უხვმა ნალექმა ქვეყნის მასშტაბით პრობლემები შექმნა. ამ დროისთვის რთული ვითარებაა რუსთავში. ქალაქის შესასვლელი ისევ დაიტბორა. მოძრაობა შეფერხებულია ავტობაზრობის მიმდებარე ტერიტორიაზე.

ძლიერი წვიმის გამო თბილისში, ამაშუკელის ქუჩაზე მდებარე ერთ-ერთი საცხოვრებელი კორპუსიდან მოსხლეობა გაიყვანეს. სანიაღვრე არხი წყლის დიდი ნაკადის გამო ჩაიხერგა, წყალი კი საცხოვრებელი კორპუსის მიწისქვეშა ავტოსადგომში შევარდა. ადგილზე მთელი ღამის განმავლობაში მუშაობდნენ საგანგებო სიტუაციების მართვისა და სამაშველო დახმარების სამსახურები. მათ შენობისკენ მიმავალ წყალს მიმართულება შეუცვალეს, დაგროვილი წყალი ამოტუმბეს და სანიაღვრე არხი გაწმინდეს.

პირველადი დათვალიერებით, კორპუსის საძირკველს საფრთხე არ ემუქრება. შემთხვევის შედეგად არავინ დაშავებულა.

წვიმის გამო დაიტბორა თბილისის რამდენიმე უბნის ქუჩაც, ასევე გართულებული იყო ავტოტრანსპორტის მოძრაობა. წვიმის გამო გმირთა მოედანი – თამარაშვილის ქუჩის მიმართულებით მოძრაობის დროებითი შეზღუდვის რეჟიმი მოქმედებდა.

თბილისის მერი უნივერსიტეტის ქუჩაზე იყო, სადაც წყლით ავტომობილები დაიტბორა.

ძლიერი წვიმის შედეგად, გლდანშ, ახმეტელის მეტროს მიმდებარე ტერიტორიაზე მიწისქვეშა გადასასვლელი და იქ განთავსებული მაღაზიებიც დაიტბორა. ამ ადგილზე წყლის დონე 40 სანტიმეტრს აღწევდა.

ძლიერი წვიმა იყო გორშიც, სადაც სოფელი მეჯვრისხევი დაზარალდა.

დატოვეთ კომენტარი

კომენტარები

Загрузка...