მცხეთის დამოუკიდებელი მაჟორიტარობის კანდიდატი ცეზარ ჩოჩელი „ქართული ოცნების“ კანდიდატთან დიმიტრი ხუნდაძესთან სატელევიზიო დებატებში სერიოზული მარცხის შემდეგ, როგორც ჩანს, ხისტ პოლიტიკას ირჩევს და მისი პირადი გვერდი ხუნდაძის მიმართ ბილწსიტყვაობით არის აჭრელებული.რაც შეეხება დიმიტრი ხუნდაძის გვერდს, აშკარაა, მისი მხარდამჭერები პირველ გამარჯვებას ზეიმობენ. სწორედ, ორივე კანდიდატის მხარდამჭერების დებატებს შორის გამოიკვეთა ერთი მნიშვნელოვანი ფაქტი, თურმე წეროვნის დევნილებს ჩოჩელი აშინებს, თუ ხმას არ მომცემთ, ჩემთან დასაქმებულ პირებს სამსახურიდან გაგიშვებთო. ჩვენ დავინტერესდით ამ ფაქტით და წეროვნის დევნილებს ვესტუმრეთ.

საინტერესოა ის ფაქტი, რომ ახალგორის დევნილებში შიში მართლაც შეინიშნება. რამდენიმე ოჯახში ამ თემაზე სასაუბროდ არც მიგვიღეს. გასაკვირი ის არის, რომ ახალგორელებს ნაცმოძრაობის რეჟიმის გავლენა დღესაც ეტყობა. „ქართულმა ოცნებამ“ დევნილებს ეს შიში ვერ მოუხსნა. თუმცა, რამდენიმე მათგანი მაინც გაგვეხსნა და ამ თემაზე გვესაუბრა. ეს პიროვნება კომპანია „ზედაზენის“ მუშა აღმოჩნდა და მთელი გულისტკივილით მოგვიყვა ყველაფერი. გთავაზობთ მასთან ჩაწერილ ინტერვიუს (ვინაობას მისივე ინტერესებიდან გამომდინარე არ ვასახელებთ):

_ „ჩვენს დასახლებაში ცხოვრობენ ცეზარ ჩოჩელის მშობლები. სწორედ მათი იმედი აქვს ჩოჩელს, რადგან მამამისი  დადის ძველ  ჩინოვნიკებთან ერთად და ჩვენ გვამოწმებს, ვინ რას ვიტყვით დიმიტრი ხუნდაძეზე. მათ ჰგონიათ, რომ მთელი წეროვანი მათია, არადა, ასე არ არის. მათ მართლაც ჰყავთ ბევრი მხარდამჭერი, მაგრამ, არანაკლები ჰყავს დიმიტრი ხუნდაძეს. ჩოჩელის ძირითადი მხარდამჭერები არიან მის კომპანიებში დასაქმებული პირები. ზოგი მართლა უჭერს მხარს, ზოგიც კიდევ იძულებით. მოსახლეობაში დადიან წარმოების უფროსები და თავიანთ მუშებს აღრიცხავენ. ბევრი ეუბნება, რომ მათი მხარდამჭერია, მაგრამ ეს სიმართლე არ არის. მათ სიებში მეც ვარ, მაგრამ ხმას ოცნებას და ხუნდაძეს ვაძლევ. ჩოჩელმა შეიძლება სწორედ მის მუშებში წააგოს. იცით რატომ?

რატომ? ასეთი დარწმუნებული საიდან ხართ?

