მიუხედავად იმისა, რომ ამინდი ხშირად იცვლება და წვიმაც „დაუპატიჟებელი სტუმარი“ გახდა, დასვენების სეზონი მაინც დაიწყო. ყველას სურს, თუნდაც რამდენიმე დღით, მოწყდეს ყოველდღიურობას და განიტვირთოს. ზოგი ზღვაზე მიდის, ზოგი მთას აფარებს თავს, ზოგიც უცხოეთის „ფეშენ“ კურორტებზე მიემგზავრება დასასვენებლად და გასართობად. უცხოელებს კი საქართველო ხიბლავთ და უნდათ, რომ ცხელი ზაფხული ჩვენს ქვეყანაში გაატარონ. როგორც ამბობენ, ამ მხრივ, წელს საკმაოდ კარგი მდგომარეობაა და სეზონზე ტურისტების დიდი ნაკადსაც ელოდებიან.

საინტერესოა, რომელ კურორტებს გვირჩევენ ტურისტული კომპანიები, იაფად და კარგად რომ დავისვენოთ? ამ საკითხზე სასაუბროდ ტურისტული კომპანიის „ტოტალ-თრეველის“ დირექტორს, მეგი თაგორაშვილს დავუკავშირდით.

მეგი თაგორაშვილი:

_ საქართველოში ძირითადად გვაქვს კომბინირებული ტურები, ამიტომ მხოლოდ ზღვაზე, ან მხოლოდ მთაში არ ჩამოდიან უცხოელი ტურისტები. ისინი ძირითადად ირჩევენ კომბინირებულ ტურებს, მაგალითად თბილისი-მცხეთა-ყაზბეგი, 2-3 დღის მერე კი მიდიან ქობულეთისკენ და ბათუმისკენ. ეს უფრო რუსი ტურისტების მარშუტებია. რაც შეეხება არაბებსა და აღმოსავლეთის ქვეყნების წარმომადგენლებს, მათ უნდათ საქართველოს დათვალიერება და შემეცნებითი ინფორმაციის მიღება.

_ რომელი ქვეყნიდან ელოდებით ტურისტების დიდ ნაკადს?

_ ამ სეზონზე უფრო მეტი ტურისტი არის რუსეთიდან. არის შემთხვევები, როცა ისინი თავად ჩამოდიან თბილისში და მერე მოდიან კომპანიაში. თუმცა რუსები უფრო დამოუკიდებლად დადიან. ევროპიდან ჩამოსულ ტურისტები 2-3 თვით ადრე გეგმავენ ტურებს. წინასწარ ვიცით, სად მიდიან ისინი, ამიტომ მთლიანად მომზადებული ვხვდებით და მაქსიმალურ კომფორტს ვთავაზობთ. ასევე იქცევიან არაბებიც _ ისინიც წინასწარ გვიკავშირდებიან.

_ ადგილობრივი ტურისტები, საქართველოს მოქალაქეები სად უფრო ამჯობინებენ დასვენებას?

_ წელს მოთხოვნადია ევროპის კურორტები, განსაკუთრებით ზღვისპირეთი. მაგალითად ყველაზე მეტად აინტერესებთ ბარსელონა -კოსტრასტრავა, მაგრამ იქ დასვენება მაინც სოლიდურ ფინანსებთან არის დაკავშირებული, ამიტომ უმეტესობა თურქეთში მიემგზავრება. საკმაოდ აქტუალური გახდა ეგვიპტეც. საბერძნეთში უფრო მაღალბიუჯეტიანი დამსვენებლები მიდიან და ისიც ყველა სეზონზე აქტუალურია.

_ რა თანხებთან იქნება დაკავშირებული დასვენება საქართველოში და მის ფარგლებს გარეთ?

_ უცხოელ ტორისტებს ჩვენს ქვეყანაში დასვენება უფრო ძვირი უჯდებათ, ვიდრე ქართველებს, რომლებიც საზღვარგარეთ მიდიან. ყველაზე ეკონომიური, კომბინირებული ტური რაც შეიძლება საქართველოში, სეზონზე დაიგეგმოს, მინიმუმ 700-800 დოლარი ღირს. ამ სერვისში შედის დაბალი კლასის სასტუმროები, ტრანსპორტირება, გიდის მომსახურება და საუზმე. უფრო მაღალი კლასის სასტუმროს დაჯავშნის შემთხვევაში, დასვენება 1000 დოლარზე მეტი გამოდის, მაგრამ რომ გითხრათ, კმაყოფილები არიან სასტუმროების მომსახურეობით მეთქი, მოგატყუებთ. ისინი ხშირად არღვევენ შეთანხმებებს ტურისტულ კომპანიებთან. საქართველოში სასტუმროებს კარგი მომსახურეობა არ აქვთ, თუმცა ისეთი სასტუმროებიც არის, რომლებიც არ არღვევენ შეთანხმებას ტურისტულ კომპანიასთან და თანამშრომლობაც ნაყოფიერი გამოდის. საქართველოდან გასულ დამსვენებლებს იმავე კატეგორიის სასტუმროში, საზღვარგარეთ, გაცილებით იაფი უჯდება. მაგალითისთვის, თურქეთში, სამვარსკვლავიან სასტუმროში დასვენებას 300-350 დოლარადაც მოახერხებს. უფრო მაღალი დონის სასტუმროებში კი ტურები იწყება 500 დოლარიდან. ეს არის შვიდდღიანი ტურები. 500 დოლარად საქართველოში ჩამოსული ტურისტი იმ სერვისს ვერ მიიღებს, როგორსაც მიიღებს საქართველოდან გასული ტურისტი.

_ წელს საქართველოში ხშირად წვიმს, რაც ალბათ დამსვენებლების მოზიდვას ხელს უშლის. ასეთ შემთხვევაში რას ურჩევთ დასვენების მსურველებს?

_ როცა ტურისტებს წვიმიანი ამინდები ხვდებათ, ისინი ამატებენ დღეებს და ელოდებიან მზეს. ზოგიერთი სასტუმრო ასეთ დროს ფასდაკლებას აკეთებს. უცხოეთში დასვენების მსურველ თანამემამულეებს შემიძლია ვურჩიო, რომ თურქეთში დაისვენონ ივლისის შუა რიცხვებამდე, ან აგვისტოს ბოლოდან სექტემბრის განმავლობაში, ანუ „ბარხატის სეზონზე“. ამ დროს იქ ყველა პირობა არსებობს იდეალური დასვენებისთვის. ივლის-აგვისტოში ტემპერატურა მატულობს, ხშირად 50 გრადუსამდეც ადის და მხოლოდ დილით ან საღამოს არის დასვენება და გართობა მოსახერხებელი. ასევეა ეგვიპტეშიც. რაც შეეხება საბერძნეთს და ევროპის კურორტებს, იქ დასვენება ნებისმიერ დროს არის შესაძლებელი, რადგან ზომიერი კლიმატია და მთელი ზაფხულის განმავლობაში მშვენიერი ამინდებია.

წყარო: postalioni.com

დატოვეთ კომენტარი

კომენტარები

Загрузка...