Deutsche Bank Wealth Management-ის საინვესტიციო ოფისის ხელმძღვანელი, მარკუს მიულერი კრიპტოვალუტებით დაინტერესებულ ადამიანებს თავის შეკავებისკენ მოუწოდებს. მისი განცხადებით, მთავარ რისკებს ციფრული ვალუტების ღირებულების მერყეობა, ფასებით მანიპულირება, მონაცემთა დაკარგვა წარმოადგენენ. აღნიშნულთან დაკავშირებით მიულერი Bloomberg News-ს ესაუბრა.

 

„კრიპტოვალუტებით იგებს ის, ვინც  სპეკულაციურად ინვესტირებს. არსებობს დიდი საშიშროება ფულის დაკარგვასთან დაკავშირებით,“ – განაცხადა მიულერმა.

 

უკანასკნელ პერიოდში, ციფრულ ვალუტებთან დაკავშირებით სკეპტიკურად არამარტო მიულერმა, არამედ “ესპანეთის ბანკის“ ხელმძღვანელმა, ლუის მარია ლინდემაც ისაუბრა. მისი განცხადებით, ციფრული ვალუტები „უზარმაზარ რისკს“ შეიცავენ. „ავსტრიის ფინანსური დაგეგმვის ასოციაციამ“ ბიტკოინში ჩადებული ინვესტიცია სამორინეში ვიზიტს შეადარა.

მიულერის აზრით, იმისათვის, რათა ციფრული ვალუტები გარკვეულ აქტივებად ჩაითვალოს, საჭიროა მეტი რეგულაცია, უსაფრთხოების ზომები და გამჭვირვალობა. „კომპანიებმა, რომლებიც ბაზარზე კრიპტო-ვალუტებს უშვებენ, მარეგულირებელ ორგანოებთან უნდა ითანამშრომლონ. დაცულობისა და ნდობის შექმნის შემთხვევაში, კრიპტოვალუტები აქტივებად გადაიქცევიან. გაუგებარია, თუ რატომ არ მოსწონთ ციფრული ვალუტების მიმდევრებს რეგულირება – ეს ხომ დანაშაულის აღკვეთის ერთ-ერთი საშუალებაა,“ განაცხადა მიულერმა.

commersant.ge

დატოვეთ კომენტარი

კომენტარები

Загрузка...