ეჭვმიტანილი დაკავებულია. ორი ტურისტი ქალი ავსტრალიის მოშორებულ სანაპიროზე გაუპატიურების და დატყვევების შემდეგ სიკვდილს გადაურჩა იმ კაცისგან, რომელიც მათ წინა დღეს გაიცნეს.
The Guardian–ის და სხვა ავსტრალიური მედიასაშუალებების მიხედვით, კარავში ღამის გათევის შემდეგ, კაცმა მსხვერპლი ცენტრისგან მოშორებით მდებარე ეროვნულ პარკში, სოლთ ქრიქთან ახლოს, Tea Tree Point–ის პლაჟზე წაიყვანა მანქანით. იქ იგი თავს დაესხა ქალებს და სავარაუდოდ, მათ მოკვლასაც ცდილობდა. ერთ-ერთმა ქალმა მოახერხა თავის დაღწევა და შიშველი, ახლოს მყოფი გორაკებისკენ გაიქცა, სადაც მეთევზეები იყვნენ.
“ის პირდაპირ მანქანასთან მივარდა, უკანა კარი გამოაღო, ჩახტა მანქანაში და ყვიროდა: წამიყვანეთ აქედან, ის ჩვენ მოგვკლავს”, განუცხადა მეთევზემ, აბდულ-ქარიმ მოჰამედმა Seven News–ს.
“პირველ რიგში ჩვენ მას ჩვენი ტანსაცმელი მივეცით, ვინაიდან არაფერი არ ეცვა. მას ფეხებზე ღრმა ნაკაწრები ჰქონდა, როგორც ჩანს ურტყეს და ათრიეს”.
მეთევზე დაახლოებით 6:30 საათზე სოლთ ქრიქის გზაზე მდებარე რესტორანს დაუკავშირდა და პოლიცია და ექიმების ბრიგადა გამოიძახა. “იგი თავის მეგობარზე გვიყვებოდა, ამბობდა, რომ მისი მეგობარი დაიკარგა და წუხდა ამაზე. ის და მისი მეგობარი გაიყვნენ და სხვადასხვა მიმართულებით გაიქცნენ… იგი დაუსხლტა და გადაურჩა მოძალადეს და ახლა მეგობრის მოძებნა სურდა”, განუცხადა მეორე მეთევზემ The Advertiser–ს.
Seven News–ის მიერ მოწოდებული ფოტო: კარავი კოორონგის ეროვნული პარკისგან მოშორებით მდებარე სანაპიროზე იყო.
NBC News–ის მიხედვით, პოლიციამ და ადგილობრივმა მოსახლეობამ მიმდებარე ტერიტორია გაჩხრიკეს და მეორე ქალიც იპოვეს, რომელიც მძიმედ იყო დაშავებული. როგორც Seven News იტყობინება, ერთ-ერთ ტურისტს სავარაუდოდ ჩაქუჩი ქონდა თავში ჩარტყმული, ხოლო მეორეზე ავტომანქანა იყო გადავლილი.
Sydney Morning Herald–ის თანახმად, მოგვიანებით პოლიციამ ხალხის დახმარებით 59 წლის ეჭვმიტანილი იპოვა და დააპატიმრა, რომელიც დაახლოებით ორი საათის სავალ მანძილზე იყო ჩრდილო-აღმოსავლეთით იმ ადგილიდან, სადაც თავდასხმა მოხდა. მისი მანქანა სისხლით იყო დაფარული.
The Herald–ის ცნობით, ქალები აღნიშნულ მამაკაცთან ერთად ადელაიდადან ვიქტორიაში მიემგზავრებოდნენ. გავრცელებული ინფორმაციით, კაცმა ჯერ ნარკოტიკი მიაღებინა მათ, შემდეგ დაატყვევა და გააუპატიურა, სანამ მოკვლას გადაწყვეტდა. “ისინი ფაქტიურად ძალზე საშიშ სიტუაციაში აღმოჩნდნენ, რომელიც ფიზიკურ განადგურებას უქადდა მათ”, განაცხადა პოლიციის უფროსმა ოფიცერმა ჯეიმს ბლენდფორდმა. მან რელიეფი დაახასიათა, როგორც “რთული და მკაცრი” და დაუმატა, რომ ტერიტორიაზე კომუნიკაცია “რთული” იყო, ისევე, როგორც სატრანსპორტო საშუალებებით გადაადგილება, რადგან ისინი ქვიშაში ეფლობოდა. სამხრეთ ავსტრალიის პოლიციის ცნობით, დაზარალებული ქალები, რომელთაგან ერთი 23 წლის ბრაზილიელი მედდა იყო, ხოლო მეორე 20 წლის გერმანელი, ფლინდერსის სამედიცინო ცენტრში იქნენ გადაყვანილი სერიოზული დაზიანებებით. ბოლო ინფორმაციით მათი მდგომარეობა სტაბილურია. ეჭვმიტანილი სამხრეთ ავსტრალიიდან, ადელაიდის სამხრეთით მდებარე ქალაქ მორფეტ ვეილიდან არის და მას განზრახ მკვლელობის მცდელობა და გატაცება ედება ბრალად.
წყარო: postalioni.com

დატოვეთ კომენტარი

კომენტარები

Загрузка...