საქართველოს განათლებისა და მეცნიერების მინისტრის ინიციატივით, ახალი პროექტი – „ისწავლე მეტი თამაშით“ ამოქმედდება.

სამინისტროს ინფორმაციით, პროექტის ფარგლებში, სკოლებში სასწავლო პროცესის გახალისება და მოსწავლეთათვის სხვადასხვა საგნის განსხვავებულ ფორმატში სწავლების მიზნით, სამინისტრო დაინტერესებულია სკოლებში საგანმანათლებლო, ინტელექტუალური სამაგიდო თამაშების შეტანით და დანერგვით.

აღნიშნულ თემაზე ბრიფინგი დღეს, განათლებისა და მეცნიერების მინისტრის მოადგილემ თეიმურაზ მურღულიამ გამართა.

განათლებისა და მაცნიერების სამინისტროს განცხადევუთმ სამაგიდო თამაშები მოსწავლეს უვითარებს როგორც გუნდურობის შეგრძნებას, ასევე, ინდივიდუალურ სწრაფვას გამარჯვებისა და წარმატებისკენ, ამაღლებს მოსწავლეთა ინტერესს და მოტივაციას სწავლისადმი.

უწყების განცხადებით, პროექტის ფარგლებში, სამინისტრო განიხილავს თამაშების შეძენას და შეტანას ზოგადსაგანმანათლებლო დაწესებულების ყველა საფეხურზე.

განათლებისა და მეცნიერების სამინისტროს განცხადებით, სამაგიდო თამაში შემდეგ კრიტერიუმებს უნდა აკმაყოფილებდეს: იყოს აზარტული, გუნდურად ან ინდივიდუალურად სათამაშო; ავითარებდეს ლოგიკურ და კრიტიკულ აზროვნებას, არ იყოს დამოკიდებული ზეპირობაზე; მოწოდებულ იქნას შეკვეთიდან მაქსიმუმ 3 თვის ვადაში;  იყოს გათვლილი სკოლის მოსწავლეებსა და ახალგაზრდებზე; იყოს მარტივად აღსაქმელი, ფერადი. მყარი მასალის სპეციალური შესანახი შეფუთვით; სასურველია თამაში ავსებდეს ეროვნული სასწავლო გეგმით გათვალისწინებულ პროგრამას.

სამინისტრო დაინტერესებულ პირებს მიმართავს, სამაგიდო თამაშების კონცეფცია მიმდინარე წლის 10 აპრილამდე სამინისტროს ელექტრონულ ფოსტაზე tamashebi@mes.gov.ge მიაწოდონ.

დატოვეთ კომენტარი

კომენტარები

Загрузка...