ჩესლავ ბოიარსკიმ ჩინელების მიერ უძველეს დროს აღმოჩენილი ქაღალდის წარმოების საიდუმლოება კიდევ ერთხელ აღმოაჩინა , თუმცა მას ამ სფეროში არც განათლება ჰქონდა და არც არანაირი ინფორმაცია. ის კრიმინალისტიკის ისტორიაში უნიჭიერესი გამომგონებლის სახელით შევიდა. მხოლოდ ბედის ირონიად მიიჩნევენ იმას, რომ ბოიარსკი თაღლითი გახდა. იგი 13 წლის განმავლობაში ბეჭდავდა ყალბ ბანკნოტებს და საფრანგეთის პოლიციას დიდ პრობლემებს უქმნიდა.
   პარიზის „საფრანგეთის ბანკის“ ექსპერტებმა ბანკნოტების დასტაში სრულიად შემთხვევით ყალბი ათასფრანკიანი აღმოაჩინეს. ხელით შეხებისას მას უჩვეულო ხმა ჰქონდა – საეჭვოდ ჭრაჭუნებდა. საფუძვლიანი გამოკვლევით დადგინდა, რომ იგი ნამდვილ ქაღალდზე იყო დაბეჭდილი და ბანკნოტის ყველა ატრიბუტი ჰქონდა, რამდენიმე ნიშნის გარდა.
   ექსპერტებმა დაასკვნეს, რომ ეს ნამდვილი ოსტატის მიერ დამზადებული საკმაოდ მაღალი ხარისხის ყალბი ფული იყო. ოსტატი სრულიად უცნობ ტექნოლოგიას იყენებდა და ქაღალდს სპეციფიური ხმა ამიტომ ჰქონდა. მეოცე საუკუნის საფრანგეთს ასეთი კვალიფიკაციის თაღლითი არ ახსოვს. 1960 წლის ფულის რეფორმის შემდეგ უცნობმა ოსტატმა ახალი ტიპის ასფრანკიანების დამზადებაც დაიწყო. მხოლოდ 1963 წელს მიაგნო პოლიციამ იმ ადამიანის კვალს, ვინც ბანკნოტებს აბარებდა. თუმცა ის მხოლოდ გამსაღებელი აღმოჩნდა. ბოიარსკი პარიზთან ახლოს ფეშენებელურ კვარტალში – მონჟირონეში- ცხოვრობდა, საკმაოდ მდიდარი იყო, ორსართულიანი კოტეჯი ჰქონდა ულამაზესი ბაღით. პოლიციამ გადაწყვიტა, პროკურორის სანქციის გარეშე დაეპატიმრებინა ის და სახლი გაეჩხრიკა.
  ბოიარსკიმ პოლიციას კარი თვითონ გაუღო. იგი ძალზე ტანდაბალი იყო, მეტრი და 58 სანტიმეტრი თუ იქნებოდა. მაშინვე პროკურორის სანქცია ითხოვა, მაგრან ყურადღება არავინ მიაქცია, ასე შევიდნენ მის სახლში. პირველივე სართულზე, შესასვლელში, ერთ ჩანთას წააწყდნენ. ჩანთა ვერ გახსნენ, ბოიარსკიმ კი მათ გასაღები არ მისცა. მასპინძლის პროტესტის მიუხედავად ჩანთა გატეხეს და მასში ასფრანკიანების მთელი დასტა აღმოაჩინეს.
  აღფრთოვანებულმა პოლიციის კომისარმა ბოიარსკის დაცინვა დაუწყო, ფული ექსპერტიზაზე გადაგზავნა, დარწმუნებული იყო, რომ ყალბი ფული იპოვა. ბოიარსკი დააპატიმრეს, მის სახლში პოლიცია დარჩა და ტიპოგრაფიის ძებნა დაიწყო. ეს ძნელი საქმე სულაც არ ეგონათ.
    შემდგომი მოვლენები კი ნამდვილი დეტექტიური რომანის სიუჟეტს წააგავს. ბოიარსკის სახლიდან წაღებული ფული ნამდვილი აღმოჩნდა. მის სახლში ტიპოგრაფიის კვალს ვერ მიაგნეს და კითხვებზეც ისე ღირსეულად ეჭირა თავი, რომ დიდი პატივისცემით ეპყრობოდნენ. იგი პოლონელი იყო, ეკონომიკის ფაკულტეტი ვარშავაში ჰქონდა დამთავრებული, არქიტექტურის კი გერმანიაში. ფაშიზმის დროს პოლონეთის არმიის ერთ- ერთ ოფიცერთა ერთად საფრანგეთში გაიქცა, გენერალ დე გოლის მომხრეთა რიგებში აღმოჩნდა და საფრანგეთის მოქალაქე გახდა.
