„კმაყოფილებით ვხვდებით ამ ოპერაციას“ – ასეთი იყო თურქეთის საგარეო საქმეთა სამინისტროს განცხადება აშშ–ი კოალიციის მიერ სირიაზე მიტანილი სარაკეტო იერიშის შემდეგ. “ეს იყო საჭირო ოპერაცია” – მიიჩნევს საქართველოს საგარეო მინისტრი.

თურქეთის საგარეო უწყების განცხადებაში ნათქვამია: „აშშ–ის, საფრანგეთისა და დიდი ბრიტანეთის 14 აპრილის სამხედრო ოპერაციას სირიაში ასადის რეჟიმის წინააღმდეგ, ჩვენ განვიხილავთ, როგორც 7 აპრილს დუმაში ქიმიური იარაღის გამოყენების საპასუხო ქმედებას, რომელსაც მშვიდობიანი მოქალაქეების დაღუპვა გამოიწვია“.

საქართველოს პოზიცია

საქართველოს ვიცე-პრემიერი, საგარეო საქმეთა მინისტრი მიხეილ ჯანელიძე სირიაში აშშ-ის, დიდი ბრიტანეთისა და საფრანგეთის მხრიდან განხორციელებულ დარტყმას ტვიტერის ოფიციალურ გვერდზე გამოეხმაურა და მას “საჭირო ოპერაცია” უწოდა.

“აშშ-ის, ბრიტანეთისა და საფრანგეთის სარაკეტო დარტყმები სირიის ქიმიურ იარაღთან დაკავშირებულ ობიექტებზე იყო საჭირო და შესაბამისი პასუხი ქიმიური იარაღით უდანაშაულო მოსახლეობაზე მიტანილ იერიშზე. ქიმიური იარაღის გამოყენება არის მიუღებელი და დამნაშავეებმა უნდა აგონ პასუხი”, – აღნიშნულია მიხეილ ჯანელიძის განცხადებაში.

რუსეთის რეაქცია

თურქეთის რეაქციის საპირისპიროდ, რუსეთის პრეზიდენტმა ვლადიმირ პუტინმა განაცხადა, რომ სირიაში სამხედრო და სამოქალაქო ობიექტებზე სარაკეტო იერიშებით აშშ და მისი მოკავშირეები გაეროს წესდებას და საერთაშორისო სამართლის ნორმებს არღვევენ.

„აშშ–მა მისი მოკავშირეების მხარდაჭერით 14 აპრილს სირიის არაბულ რესპუბლიკაში სამხედრო და სამოქალაქო ობიექტებზე სარაკეტო დარტყმები განახორციელეს. გაეროს უშიშროების საბჭოს სანქციების გარეშე და საერთაშორისო სამართლის ნორმების დარღვევით განხორციელდა აგრესიის აქტი სუვერენული სახელმწიფოს წინააღმდეგ, რომელიც ტერორიზმთან ბრძოლის წინა ხაზზე იმყოფება“, – განაცხადა პუტინმა.

რუსეთის თავდაცვის სამინისტრო აცხადებს, რომ მოკავშირეების მიერ გაშვებული რაკეტების დიდი ნაწილი ჰაერშივე ჩამოაგდეს 30 წლის წინ საბჭოთა კავშირში წარმოებული ანტისარაკეტო სისტემების მეშვეობით, როგორებიცაა С-125, С-200, „ბუკი“ და „კვადრატი“.

სარაკეტო იერიში სირიაზე

კოალიციამ, აშშ–ის მეთაურობით, დამასკოსა და პროვინცია ჰომსზე იერიში მიიტანა. სირიის არმიის დანაკარგები ჯერ დასათვლელია, მაგრამ ცხადია, რომ რუსეთის ჰაერსაწინააღმდეგო თავდაცვის სისტემებთან შეჯახება არ მომხდარა.

პარასკევი–შაბათის ღამე, დილის 4 საათზე აშშ–ის პრეზიდენტმა დონალდ ტრამპმა სირიის დაბომბვის დაწყების შესახებ განცხადება გააკეთა. ამ ნაბიჯს ამერიკის პრეზიდენტი ქიმიური თავდასხმის საფრთხით ასაბუთებს, რომელსაც ბაშარ ასადის რეჟიმი ქალაქ დუმაში ამზადებდა.

„ამერიკელო თანამოქალაქენო, ცოტა ხნის წინ ვუბრძანე შეიარაღებულ ძალებს, ზუსტი დარტყმები მიიტანონ სირიაში იმ სამიზნეებზე, რომლებიც დიქტატორის ბაშარ ასადის ქიმიურ იარაღთან არიან დაკავშირებული“, – განაცხადა დონალდ ტრამპმა.

კოალიციის ერთ–ერთი სამიზნე იყო დამასკოს სამეცნიერო–ტექნოლოგიური ცენტრი, რომელშიც, დიდი ალბათობით, ქიმიური იარაღი იწარმოებოდა. ასევე დაიბომბა ქიმიური იარაღის ორი საწყობი ჰომსის პროვინციაში. მედიის ცნობით, დაბომბვის ობიექტი გახდა სირიის ეროვნული გვარდიის შტაბი, მეზას აეროპორტი დამასკოში და ად–დუმეირის აეროპორტი აღმოსავლეთ გუტაში.

შაბათის დილის 8 საათისთვის გავრცელდა ინფორმაცია, რომ მოკავშირეებმა სირიის მიმართულებით 30–დან 100–მდე ერთეული რაკეტა გაუშვეს. რამდენიმე მათგანმა მიზანს ვერ მიაღწია და ჩამოაგდეს.

პენტაგონის შეფმა ჯეიმს მეტისმა განაცხადა, რომ მიმდინარე სამხედრო ოპერაციაში ორჯერ მეტი რაკეტა გამოიყენეს, ვიდრე გასულ წელს, აპრილში ასადის სამხედრო აეროდრომის დაბომბვისას.

ამერიკის პრეზიდენტმა დონალდ ტრამპმა 9 აპრილს განაცხადა, რომ 24–48 საათის განმავლობაში მიიტანდა სარაკეტო იერიშს სირიაზე.

digest.ge

 

დატოვეთ კომენტარი

კომენტარები

Загрузка...