საპარლამენტო უმრავლესობის წევრი, ენძელა მაჭავარიანი, მეორე საზოგადოებრივის თოქ-შოუ „არგუმენტების დროში” ბოლო პერიოდში მედიის მხრიდან მის მიმართ გამოჩენილ განსაკუთრებულ ინტერესს გამოეხმაურა.

„პირობას ვდებ რომ ჩემს რბილ „ლასს“ გამოვასწორებ და ცოტა იმიჯზეც ვიმუშავებ, ოღონდ ამას გავაკეთებ მაშინ, როცა დრო დამრჩება იმ ადამიანების პრობლემებზე მუშაობის შემდეგ, რომლებიც ახლა, ამ წუთში, როცა ჩვენ სიცხეს კონდიციონერებთან ვაფარებთ თავს, დგანან ფეროშენადნობთა ქარხნის ღუმელთან, ან მაღაროსთან. ზოგი სწორედ ახლა, ამ წუთში  არის ლუკმა პურის საშოვნელად გასული საკუთარი ოჯახიდან და ეს ადამიანები ნაკლებად ფიქრობენ იმაზე, თუ როგორ გამოვიყურებით ჩვენ, როგორ ვსაუბრობთ, რა ბგერას ვამახინჯებთ, ან არ ვამახინჯებთ… ჩემთვისაც მთავარია, რომ მათი პრობლემები იყოს მთავარი და აქტუალური და ჩემი ყოფნა პარლამენტში გახდეს იმის საფუძველი, რომ რაღაცით ერთ ადამიანს, ან ერთ სეგმენტს მაინც შევუცვალო ის მდგომარეობა, რომელიც დღეს აქვს.

თქვენ იცით, რამდენი გრადუსია ახლა ფეროშენადნობის ღუმელთან? და ადამიანები იქ ზამთარ-ზაფხულ შეფუთულები მუშაობენ. მე თვითონ ვარ ფეროშენადნობის ქარხნის მუშის ოჯახიდან გამოსული და ძალიან კარგად მესმის იმ ადამიანების, რომლებსაც ძალიან ცოტა დრო აქვთ იმისთვის, რომ თავიანთ ტანსაცმელს, გარეგნობას და იმიჯს მიაქციონ ყურადღება. ჩვენ სხვა საზოგადოებაში ვცხოვრობთ და სხვა საზოგადოება გვმართავს. ჩენ რატომღაც არ გვინდა დავინახოთ ის პრობლემები,  რომლებიც გაცილებით უფრო დიდია, ვიდრე ზოგიერთ პარლამენტარის მეტყველება.

რაც შეეხება ჩემს გააქტიურებას – მე საერთოდ ძალიან აქტიური ადამიანი ვარ. ჯერ კიდევ სკოლიდან გამოვირჩეოდი აქტიურობით და ჟურნალისტიკაშიც ყოველთვის მქონდა ჩემი პოზიცია. ვიყავი „ქართველი ერის“ მთავარი რედაქტორი; ვიყავი თავის დროზე ერთადერთი ოპოზიციური გაზეთის – „კაბადონის“ განყოფილების გამგე. კარგი ჟურნალისტური სკოლა გავიარე და სწორედ ჟურნალისტიკიდან მოვხვდი პოლიტიკაში და მინდა რომ ეს ყოფნა რაღაცით იყოს გამართლებული.

მედიის ყურადღებასთან დაკავშირებით, შემიძლია ვთქვა რომ პარლამენტში მე ჩემი პოზიცია მქონდა თუნდაც კონსტიტუციის განხილვის კომისიის შექმნის დროს და ხმაც კი არ მივეცი ამ კომისიას მაგრამ არავის უკითხავს რატომ მოვიქეცი ასე. სხვა დროსაც ხშირად ყოფილა ჩემი გამოსვლა კრიტიკული, მაგრამ რატომღაც მხოლოდ ბოლოდროინდელი გამოსვლები გახდა უფრო აქტუალური მედიისთვის, თუმცა მადლობელი ვარ რომ მედიის ყურადღება მივიქციე და დღეს საშუალება მაქვს, ვისაუბრო ამ საკითხებზე”- განაცხადა ენძელა მაჭავარიანმა.

დატოვეთ კომენტარი

კომენტარები

Загрузка...