    საფრანგეთში არც მისი პოლონური დიპლომი აღიარეს და არც გერმანული. იძულებული გახდა, გამომგონებლობა დაეწყო. ონის პერიოდში ბევრი სხვადასხვა გამოგონება დააპატენტა – ეკონომიური ელექტროსაპარსები, გაზონების სარწყავი ტუმბოები, პურის საჭრელები, ქაღალდის და საჭრელი საოფისე მანქანები, მაგრამ ამ ყველაფერმა ვერ გაამდიდრა და თავის რჩენის სხვა გზა მონახა. შეძლებული ოჯახის შვილი, მშვენიერი ფრანგი ქალი შეირთო ცოლად. 5-6 წელიწადში შვეიცარიის ბანკში ანგარიში გახსნა. თუმცა ის ბანკი 59-იან წლებში გაკოტრდა და ბოიარსკი დიდხანს ელოდა ფულის დაბრუნებას. ცოლი 1948 წელს შეირთო, იმ დროისათვის შემოსავლის გვარიანი წყარო უკვე ჰქონდა, თუმცა ის ვერ დაადგინეს. გამოძიებამ ივარაუდა, რომ ბოიარსკის ტოპოგრაფია სახლში უნდა ჰქონოდა, რადგან სახლიდან იშვიათად გადიოდა. თუმცა ცოლმა მისი საქმიანობის შესახებ არაფერი იცოდა. სახლი ბოიარსკის აშენებული იყო, ის ხომ არქიტექტორი გახლდათ.
  დიდი ხნის უშედეგო ძებნის შემდეგ კაბინეტში, იატაკქვეშ, მიწისქვეშა შენობაში შესასვლელს მიაგნეს. ოთახი სულ 6 კვ მეტრი იყო. პირველად ვერავინ დაიჯერა, რომ უმუშევარმა არქიტექტორმა ბანკნოტების დამზადების მთელი ციკლი იქ დაამუშავა. როგორც კი ბოიარსკიმ გაიგო, რომ მისი ტიპოგრაფია აღმოაჩინეს, ჩვენება მისცა.
      ეს გასაოცარი ტიპოგრაფია მან თითქმის ჩალის ფასად, 299 ფრანკად 1948 წელს ძველი ბიდესაგან მოაწყო. თავდაპირველად ქაღალდების დასაქუცმაცებელი წისქვილი დაამზადა. როდესაც რამდენიმე წვრილი ბანკნოტი დაამუშავა, მიხვდა, რომ აღმოჩენა გააკეთა, უნიკალურ მასალას მიაგნო. ყალბი ფულის დასამზადებელი ხელსაწყო წვრილი კუპიურების გადამუშავებით მსხვილი ბანკნოტების დასამზადებელ ხარისხიან ქაღალდს იღებდა. თავდაპირველად ჩინელების გამოვლინება გაიმეორა, შემდეგ კი გრავირებაში დაიწყო ვარჯიში. შეისწავლა საღებავები, ბანკნოტის დაცვის სისტემები და ფულის წარმოების სხვა საიდუმლოებები. ანალიტიკური აზროვნების, ნიჭისა და თავდაუზოგავი შრომის წყალობით შექმნილი საბეჭდი მანქანა მაღალი ხარისხის ბანკნოტებს ამზადებდა. შემდეგ ბოიარსკი ბანკნოტებს სპეციალურ ღუმელში აძველებდა. პირველი კუპიურა – ათასფრანკიანი ბანკნოტი – 1959 წელს საშობაოდ დაამზადა. თავიდან თვითონვე ასაღებდა. როგორც კი ამ საქმით გვარიანი ფული დააგროვა, საყვარელ საქმეს – გამომგონებლობას დაუბრუნდა, რამდენიმე პატენტი მიიღო, მაგრამ ნახა, რომ ეს საქმე ფულს ვერ მოუტანდა და ისევ ბანკნოტების დამზადება გააგრძელა.
   ეს გასაოცარი ისტორია საფრანგეთის ყველა გაზეთმა გამოაქვეყნა. ბევრს წერდნენ იმაზეც, თუ როგორ ვერ შეძლო უნიჭიერესმა ადამიანმა პატიოსნად თავის რჩენა. ერთმა ჟურნალისტმა იგი შემდეგნაირად მონათლა: „არამზადა აღმატებით ხარისხში”. ბოიარსკის დღემდე ამ მეტსახელით მოიხსენიებენ.
 1965 წელს ციხის საავადმყოფოში მას ძვლის კიბოს დიაგნოზი დაუსვეს, ოპერაციაზე უარი განაცხადა. განაჩენის გამოტანის წინა დღეს საფრანგეთის ბანკს ოფიციალურად შეატყობინა, რომ განსაკუთრებული ქაღალდის შექმნის საიდუმლო იცოდა, რომლის გაყალბებას ვერავის შეძლებდა, მაგრამ ბანკმა მასთან თანამშრომლობა არ ისურვა.
  პოლიციის მონაცემებით, ბოიარსკიმ 3,6 მლნ ფრანკის ბანკნოტი გამოუშვა. თავად მას ამის თაობაზე არაფერი უთქვამს. სასამართლომ 29 წლით თავისუფლების აღკვეთა მიუსაჯა, იმის მიუხედავად, რომ პროკურორი სამუდამო პატიმრობას ითხოვდა.
წყარო postalioni.com

დატოვეთ კომენტარი

კომენტარები

Загрузка...