რუსეთის ფედერაცია ტექნიკურად მზად არის მსოფლიო ინტერნეტიდან გასათიშად, თუმცა პროცესი უმტკივნეულო ვერ იქნება.

ამის შესეხებ ტელეკომპანია „ენ–ტე–ვეს“ ეთერში რუსეთის პრეზიდენტის თანაშემწემ ინტერნეტის განვითარების საკითხებში გერმან კლიმენკომ განაცხადა.

მისი თქმით, ინტერნეტის რუსული სეგმენტი, რომელიც პრეზიდენტი პუტინის განკარგულებით უშუალოდ მაღალჩინოსნებისთვის შეიქმნა, უკვე მუშაობს.

კლიმენკომ ასევე აღნშნა, რომ მთელი მსოფლიო ინტერნეტის რეგულირების მიმართულებით მიდის და ამ მხრივ „არც რუსეთია გამონაკლისი“. თუმცა, პუტინის მრჩეველმა ისიც აღნიშნა, რომ ქვეყნის ხელისუფლება არ მიმართავს „ექსტრემალურ ვარიანტებს, როგორც ეს ხდება ჩრდილოეთ კორეასა და კუბაზე“.

„კავშირგაბმულობის შესახებ“ კანონში ცვლილებების შემუშავება, რომელიც მომავალში სახელმწიფოს რუნეტის ინფრასტრუქტურის კონტროლის შესაძლებლობას მისცემს, ვლადიმირ პუტინის განკარგულებით უნდა მომზადდეს. ოქტომბერში ფინანსთა სამინისტრო უარყოფითად გამოეხმაურა კანონპროექტს, რომლის დანიშნულებაც რუნეტის საგარეო საფრთხეებისგან დაცვას ითვალისწინებს. სამინისტროს უარის საფუძველი ის გახდა, რომ არ არსებობდა ინფორმაცია ხარჯებზე, რომლებიც პროექტის რეალიზაციისთვის იყო საჭირო.

„ციფრული ეკონომიკის“ პროგრამის პროექტის თანახმად, რომელიც ასევე პუტინის განკარგულებით შეიმუშავეს რუსეთში, 2024 წლისთვის მთელი ციფრული ტრაფიკის 95% რუსულ ქსელებზე უნდა გადიოდეს. სახელმწიფო ორგანოებში უცხოური მოწყობილობების წილის მოცულობას 50%–ით შეამცირებენ, ხოლო უცხოური პროგრამული უზრუნველყოფის წილს 10%–მდე დაიყვანენ. გარდა ამისა, 2018 წელს უნდა ამუშავდეს სისტემა, რომელიც რუნეტის „მდგრადობასა და უსაფრთხოებას“ უზრუნველყოფს.

საერთაშორისო უფლებადამცველი ორგანიზაციის „აგორა“ მონაცემებით, 2017 წელს რუსეთში ინტერნეტში თავისუფალი წვდომის შეზღუდვის დაახლოებით 100 ათასი ფაქტი დაფიქსირდა. საშუალოდ, დღეში რუსეთში 244 ვებგვერდი იბლოკებოდა, ხოლო ყოველ 6 დღეში ერთხელ მომხმარებლებს ძალოვანი უწყებების წარმომადგენლები ან ემუქრებოდნენ, ან თავს ესხმოდნენ, აღნიშნავენ უფლებადამცველები.

მ2ბ

დატოვეთ კომენტარი

კომენტარები

Загрузка...