დღეს ადამიანის უფლებათა დაცვისა და სამოქალაქო ინტეგრაციის კომიტეტის ფარგლებში შემუშავებული ბავშვის უფლებათა კოდექსი კომიტეტებს გადაეცა. როგორც პარლამენტის ადამიანის უფლებათა დაცვის კომიტეტის სხდომაზე განათლების მინისტრის მოადგილემ ნათია ზედგინიძე-ჯიშკარიანმა განმარტა, მთავრობა ბავშვთა და ახალგაზრდობის ეროვნული სააგენტოს შექმნას გეგმავს, რომელიც მთავრობის სახელმწიფო კონტროლს დაქვემდებარებული სსიპ-ი იქნება. ამის შესახებ ინფორმაციას სააგენტო “ინტერპრესნიუსი” ავრცელებს.

ნათია ზედგინიძე-ჯიშკარიანის თქმით, ბავშვთა და ახალგაზრდობის ეროვნული სააგენტო ბავშვთა და ახალგაზრდობის განვითარების ფონდის, ბავშვთა და ახალგაზრდობის ეროვნული ცენტრისა და განათლების, მეცნიერების, კულტურისა და სპორტის სამინისტროს სტრუქტურული ერთეულის – ახალგაზრდობის პოლიტიკის მართვის დეპარტამენტის შერწყმის შედეგად შეიქმნება.

კომიტეტის სხდომაზე “ევროპული საქართველოს” დეპუტატმა სერგო რატიანმა ინიციატივა უარყოფითად შეაფასა. მისი თქმით, ასეთი სსიპის შექმნას პოლიტიკური მიზნები აქვს.

“პრობლემა არის შემდეგი: – აი ეს მიმართულება ძალიან დიდი ხნის განმავლობაში, თქვენამდე და თქვენს დროსაც, პოლიტიკურ მიზნებს ემსახურებოდა. ეს პოლიტიკური მიზნები იყო უნივერსიტეტებში თვითმმართველობების, პოლიტიკურად ახლომდგომი სტუდენტების მომსახურება და სხვა რაღაცეები. ეს მთავრობას, საზოგადოებასა და უნივერსიტეტებს პრობლემების გარდა, სხვას არაფერს უჩენდა. ეს იყო მთავრობის ფრიად უტვინო ქმედება ყველა დროში. როდესაც იწყებ ჩარევას, 1%-ს უკეთებ ფორსირებას, უზრუნველყოფ თანხებით და ასე შემდეგ, შენიანი, სხვისიანი – ყველა არის უკმაყოფილო და ახალგაზრდების გარკვეული ნაწილი წაქეზებული ცუდი რაღაცეებისათვის“, – განაცხადა სერგო რატიანმა ადამიანის უფლებათა დაცვის კომიტეტის სხდომაზე.

დატოვეთ კომენტარი

კომენტარები

Загрузка...