ადამიანის სისხლში ტყვიის შემცველობაზე, შესაძლოა, საქართველოს მასშტაბით 2018 წელს კვლევა ჩატარდეს. ამის შესახებ დაავადებათა კონტროლის ეროვნული ცენტრის ხელმძღვანელმა ამირან გამყრელიძემ განაცხადა.

ადამიანის სისხლში ტყვიის შემცველობა მას შემდეგ გახდა აქტუალური, რაც ქართულ სუნელებში ტყვიის შემცველობის შესახებ ინფორმაცია გავრცელდა. აღნიშნულ საკითხზე ინფორმაცია თავდავდაპირველად სააგენტო on.ge-მ გაავრცელა ამერიკის ჯანდაცვის დეპარტამენტზე დაყრდნობით, ბოლოს კი კვლევის შედეგები ტელეკომპანია “იმედმა“ შემოგვთავაზა, რომლის მიხედვით, სუნელებში 7, 8, 11, 24, 962, 2 742, 7 383, 8 502, 10 142 PPM აღმოჩნდა, მაშინ როცა მაგალითად, ტკბილეულში ტყვიის დასაშვები, უსაფრთხო ზღვარია 0,1 ppm.
განსხვავებულ მონაცემებზე საუბრობენ სურსათის ეროვნულ სააგენტოში. „აიპრესი“ ლაბორატორიული კვლევის ბოლო ოფიციალური მონაცემების გასარკვევად სურსათის ეროვნულ სააგენტოს დაუკავშირდა, სადაც გვითხრეს, რომ ბოლო მონაცემებით საქართველოს მასშტაბით აღებული 75 ნიმუშიდან უკვე გამოკვლეულია 55 ნიმუში, საიდანაც დარღვევა აღინიშნა მხოლოდ 4 შემთხვევაში. ეს ის 4 ნიმუშია, რომელზეც ინფორმაცია სეს-მა 7 ივლისს გაავრცელა. მაშინ ლაბორატოულად მხოლოდ 25 ნიმუში იყო შემოწმებული.
სუნელებში ტყვიის შემცველობასთან დაკავშირებით ტოქსიკოლოგი სოსო კუტუბიძეც საუბრობს.
“ტყვიით ქრონიკულმა მოწამვლამ შეიძლება გულსისხლძარღვთა პრობლემები, თავის ტვინის პათოლოგიები, სისხლის პათოლოგია შეიძლება გამოიწვიოს. ბავშვებში ბევრად უფრო რთულ შედეგებს იწვევს. მე არ მინდა პირდაპირ ესე ვთქვა, მაგრამ იგივე სისხლის პათოლოგიები ბავშვებზე უფრო მძიმედ მიმდინარეობს, უფრო ხშირად ეს ანემიაში გამოიხატება, შესაძლებელია მუტაციები გამოიწვიოს ორგანიზმში, საკმაოდ არასასიამოვნო ფაქტია.
ჩვენ ძალიან ხშირად შედეგებს ვნახულობთ, მაგალითად როცა ბავშვი ანემიით ხვდება საავადმყოფოში, ან ექიმთან. ძალიან იშვიათად რომ ადამიანმა კლინიკას მიმართოს ტყვიით მწვავე მოწამვლით, ძირითადად ადამიანები სხვადასხვა პათოლოგიური მდგომარეობით მოდიან, რომელსაც თავის დროზე ორგანიზმში ტყვიის ნელ-ნელა დაგროვება იწვევს. ადამიანი მწვავედ არ იწამლება, მისი მოწამვლა ხდება ქრონიკულად. აქ მარტო ტყვიაზე არ არის ლაპარაკი, ჩვენ გარემოსგან სხვა ტოქსინებსაც ვღებულობთ, იგივე პესტიციდებს სხვა რამეებს, გარემოს დაბიძნურება ყოველთვის იწვევს მსგავს პრობლემებს. ალბათ ერთ-ერთი მიზეზი ამ დაავადების შესაძლებელია იყოს ესეც და ალბათ ერთ-ერთი ხელშემწყობი არის ტყვიაც.
სისხლში ტყვიის შემცველობის გაზომვაზე ძირითადად სხვა ლაბორატორიები მუშაობენ, მაგრამ ხშირად მოდიან ადამიანები, რომლებსაც აქვთ სისხლში ტყვიის მაღალი შემცველობა, განსაკუთრებით ქსოვილებში. სტატისტიკა ნამდვილად არ მაქვს, მარტო მე არ ვსაზღვრავ… განსაკუთრებით ბავშვთა კლინიკები ძალიან ამახვილებენ ამაზე ყურადღებას. საკმაოდ არის ესეთი შემთხვევები, იმიტომ რომ გარემო პირობებიდან გამომდინარე ალბათ ბავშვებში განსაკუთრებით, იმიტომ რომ სათამაშოებში არის და ა.შ. და საკმაოდ მაღალია ტყვიის შემცველობა“,- აცხადებს სოსო კუტუბიძე.

სრული ვერსიის ნახვა ipress.ge

დატოვეთ კომენტარი

კომენტარები

Загрузка...