“ამ საღამოს სასწრაფომ „უძვირფასესი” დრო გამატარებინა:

11-ის წუთებზე 112-ის სამსახურში დავრეკე, რადგანაც ჩემს ძმას ალერგიული შეტევა დაეწყო. ოპერატორმა მიპასუხა, – ბრიგადა მალე ვერ მოვაო; მაგრამ რას წარმოვიდგენდი, რომ 2 საათი ლოდინი დაგვჭირდებოდა, თან, ამ პერიოდის მანძილზე რამდენჯერმე 112-ში გადარეკვა და მათ მოლოდინში, ძირითადად, ქუჩაში დგომა.
ამასობაში გაირკვა,რომ ჩვენს მეზობელსაც გამოეძახებინა სასწრაფო, ბებია გახდომია ცუდად და ისიც ქუჩაში იყო გამოსული…
2 საათის შემდეგ, როგორღაც მოვიდნენ, ჯერ მეზობელთან შევიდნენ, შემდეგ – ჩვენთან. თქვენზე წინ გადაუდებელი შემთხვევები იყო და ამიტომ დავაგვიანეთო. მესმის და მჯერა, რომ გადაუდებელ პაციენტებთან იყვნენ და ჩენზე წინ ისინი დააყენეს, მაგრამ რა დავაშავეთ ჩვენ?! (2 საათში ხომ შეიძლება პაციენტს სერიოზულად გაურთულდეს მდგომარეობა?!) ამ საღამოს ისიც გავარკვიე, რომ თურმე სასწრაფო ავადმყოფთან მისვლას ხანდახან 2 საათზე მეტიც აგვიანდება, მაგალითად, 6 საათი.
თბილისს სულ 80 მანქანა ემსახურება, ჩუღურეთს, ანუ ჩვენს რაიონს – 10.
თუკი ასეთი ინტერვალებით დადიან სასწრაფოს ბრიგადები, გამოდის, ეს 80 მანქანა არ არის საკმარისი დედაქალაქისთვის. ან როგორ ეყოფა, ამ „ძვირფასი” ცხოვრებისგან დაავადმყოფებულ-დანევროზებულ საზოგადოებას?!
თქვე, დალოცვილებო, ადექით და დაამატეთ ეს ბრიგადები, დაამატეთ!!! რაღაცაში მაინც დაეხმარეთ და გამოადექით ხალხს…“

ჟურნალისტ ლალი ფაციას გუშინ გამოქვეყნებულ ამ ფეისბუქსტატუსს, არაერთი გამოხმაურება მოჰყვა. სტატუსის კომენტარებშიც, სასწრაფოს დაგვიანებებზეა საუბარი:

„სასწრაფოს პასუხი მეცნო. რამდენიმე დღის წინ ავად გავხდი, ძალიან ცუდად ვიყავი და იგივე გვიპასუხეს. მეზობელი კორპუსიდან მოვიყვანეთ ნაცნობი ექიმი და მან გადამარჩინა. სამაგიეროდ პ.ს. ორი საათის შემდეგ მოვიდნენ, გამიღიმეს, კარგია უკეთ რომ ხარო და წავიდნენ. სასწრაფო სიკვდილია, აბა რა არის?!“

„საღამოს 7-ის ნახევარზე რომ გამოიძახებ, ბავშვს რომ 40.3 აქვს სიცხე და ღამის 2-ზე გააუქმებ გამოძახებას, ეგ როგორია?“

„ჩემმა მეგობარმა გამოიძახა რამდენიმე დღის წინ 10 საათზე, ღამე, მასაც უპასუხეს დაგვაგვიანდებაო და მერე შუაღამის პირველ საათზე თვითონვე გადმოურეკეს, მოვიდეთ თუ არა, კიდევ გჭირდებითო?“

„სასწრაფო დახმარება კი არა, დაგვიანებული დახმარება უნდა ერქვას… თან 1000000 უაზრო კითხვას რომ სვამენ… სამსახურში ექიმები რომ არ გვყოლოდნენ, ერთ-ერთი თანამშრომელი ალბათ ხელიდან გამოგვეცლებოდა.“

„მერიაააა, სასწრაფოო, წაიკითხეეეეეთ ეს სტატუსი და კომენტარები……მათი პიარი სად არის?! არ გეგონოთ, რომ ყველაფერი კარგადაა ან ვინმეს სჯერა, რომ მართლა ვირუსიანებთან თავქუდმოგლეჯილები დარბიხართ და ამიტომ აგვიანებთ.“

„ეს თემა მისახედია!!!!“

თბილისის მერიამ და მის დაქვემდებარებაში მყოფმა სასწრაფო დახმარების სამსახურმა თუ აქამდე არ იცოდა საზოგადოების განწყობა მათ დაგვიანებებზე, ახლა ხომ იციან და სანამ ჟურნალისტები დავიწყებთ არსებული მდგომარეობის „მოგვარებას“, იმედს ვიტოვებთ, რომ თავადვე გამოასწორებენ!

წყარო: postalioni.com

დატოვეთ კომენტარი

კომენტარები

Загрузка...