ბაღდათში მცხოვრები დედა-შვილი საზოგადოებასა და ხელისუფლებას დახმარებას სთხოვს.
84 წლის ელენე გოგსაძე შვილთან ერთად, საუკუნის წინ აშენებულ ქოხში ცხოვრობს და 10 თვეა სოციალური დახმარების აღდგენას ელოდება. ქალბატონის თქმით, სახლში ჭერიდან წვიმა ჩამოდის,ხოლო იატაკიდან მღრნელები და ქვეწარმავლები ამოდიან.
“უმძიმეს პირობებში ვცხოვრობთ, როდის წაიქცევა 100 წლის წინ აშენებული სახლი არავინ იცის. ნახევარჯერ მშიერი ვარ შვილო. მე და ჩემს შვილს საჭმლის ფულიც კი არ გვაქვს. მე ადამიანი სოციალურ დახმარებას მომიხსნიდა,”- აცხადებს ელენე გოგსაძე.
სოციალურად დაუცველი ოჯახის მეზობლები ამბობენ, რომ გოგსაძეების ოჯახის მსგავსად მუნიციპალიტეტში არავის უჭირს. მათივე თქმით, ისინი სიღატაკეში მცხოვრებ დედა-შვილს პერიოდულად ეხმარებიან.

“ხან მჭადი გადმოგვაქვს, ხან ლობიო, მაგრამ სულ ამათთვის კი არა ჩვენთვის არ გვაქვს. გული მეწვება ამ მოხუცს რომ ვუყურებ. 84 წლის ქალია და ისე გადის დღეები ლუკმასაც ვერ ჭამს, რა ქნას საშაულება არ აქვს, სოციალური დამხარება კი 10 თვეზე მეტია შეწყვეტილი აქვს,”- ამბობს მეზობელი მანანა ლილუაშვილი.

ბაღდათის მუნიციპალიტეტის გამგეობაში აცხადებენ, რომ სოციალური მომსახურების სააგენტოსთან ქალბატონს მრავალჯერ უშუამდგომლეს, თუმცა მათვის გაუგებარი მიზეზის გამო, ყოველი გადამოწმების შემდეგ ოჯახს სულ უფრო და უფრო მაღალი ქულები მოსდიოდა.

სოციალურ სააგენტოში აცხადებენ, რომ ოჯახს ამ ეტაპზე საარსებო შემწეობა მაღალი სარეიტინგო ქულის გამო შეწყვეტილი აქვს. იგეგმება ოჯახის ხელახალი გადამოწმება და მონაცემების დაკორექტირების შემდეგ,ახალი სარეიტინგო ქულა მიენიჭება.

წყარო: tzona.ge

დატოვეთ კომენტარი

კომენტარები

Загрузка...