– მე ვიცი ახლგორელების განწყობა. ცეზარ ჩოჩელი ჩვენ სამუშაო ადგილებს გვამადლის. სხვა უფრო წარმატებული ბიზნესმენებიც ქმნიან სამუშაო ადგილებს, მაგრამ ამდენი არავის უყვირია. რა არის ამაში დასამადლებელი? ბიზნესმენის უპირველესი დაინტერესება პირადი მოგებაა. ის მილიონებს ჩვენს გარეშე ვერ იშოვის. ჩვენი ხელფასები  300-400 ლარამდეა, მხოლოდ სეზონზე 600 ლარს აღწევს 5 თვის მანძილზე. შრომა კი თითოეულ მუშას ჯოჯოხეთური გვაქვს. მითხარით, ეს დასამადლებელია? ახლა კლიპები გაუკეთებია, რომ ის საუკეთესო ბიზნესმენია და ათასობით კაცი დაასაქმა.  ამისთვის  მადლობას ნურავისგან ნუ ელის, რადგან ვერ გამდიდრდება ჩვენს გარეშე. მისნაირი ბიზნესმენები ჩვენ კაპიკებს გვიხდიან დღედაღამ შრომაში და თვითონ ფუფუნებაში ცხოვრობენ. ხალხის ნაძარცვი ფულით ყველა შექმნიდა ბიზნესს. აგერ, გაუყიდია მთელი მცხეთის მიწები. თქვენ იცით რა ღირს მიწები მცხეთაში?  ასობით მილიონი ლარისაა. ამ ფულებით ბიზნესი გააკეთა და ახლა კიდევ ჩვენ გვამადლის სამუშაო ადგილებს.  ხალხის დასაქმება მისი კეთილი ნება არ არის, ეს მისი ვალდებულებაა.

 _ რატომ, ეს ფული ხომ თქვენს ოჯახებში შემოდის? სიმართლე გითხრათ, პირველად მესმის ასეთი რამ…

_ კი, ჩვენს ოჯახებში შემოდის, მაგრამ ამას არ უნდა გვამადლიდეს. გინახავთ ნებისმიერი წარმოება და ბიზნესი მუშების გარეშე. ვინ შეუქმნის პროდუქტს? ჩვენგან ბევრს ორ-ორი დიპლომი აქვს, მაგრამ ფიზიკურად ვმუშაობთ ჩვენი ოჯახების გამო. დადიან წარმოების უფროსები ჩოჩელის სახელით და გვაშინებენ, თუ ხმას მას არ მივცემთ, სამსახურებს დაგვატოვებინებენ. ადრე მართლაც შინდებოდნენ ნაცების პერიოდში, თუმცა, წეროვანში ჯერ კიდევ ნაცმოძრაობის ხანაა. დამიჯერეთ, ჩოჩელს მაინც ტყუილა აქვს ახალგორელების იმედი, ის სწორედ ჩვენით წააგებს“.

ამ მოსაზრებაზე წეროვანში სხვა ახალგორელებიც ვნახეთ. გამომდინარე იქედან, რომ მათში ჯერ კიდევ არის სერიოზული შიში, ჩვენც აღარ ჩავეძიეთ. იმედი გავქვს, ცოტა ხანში კიდევ უფრო გაიხსნებიან და მეტ ინფორმაციას მოგვცემენ. ისინი გაბრაზებული არიან არა მხოლოდ ჩოჩელზე, არამედ ხუნდაძეზეც. ხუნდაძე ხელისუფლების წარმომადგენელია და როგორც გაირკვა, ახალგორელებს ბევრჯერ უთხოვიათ მათი გამგებლის, ნუგზარ თინიკაშვილის და მისი თანამოაზრეების მოხსნა, მაგრამ, უშედეგოდ.  ამას ისიც ემატება, რომ მათივე თქმით, თინიკაშვილიხალხში დადის და ეუბნება, ხმა ოცნებას და ცეზარ ჩოჩელს უნდა მისცეთო. ამ საკითხზე კომენტარი ვთხოვეთ დიმიტრი ხუნდაძეს, მაგრამ მან ამ ეტაპზე თავი შეიკავა, თუმცა, უარი არ უთქვამს ინტერვიუზე. გამომდინარე იქედან, რომ ხუნდაძე ფაქტების გარეშე არასოდეს საუბრობს, საინტერესოა, რა ფაქტებს გამოაშკარავებს იგი ახლა უკვე წეროვნის გამგეობასა და საკრებულოზე?

წყარო: postalioni.com

დატოვეთ კომენტარი

კომენტარები

Загрузка...