მაღალი იერარქიული სასულიერო პირის მკვლელობის მცდელობისთვის ბრალდებული დეკანოზ გიორგი მამალაძის დედამ პირველი კომენტარი გააკეთა. ქეთევან მაღლაკელიძეს ბრალდების ვერსიის არ სჯერა.

ქეთევან მაღლაკელიძემ ჟურნალისტებთან საუბრისას აღნიშნა, რომ მის საცხოვრებელ სახლში, რომელიც ასევე დეკანოზ გიორგი მამალაძეს ეკუთვნის, ჩხრეკა არ ჩატარებულა.

“რადგან ჩვენი შვილი იყენებდა დუმილის უფლებას, ჩვენც არ ვლაპარაკობდით. როგორ შეიძლება მღვდლის დედას სჯეროდეს იმ ინფომაციის, რაც პროკურატურამ განაცხადა. ჩემი შვილი ეკლესიაში არც ქუჩიდან და არც მხედრიონიდან მისულა, მას შეგნებით ჰქონდა გადაწყვეტილი. პატრიარქის გამო ოჯახს გადაწევს უკანა პლანზე. ამიტომ სისულელეა ეს ყველაფერი. მუქარასთან დაკავშირებით არაფერი ვიცით, მას თავისი სამსახურეობრივი მოვალეობა ჰქონდა და მასზე არ საუბრობდა. ეს არის გიორგის სახლი, ჩხრეკა აქ არ ჩატარებულა. არავის შეუტყობინებია, რომ ის დააკავეს. ბოლოს პარასკევს ვესაუბრეთ, გერმანიაში უნდა წავიდეო, რატო მიდიოდა არ ვიცოდი. ჩემი ერთადერთი მოთხოვნაა, რომ ჩემი შვილი იყოს ჯანმრთელად, რადგან გულზე ოპერაცია აქვს გაკეთებული”, – განაცხადა ქეთევან მაღლაკელიძემ.

პროკურატურამ საპატრიარქოს ქონების მართვის სამსახურის ხელმძღვანელი დეკანოზი გიორგი მამალაძე მაღალი იერარქიული სასულიერო პირის მკვლელობის მომზადების ბრალდებით დააკავა. პროკურატურა არ აკონკრეტებს, ვის მკვლელობას ამზადებდა დეკანოზი, თუმცა მედიაში ვრცელდებოდა ინფორმაცია, რომ საქართველოს პატრიარქის სიცოცხლეს საფრთხე ემუქრებოდა.

pia.ge

დატოვეთ კომენტარი

კომენტარები

Загрузка...