მტკვრის ორივე სანაპირო, აღმაშენებლის ხეივანი, კახეთის გზატკეცილი, ბელიაშვილის ქუჩა, კოსტავას ქუჩა, წერეთლის გამზირი – ეს დედაქალაქში ის მონაკვეთებია, სადაც ყველაზე მეტი ავარია ხდება.

ცხადია, ეს იმას არ ნიშნავს, რომ დედაქალაქის სხვა ადგილებში ავარია არ ხდება და ასეთი შემთხვევები მხოლოდ ამ მონაკვეთებზეა.  პრობლემა ის არის, რომ აქ ყველაზე ხშირად ხდება  ავარიები  და თანაც, უმეტესად, კონკრეტულ წერტილებში.
სწორედ იმის გამო, რომ  დედაქალაქში ე.წ. შავი წერტილები  არსებობს, სპეციალისტები  ყველაზე მნიშვნელოვნად ამ სახიფათო  ადგილების მიზეზების დადგენას ასახელებენ.
როგორც „ფორტუნას“ შსს-ში განუცხადეს,  ამ პრობლემურ  მონაკვეთებზე  მომხდარი ავარიის მიზეზებიდან პირველ ადგილზეა მანევრირების წესების დარღვევა, მეორეზე – მოძრაობის დადგენილი სიჩქარის გადაჭარბება  ხოლო მესამეზე საავტომობილო საშუალების ნასვამ მდგომარეობაში მართვა.
ფორტუნასთან“   საქართველოს ტრანსპორტისა და გზების ასოციაციის პრეზიდენტმა, დავით მესხიშვილმა, განაცხადა,  რომ პრობლემის მოსაგვარებლად ძირეული ცვლილებების გატარებაა საჭირო.
“პირველ რიგში, უნდა შეიქმნას სტრუქტურა, რომელიც შეიმუშავებს საგზაო უსაფრთხოების სტრატეგიას და პასუხისმგებელი იქნება ქვეყანაში ევროპული მითითებების დანერგვაზე. ამ სტრუქტურის პრიორიტეტებში ასევე უნდა შედიოდეს ასოცირების ხელშეკრულებაში არსებული პუნქტების შესრულება,” –  ამბობს მესხიშვილი.
მან ასევე ხაზი გაუსვა ე.წ. “შავი წერტილების” დადგენის მნიშვნელობას.
“გარდა სტატისტიკაში მოყვანილი ადგილებისა, თბილისში სხვა არაერთი ცხელი წერტილი არსებობს, მათ შორის ბელიაშვილის ქუჩა, კოსტავას ქუჩა, წერეთლის გამზირი და სხვა არაერთი. სწორედ ამიტომ აუცილებელია, დადგინდეს „შავი წერტილები“ მთელი ქვეყნის მასშტაბით. ასევე საჭიროა, გატარდეს პრევენციული ღონისძიებები. ავტოსაგზაო შემთხვევების გამომწვევი ძირითადი მიზეზები შესწავლილი უნდა იქნას კომისიური წესით სხვადასხვა დარგის ექსპერტების ჩართულობით,”  – განაცხადა მესხიშვილმა.

წყარო: digest.pia.ge

დატოვეთ კომენტარი

კომენტარები

Загрузка...