ოთხშაბათს, 2 აგვისტოს, დონალდ ტრამპმა მხარი დაუჭირა ლეგალური ემიგრაციის კანონის ორად გაყოფას და სამუშაო ვიზის ქულათა სისტემით ჩანაცვლებას.

იმიგრანტებისთვის ქულათა მინიჭების მსგავს სისტემას იყენებენ კანადასა და ავსტრალიაში, რასაც ტრამპი ხშირად აქებს. აღნიშნული სისტემით, აშშ-ში საცხოვრებლად გადასვლის მსურველებს ქულებით შეაფასებენ და ყოველწლიურად ხელმისაწვდომ 140 ათას საიმიგრაციო ვიზას მიიღებენ ის პირები, რომლებიც ყველაზე მაღალ ქულას დააგროვებენ.

ქულათა სისტემის მიხედვით, რომელსაც კონგრესმა უკვე დაუჭირა მხარი, ყველაზე მაღალ შეფასებას მიიღებს ის კანდიდატი, რომელიც თითქმის სრულყოფილად ფლობს ინგლისურს, არის 26-დან 31 წლამდე, ამერიკაში მიიღო დოქტორანტურის ან სხვა პროფესიული ხარისხის განათლება და იმაზე სამჯერ მაღალი ხელფასის შემოთავაზება აქვს, ვიდრე – თავის ქვეყანაში.

განსაკუთრებული შემთხვევები და გარემოებები უპირატესობად არ ჩაითვლება, სამაგიეროდ, ოლიმპიური მედალი ან ნობელის პრიზი, ქულების სისტემაში მომგებიანად ითვლება.

იმისათვის, რომ კანდიდატმა გააკეთოს განაცხადი აშშ-ს საიმიგრაციო ვიზაზე, უნდა დააგროვოს 30 ქულა.

ქულების დაგროვება კი შემდეგნაირადაა შესაძლებელი:

ასაკი

პრიორიტეტი ენიჭება სამუშაოსთვის შედარებით მაღალ წლებს.

  • 18-დან 21 წლამდე ასაკის პირი 6 ქულას მიიღებს;
  • 22-დან 25-მდე – 8 ქულას;
  • 26-დან 30 წლამდე – 10 ქულას.

30 წლისის ზემოთ, ქულები კვლავ იკლებს:

  • 31-დან 35-მდე – 8 ქულა;
  • 36-დან 40-მდე – 6 ქულა;
  • 41-დან 45-მდე – 4 ქულა;
  • 46-დან 50-მდე – 2 ქულა.

არასრულწლოვნები [18 წლამდე] და 50-ს გადაცილებულები, ასაკის მიხედვით, ვერცერთ ქულას მიიღებენ, თუმცა 50 წელს ზემოთ მყოფ პირებს აპლიკაციის შევსების უფლება აქვთ.

განათლება

რაც უფრო მეტი აკადემიური ხარისხი გაქვთ მიღებული, მით მაღალ ქულას მოიპოვებთ:

  • ამერიკის სასკოლო ატესტატი ან მისი უცხოური ექვივალენტი 1 ქულას უდრის;
  • უცხოური ბაკალავრიატის ხარისხი – 5 ქულა;
  • ამერიკაში მიღებული ბაკალავრის ხარისხი – 6 ქულა;
  • უცხოური მაგისტრატურის დიპლომი STEM-ის [მეცნიერება, ტექნოლოგია, ინჟინერია, მათემატიკა] სფეროში – 7 ქულა;
  • ამერიკაში მოპოვებული მაგისტრის ხარისხი – 8 ქულა;
  • უცხოეთში მიღებული დოქტორანტის ხარისხი – 10 ქულა;
  • ამერიკაში მიღებული დოქტორანტის ხარისხი – 13 ქულა.

ინგლისური ენის ცოდნა

ქულები გენიჭება ინგლისური ენის კარგად ფლობის შემთხვევაშიც, რაც ინგლისური ენის სტანდარტული ტესტით გამოითვლება.

  • ის, ვინც ტესტის პასუხებში 60%-ზე ნაკლებ სწორ პასუხს დააგროვებს, ვერცერთ ქულას მიიღებს.
  • 80% სწორი პასუხები – 6 ქულა;
  • 80-დან 90 პროცენტამდე სწორი პასუხები – 10 ქულა;
  • 90%-იანი სიზუსტე – 11 ქულა;
  • 100%-ით სწორი პასუხები – 12 ქულა.

სამსახურის შემოთავაზება

ამ შემთხვევაში, ქულებზე გავლენას ამერიკაში შეთავაზებული ანაზღაურების სამშობლოში არსებულ ხელფასთან მიმართება განსაზღვრავს.

  • შენი ქვეყნის ხელფასის 150%-ის შეთავაზების შემთხვევაში – 5 ქულა;
  • 200%-ის შემთხვევაში – 8 ქულა;
  • 300%-ის შემთხვევაში – 13 ქულა.

ნობელის პრიზი

არსებობს ბონუს ქულები ექსტრაორდინალური მიღწევებისთვის. ნობელის პრიზის ან “მსგავსის” ქონის შემთხვევაში, 25 ქულას მიიღებთ.

ოლიმპიური მედალი

15 ქულა ყველას, ვისაც ოლიმპიური მედალი აქვს პირადად მიღებული, ან დაჯილდოებულია ოლიმპიადასთან ახლოს მყოფ სპორტულ საერთაშორისო კონკურსებზე.

ინვესტორები

კანონი აუქმებს იმ კატეგორიის ვიზებს, რომლებიც ამერიკაში უცხოელ ინვესტორებს ახალისებდა. ესაა EB-5 პროგრამა, რომელიც ტრამპის სიძის, ჯარედ კუშნერის, ოჯახმა გამოიყენა ამერიკაში ბიზნესის საწარმოებლად.

ამ კონცეფციით, 6 ქულას მიიღებს ის აპლიკანტი, რომელიც 1,35 მილიონი აშშ დოლარის ინვესტიციას ჩადებს ამერიკაში ახალი კომერციული საწარმოს შესაქმნელად.

1,8 მილიონი აშშ დოლარის ინვესტიციის შემთხვევაში, ქულები 12-მდე იზრდება.

მეუღლეები/პარტნიორი

კანონის მიხედვით, აპლიკანტებმა, რომლებსაც სურთ მეუღლის/პარტნიორის თან წაყვანა, მათი ქულებიც იგივე სისტემით უნდა გამოთვალონ.

on.ge

დატოვეთ კომენტარი

კომენტარები

Загрузка...