ხორავას ქუჩაზე ორი არასრულწლოვანის მკვლელობის საქმესთან დაკავშირებით ექსპერტიზა ორ დანას უტარდება და გამოძიებასაც ორი ბრალდებული ჰყავს.

ერთი დანა შემთხვევის ადგილიდან ამოღეს, მეორე, ერთ-ერთი ბრალდებულისგან – დაკავების დროს მან თავად აჩვენა პოლიციას დამალული დანა.

ერთ-ერთი ბრალდებულის მხარემ შუამდგომლობა დააყენა და კომპლექსური ექსპერტიზა მოითხოვა. საქმეში ცნობილი დამოუკიდებელი ექსპერტი მაია ნიკოლეიშვილი უნდა ჩართულიყო, თუმცა გამოძიებამ მის ჩართვაზე უარი განაცხადა.

„იყო მთელი რიგი კითხვები, რომელიც მე ერთ-ერთი ბრალდებულის ადვოკატმა დამისვა და ჩვენ პასუხებისთვის კომპლექსური ექსპერტიზა მოვითხოვეთ. ადვოკატს სურდა, ექსპერტიზაში მეც ვყოფილიყავი ჩართული. თუმცა, უარი გვითხრეს. შუამდგომლობა ნაწილობრივ იქნა დაკმაყოფილებული. ჩვენს მიერ დასმულ შეკითხვებზე პასუხს, როგორც გვითხრეს, სამხარაულის ექსპერტიზა მოგვცემს, თუმცა, ჩემს ჩართვაზე უარი თქვეს. მაგალითად, საინტერესოა, როგორი იყო თავდასხმელისა და მსვერპლის პოზიციები დაზიანების მიყენების პროცესში, ჭრილობები ერთი და იგივე დანით არის მიყენებული თუ სხვადასხვა, ერთ სხეულზე ერთი და იგივე დანის კვალია თუ არა, ჩვენი კითხვები ყველა გაზიარებულია, მაგრამ ექსპერტიზა ჩვენს გარეშე ჩატარდება“, – განუმარტა მაია ნიკოლეიშვილმა „პრაიმტაიმს“.

ნიკოლეიშვილის განმარტებით, ბრალდებულის მხარეს ასევე აინტერესებდა ტანსაცმელსა და სხეულზე არსებული დაზიანებების შედარება, იმისათვის რომ განესაზღვრა რამდენი დანით ჰქონდათ მიყენებული დაზარალებულებს ჭრილობები.

„ახლა ტანსაცმელი შეიძლება დავათვალიერო სასამართლო დარბაზში, მაგრამ ვერ გამოვიკვლევ, ამისათვის მიკროსკოპია საჭირო, შედარება უნდა გაკეთდეს ტანსაცმელზე არსებული დაზიანებების ზომების სხეულის დაზიანებებთან. არ დაკმაყოფილდა ჩემი ჩართვა და ამით მხარეს გარკვეული უფლებები ნამდვილად შეეკვეცა არა მხოლოდ სამართლიანი სასამართლოს მიმართულებით, არამედ, ობიექტური ჭეშმარიტების დადგენის მხრივაც.“ – განმარტავს მაია ნიკოლეიშვილი.

„პრაიმტაიმთან“ საუბარში ნიკოლეიშვილი გამოძიების მიერ ამოღებულ ერთ-ერთ დანაზეც საუბრობს:

“საინტერესოა, რომ დანაზე, რომელიც გ.ბ-ს დაკავების დროს ამოღეს მოწითალო-მოყავისფრო დანაშრევები აღმოჩნდა, ეს სისხლის კვალია. დანა ეკუთვნის ერთ-ერთ გარდაცვლილს. ეს დანა, ბრალდებულის განცხადებით, მან გარეცხა ხორავას ქუჩაზე, შემთხვევის ადგილიდან ახლოს – გვერდით მდებარე ერთ-ერთ ეზოში. იქ ონკანი იყო, შემდეგ ის ქაღალდის ცხვირსახოცში გაახვია და დამალა. დანის ტარსა და პირს შორის რა თქმა უნდა, დარჩებოდა სისხლის კვალი, მაგრამ საოცრება ის არის, რომ დანის აღწერილობაში საკმაოდ დიდი ოდენობის სისხლია მითითებული.”

არასრულწლოვანთა მართლმსაჯულების კოდექსის თანახმად, აღნიშნულ საქმეზე წინასასამართლო სხდომა ბრალის წარდგენიდან 40 დღის ვადაში უნდა ჩაინიშნოს. მაია ნიკოლეიშვილის შეფასებით, ასეთი მძიმე საქმის ხარისხიანად გამოძიებას გაცილებით ბევრი დრო სჭირდება:

“გამოძიებას უნდა ჰქონდეს დრო რომ სერიოზულად იმუშაოს. იქ ფიგურირებს მანქანა, სადაც ვიღაც იჯდა და ყველაფერს კარგად ხედავდა. არ ვიცი, იდენტიფიცირებულია თუ არა ეს პიროვნება. კომპლექსურ ექსპერტიზასაც დრო სჭირდება. მეეჭვება სამხარაულმა ის 9 იანვრისთვის დაასრულოს. ორი დანა გამოძიებას აქვს, თუმცა, დაკავებულების მხრიდან ერთ-ერთი ზურგშია დაჭრილი. გამოდის რომ სულ მცირე სამი დანა უკვე არსებობდა. ასე რომ ეს ის შემთხვევაა, როცა კოდექსმა გრადაცია უნდა გააკეთოს და ასეთ მძიმე საქმეებზე ვადები გაზარდოს”,- მიაჩნია მაია ნიკოლეიშვილს.

მისივე განმარტებით, კოდექსით განსაზღვრული შემჭირდოვებული ვადები გამოძიებას აიძულებს იჩქაროს, რაც გამოძიების ხარისხზე აისახება. დამოუკიდებელი ექსპერტის საქმიდან დისტანცირებაც უკვე იმის მანიშნებელია რომ ბრალდებულებს დაცვაში ხელი ეშლება

“9 იანვრისთვის ექსპერტიზის პასუხები, ალბათ, მზად ვერ იქნება – მოცულობითი ექსპერტიზაა, იმ დანებზე ექსპერტიმენტიც უნდა ჩატარდეს. კოდექსი მეტის საშუალებას არ იძლევა – სასამართლო პროცესი 40 დღეში უნდა ჩატარდეს. მაგრამ ასეთი მძიმე საქმის დროს, ეს გამოძიების ხარისხს აზარალებს. როგორც ჩანს, წინასასამართლო სხდომა დაიწყება და მერე მოვა ექსპერტიზებიც. გამოდის რომ ობიექტური მტკიცებულებების გარეშე მიდის საქმე სასამართლოში, იმიტომ რომ დრო ცოტაა. ეს ძალიან ცუდია და კანონმდებლობა უნდა შეიცვალოს. მე საერთოდ მხარეს ვურჩევდი ეს ვადები საკონსტიტუციო სასამართლოში გაესაჩივრებინა”, – აცხადებს მაია ნიკოლეიშვილი.

სრული ვერსიის ნახვა mediamall.ge

დატოვეთ კომენტარი

კომენტარები

Загрузка...