რუსეთის პრეზიდენტის, ვლადიმერ პუტინის განცხადებით, ხელისუფლება განაგრძობს ბოლო თაობის შეიარაღებით და ტექნიკით არმიის გაძლიერებას, რათა საჭიროების შემთხვევაში სამხედროები მზად იყვნენ ქვეყნის სუვერენიტეტის, უსაფრთხოების და ეროვნული ინტერესების დასაცავად, ასევე მოკავშირეთა მხარდასაჭერად. ამის შესახებ “რადიო თავისუფლება” წერს.

პუტინი დღეს იმყოფებოდა ციმბირში მდებარე ცუგოლის პოლიგონზე, სადაც მასშტაბური სამხედრო წვრთნის „ვოსტოკი 2018“-ის მიმდინარეობას გაეცნო. პუტინის განცხადებით, რუსეთი მშვიდობისმოყვარე ქვეყანაა, რომელსაც არ აქვს და არ შეიძლება ჰქონდეს აგრესიული გეგმები და მისი საგარეო პოლიტიკა მიმართულია შემოქმედებითი თანამშრომლობისკენ ყველა სახელმწიფოსთან, რომელიც დაინტერესებულია ასეთი თანამშრომლობით. საჩვენებელ წვრთნაში მონაწილეობდნენ ჩინეთის და მონღოლეთის არმიის სამხედროებიც.

რუსეთის თავდაცვის სამინისტრომ დაიწყო სამხედრო სწავლება „ვოსტოკი 2018,“ რომელშიც მონაწილეობს 300 000 სამხედრო მოსამსახურე, 36 000 ჯავშანმანქანა, 1000 თვითმფრინავი და ვერტმფრენი და 80 გემი. თავდაცვის მინისტრის, სერგეი შოიგუს განცხადებით, „ვოსტოკი 2018“ უმსხვილესი სამხედრო სწავლებაა 1981 წლის შემდეგ, როცა საბჭოთა კავშირი და აშშ „ცივი ომის“ მდგომარეობაში იმყოფებოდნენ.

რუსეთის შეიარაღებული ძალების გენერალური შტაბის უფროსის, ვალერი გერასიმოვის მტკიცებით, მასშტაბური სამხედრო წვრთნები თავდაცვითი ხასიათისაა და არ არის მიმართული სხვა ქვეყნების წინააღმდეგ. სწავლება 17 სექტემბერს დასრულდება.

რუსეთის სამხედრო მანევრები დაგმო ნატომ, რომელმაც „ვოსტოკი 2018“ შეაფასა მზადებად ფართომასშტაბიანი კონფლიქტისთვის. ჩრდილოატლანტიკური ალიანსის წარმომადგელის, დილან ვაიტის განცხადებით, აგრესიული რუსეთი მნიშვნელოვნად ზრდის სამხედრო ბიუჯეტს და თავის სამხედრო ძალას.

წყარო: imedinews.ge

დატოვეთ კომენტარი

კომენტარები

Загрузка...