ტელეკომპანია CNBC–ის ეთერში დღეს განაცხადა.

„ზოგადად, რაც შეეხება კრიპტოვალუტებს, თითქმის დარწმუნებული ვარ, რომ მათ ცუდი დასასრული ელოდება. როდის და როგორ მოხდება ეს – არ ვიცი“, – განაცხადა Berkshire Hathaway–ს ხელმძღვანელმა.

მილიარდერმა ისიც თქვა, რომ Berkshire Hathaway არ აბანდებს ფულს კრიპტოვალუტაში, მათ შორის ბიტკოინში და არ მომავალში აპირებს ამის გაკეთებას. „მე ისედაც საკმარისი პრობლემები მაქვს საკითხებში, რომლებშიც რაღაც გამეგება“, – აცხადებს ბიზნესმენი. მან საზოგადოებას „ღირსეულ ბიზნესში“ ინვესტირებისკენ მოუწოდა.

სააგენტო Bloomberg–ის ბოლო მონაცემებით, უორენ ბაფეტი სიმდიდრით მსოფლიოში მესამე ადგილზეა და მისი ქონების მოცულობა ფინანსურ გამოსახულებაში $87,3 მლრდ–ს შეადგენს.

მანამდე, მსოფლიოს ერთ-ერთი უმსხვილესი ბანკის, JPMORGAN-ის აღმასრულებელმა დირექტორმა, ჯეიმს დაიმონმა სინანული გამოთქვა დეკემბერში ბიტკოინზე ნეგატიური კომენტარის გაკეთების გამო.

„ბლოკჩეინი არის რეალობა, თქვენ შეგიძლიათ იქონიოთ კრიპტოდოლარი იენში“, – განაცხადა სამშაბათს დაიმონმა, მან ასევე აღნიშნა, რომ თავად არ წარმოადგენს დაინტერესებულ მხარეს.

დაიმონი გასულ წელს მიცემულ ინტერვიუში ბიტკოინს აკრიტიკებდა და მასში ინვესტიციების განმახორციელებლებს სულელებს უწოდებდა.

ჯერ კიდევ 2017 წლის ოქტომბერში გამართულ ფინასურ კონფერენციაზე დაიმონი აცხადებდა, რომ ბიტკოინს რეალური ღირებულება არ გააჩნია. იმ დროისთვის ბიტკოინის ფასი 5800 დოლარს არ აღემატებოდა, დეკემბერში კი $20000-ს მიაღწია, თუმცა დღეს $14200-მდეა შემცირებული.

მიუხედავად ბიტკოინის რყევებისა, კრიპტოვალუტა ნდობას კვლავ ინარჩუნებს. ყველაზე მეტი სწორედ ეს ციფრული ვალუტა გამოიყენება. მისი დღიური ბრუნვა სტაბილურად 15-20 მილიარდი აშშ დოლარის ეკვივალენტის ფარგლებში მერყეობს.

Digest.ge

დატოვეთ კომენტარი

კომენტარები

Загрузка...