“ლარმა ამ დღეების განმავლობაში გაუფასურების ყველა რეკორდი მოხსნა. ეროვნულმა ვალუტამ დაკარგა მსყიდველობითი უნარი და ცოტა ხანში, ალბათ კუპონის ბედს გაიზიარებს. კუპონიზაციის პერიოდი ჩვენი ქვეყნის მოსახლეობას კარგად ახსოვს. ეს იყო უმძიმესი წლები, როდესაც ხალხის ხარჯზე მდიდრდებოდნენ ხელისუფლებაში მყოფნი ან ხელისუფლებასთან დაახლოებული პიროვნებები. ზუსტად ეს დრო დგება ჩვენს ქვეყანაში_ მოსახლეობა ღარიბდება და ლარის გაუფასურების სანაცვლოდ, კიდევ უფრო მდიდრდებიან ბობოლები. ხელისუფლების მხრიდან კი არანაირი ქმედითი ნაბიჯები არ იდგმება.

არ არსებობს არანაირი ეკონომიკური გეგმა, თუ როგორ აპირებენ ლარის კურსის გამყარებას. საქმის გაკეთების სანაცვლოდ,  ურცხვად ეუბნებიან მოსახლეობას, რომ ჰეჯირებული ლარი როგორ ვერ შენიშნეს და რატომ ვერ გათვალეს რისკები? მე კონტრშეკითხვა მაქვს მთავრობის ეკონომიკურ გუნდთან: ახლა რომ გვეუბნებიან, ლარის კურსის ვარდნა გარე ფაქტორების გამო ხდებაო, რატომ არ გათვალეს რისკები?  გვაქვს ეჭვები, რომ ლარის კურსის ვარდნა ხდება ხელოვნურად და კურსის ამდაგვარი დაცემა ხელს აძლევს ისევ ხელისუფლებასა და ბანკებს. ნახეთ ბანკების მოგებები და ეს ყველაფერი ხალხის ხარჯზე ხდება. ხელისუფლება კი მიწასთან გასწორებული ეკონომიკის პირობებში კურსის თამაშით ცდილობს  ეკონომიკური მაჩვენებლის ზრდა აჩვენოს და შექმნას ეკონომიკური მდგრადობის ილუზია,  მოსახლეობის გაღარიბებით  მილიონები ილექება ვიღაცეების ჯიბეში.  ლარის გაუფასურებით კატასტროფულად გაზრდილია ფასები პროდუქტებზე, საწვავზე, მედიკამენტებზე…

ეროვნული ვალუტის გაუფასურება განსაკუთრებით მძიმე ტვირთად დააწვა ადამიანებს. ვისაც ბანკის კრედიტი დოლარში ჰქონდა  აღებული, იმდენად მძიმედ, რომ ხელისუფლების უმოქმედობის გამო ადამიანები თვითმკვლელობით ასრულებენ თავიანთ ცხოვრებას. ხელისუფლება ცივსისხლიანად კლავს მოქალაქეებს და ამის გამო სინდისის ქეჯნას არც გრძნობს. მთავრობა ზის ბედნიერი სახით და გვამშვიდებს, რომ არაფერი არ ხდება და ლარის კურსის ვარდნა არ უნდა შევიმჩნიოთ. პირდაპირი მნიშვნელობით მთავრობა არაფერს არ აკეთებს და არც სამომავლოდ გეგმავს ხელის განძრევას. ლარი კი ისეთი სისწრაფით უფასურდება, ასე თუ გაგრძელდა ახალი წლის შემდეგ სამ ლარზე მეტი გახდება ერთი დოლარი. გაზაფხულზე კიდევ უფრო მეტად გაუფასურდება, რაც კიდევ მეტად გამოიწვევს ფასების ზრდას, რაც  იმას ნიშნავს, რომ ივანიშვილს და მისი ხელისუფლებას გადაწყვეტილი აქვს საკუთარი კეთილდღეობის სანაცვლოდ გაწიროს მოსახლეობა.

მინდა მივმართო ბიძინა ივანიშვილს! ხალხი უკიდურესად მძიმე მდგომარეობაშია, მოაკელით თქვენს მილიარდებს რამდენიმე მილიონი  ჩადეთ საქართველოს ბიუჯეტში და გაამყარეთ ლარი,  მაგრამ ლარის გამყარება თქვენ ხელს არ გაძლევთ, რადგან ეროვნული ვალუტის გამყარების პირობებში თქვენი ბანკი „ქართუ“, წლის ბოლოს ვერ დაამთავრებს 400% მეტი მოგებით.

ხელისუფლებას კი ვურჩევ, გაინახევრონ კოსმიური ხელფასები. თქვენ არ გაქვთ მორალური უფლება, ქვეყნის ეკონომიკის დაქცევის და ხალხის გაღარიბების სანაცვლოდ იღებდეთ რიგით პენსიონერზე მეტს. იცხოვრეთ ისე, როგორც აცხოვრებთ ამ ქვეყანაში ყველაზე ღირსეულ ადამიანებს, ჩვენს მოხუცებს და შემდეგ მიხვდებით, რა მძიმეა თქვენი ტყუილებით სავსე განცხადებების მოსმენა, რა მძიმეა ყოველდღიური ყოფა და მიზერული პენსიით ცივ, გაყინულ სახლში ტკბილ ჩაიზე ოცნებით არსებობა,”  _ განუცხადა “ფოსტალიონს” ლეიბორისტული პარტიის წევრმა, ნათია შარაშენიძემ.

წყარო postalioni.com

დატოვეთ კომენტარი

კომენტარები

Загрузка...