სუსის ცნობით, პანკისსა და თბილისში ჩატარებული სპეცოპერაციებისას დაკავებულთა კავშირი აჰმედ ჩატაევთან დადგენილია. გამოძიების პროცესში მოპოვებული მასალებით, ასევე მოწმეთა ჩვენებებით გამოძიების ამ ეტაპზე დადგენილია, რომ დაკავებულ პირებს კავშირი ჰქონდათ ბერი გაბრიელ სალოსის ქუჩაზე სპეცოპერაციის დროს ლიკვიდირებულ აჰმედ ჩატაევთან და ტერორიზმში ბრალდებული ჯგუფის სხვა წევრებთან.

ოპერატიული საგამოძიებო მოქმედებების შედეგად, ამოიღებულია ვიდეკადრები, რომლებშიც ჩანს თუ როგორ გადაადგილდებიან თბილისში აჰმედ ჩატაევის დაჯგუფების წევრები შოაიფ ბორზიევი და ასლანბეგ სოლტახმატოვი თემირლან მაჩალიკაშვილთან ერთად.

ბინიდან, რომელშიც აჰმედ ჩატაევი იმყოფებოდა, ამოღებულია თემირლან მაჩალიკაშვილის სახელზე გაფორმებული საბანკო ხელშეკრულება, რომელშიც ადგილობრივი საბანკო რეკვიზიტების გარდა მითითებულია სამი უცხოური ქვეყნის საბანკო რეკვიზიტები. სასამართლოს გადაწყვეტილებით ამ ეტაპზე მიმდინარეობს თემირლან მაჩალიკაშვილის საბანკო ანგარიშების შესწავლა.

ბრალის დამტკიცების შემთხვევაში დაკავებულებს 17-იდან 20 წლამდე პატიმრობა ემუქრებათ.

შეგახსენებთ, რომ თემირლან მაჩალიკაშვილი პანკისში სპეცოპერაციის დროს დაიჭრა. მისი ჯანმრთელობის მდგომარეობა მძიემა. საუბარი მის საზღვარგარეთ წაყვანასა და მკურნალობაზე. მაჩალიკაშვილის მშობლები და პანკისის უხუცესები აჰმედ ჩატაევთან და ტერორისტებთან მაჩალიკაშვილს კავშირს გამორიცხავენ.

პანკისსა და თბილისში ჩატარებული სპეცოპერაციის დროს სუსმა 5 პირი დააკავა. თბილისის საქალაქო სასამართლომ მათ პატიმრობა შეუფარდა.

ბრალდების მიხედვით, დაკავებულები, სავარაუდოდ, აჰმედ ჩატაევის მოკავშირეები იყვნენ, ისინი დაეხმარნენ ჩატაევს საქართველოს საზღვარზე გადმოსვლასა და თბილისში ბინის ქირაობაში, სადაც 21-22 ნოემბერს სპეცოპერაცია ჩატარდა.

სუსის ცნობით, დაკავებული პირები 21-22 ნოემბრის სპეცოპერაციის დროს მოკლულ ჯგუფთან ერთად, საქართველოსა და თურქეთში ტერაქტებს გეგმავდნენ. ასევე იგეგმებოდა თავდასხმები საქართველოში მომუშავე დიპლომატიურ კორპუსზე.

დატოვეთ კომენტარი

კომენტარები

Загрузка...