ჰოლივუდის ვარსკვლავის, ორლანდო ბლუმის და ქართველი პიანისტის, ხატია ბუნიათიშვილის რომანის შესახებ მსოფლიო პრესა კვლავ წერს. სკანდალი მას შემდეგ აგორდა, რაც ვარსკვლავი პაპარაცებმა პარიზის ქუჩებში შენიშნეს, სადაც ის მომხიბლავ უცნობ ქალთან ერთად სეირნობდა.

პაპარაცული ფოტოების გავრცელების შემდეგ, პრესა და ბლუმის ფანები არკვევდნენ, თუ ვინ იყო “ამოუცნობი, შავთმიანი, მისტიკური ქალბატონი”, ქართველებმა კი ფოტოებზე მაშინვე შენიშნეს, რომ ჰოლივუდის ვარსკვლავთან მოსეირნე ლამაზმანი ქართველი პიანისტი ხატია ბუნიათიშვილია. ფოტოებიდან ჩანს, რომ ბლუმსა და უცნობ ქალბატონს საკმაოდ თბილი ურთიერთობები აქვთ – ქალი მას რამდენჯერმე ეხუტება, თავზე ეხება და თმას უსწორებს.

პრესა იმასაც წერს, რომ როგორც კი ბლუმმა და ხატიამ დაინახეს, რომ პაპარაცები უღებდნენ, სასწრაფოდ ტაქსი დაიჭირეს და ადგილს გაეცალნენ. აღსანიშნავია, რომ მოგვიანებით, ორლანდო ბლუმმა პაპარაცების მიერ გადაღებული ეს ფოტოები საკუთარ ინსტაგრამზე თავად გააზიარა. როგორც ჩანს, ფოტოები ძალიან მოეწონა..

უცხოური გამოცემების ცნობით, რაც ორლანდო ბლუმი და კეტი პერი ერთმანეთს დაშორდნენ, მსახიობს სხვადასხვა რომანებს მიაწერდნენ. უნდა ითქვას, რომ ბლუმი პრესას თავად აძლევდა ჭორაობის საბაბს – ის ყოველ კვირას ახალ-ახალ ლამაზმანთან ერთად ისვენებდა. ამჟამად ის პარიზში ქართველ პიანისტთან, ხატია ბუნიათიშვილთან ერთად შენიშნეს. ახალგაზრდები ქალაქში ხელჩაკიდებულები სეირნობდნენ, ფლირტაობდნენ და იცინოდნენ.

ორლანდო ბლუმის თაყვანისმცემლები დარწმუნებულები არიან, რომ მათ შორის სერიოზული არაფერია, თუმცა, პრესა მსახიობის ახლობლებზე დაყრდნობით წერს, რომ ბლუმს ამჯერად მართლა შეუყვარდა და ეს სიყვარული ქართველი პიანისტი ქალია. ასე რომ, როგორც პრესა წერს, ყველაფერი ნამდვილად სერიოზულად არის და 40 წლის ორლანდო ბლუმი 30 წლის ქართველ პიანისტზეა შეყვარებული.

“Elle” ხატია ბუნიათიშვილის და ორლანდო ბლუმის გაცნობის დეტალებზე წერს. გამოცემის ინფორმაციით, ხატიამ და ორლანდომ ერთმანეთი ერთ პრივატულ, მაღალი დონის წვეულებაზე გაიცნეს. გოგონა ამჟამად ევროპაში გასტროლებით იმყოფება და ბლუმმა გადაწყვიტა სიყვარულის ქალაქში მისთვის კომპანია გაეწია.

უცხოური გამოცემები წერენ, რომ ხატია ბუნიათიშვილი მსოფლიოს ერთ-ერთ ყველაზე გენიალურ პიანისტად ითვლება. ხატია ბათუმში დაიბადა და ბავშვობიდან მუსიკით იყო გატაცებული. მან პირველად 6 წლის ასაკში ჩაატარა კონცერტი კამერულ ორკესტრთან ერთად, 10 წლისა კი მსოფლიო ტურნეში გაემგზავრა. 2012 წელს ბუნიათიშვილი Echo Klassik Awards-ის საუკეთესო ახალბედა პიანისტად აღიარეს, ოთხი წლის შემდეგ კი, ის წლის საუკეთესო მუსიკოსი გახდა ფრანგული ტელეარხის, TF1-ის მიხედვით.

უცხოური პრესა იმასაც წერს, რომ აქამდე ხატიას პირადი ცხოვრების შესახებ არაფერი იყო ცნობილი. ხმამაღალ სასიყვარულო სკანდალებში ქართველი პიანისტი შემჩნეული არ ყოფილა – თავისი სიყვარული მან მუსიკას მიუძღვნა. ხატია ხუთ უცხო ენაზე საუბრობს, მას ხშირად მოიხსენებიებენ გენიად ან ვუნდერკინდად, თუმცა, თავად მუსიკოსი თავმდაბლობით გამოირჩევა.

ორლანდო ბლუმის თაყვანისმცემლები სოციალურ ქსელში ხუმრობენ, რომ კეტი პერისთან რომანის შემდეგ, ბლუმი კლასიკურმა მუსიკამ გაიტაცა.

დატოვეთ კომენტარი

კომენტარები

Загрузка...