დღეს კახა კალაძისთვის დასამტკიცებლად წარდგენილი ე.წ. თბილისის გენგეგმის ისტორია 2015 წლის 21 მაისს დაიწყო, როდესაც ქ.თბილისის მუნიციპალიტეტის არქიტექტურის სამსახურის მიერ გაკეთდა საკონკურსო განცხადება: „საპროექტო მომსახურების – დედაქალაქის მიწათსარგებლობის გენერალური გეგმის განახლების სახელმწიფო შესყიდვის“ შესახებ.

ახალი მგგ-ს მიღება პირდაპირ კავშირში იყო თბილისის მაშინდელი მერის, ბ-ნი დავით ნარმანიას, წინასაარჩევნო პროგრამის მთავარ დაპირებასთან, რომლის „შესრულებაც“ მისი მერობის მთავარ პოლიტიკურ მიზნად იქცა.

საკონკურსო წინადადებების მიღება დასრულდა 2015 წლის 1 აგვისტოს. აღნიშნული დროისთვის წარმოდგენილ იქნა თერთმეტი საკონკურსო წინადადება. ამავე დღიდან, საუკეთესო საკონკურსო წინადადების გამოვლენის მიზნით, მუშაობა დაიწყო საკონკურსო კომისიამ.

თუმცა, საკონკურსო კომისიას მხოლოდ ფორმალური ფუნქცია თუ ჰქონდა, რადგან 2015 წლის 17 აგვისტოს საქართველოს მთავრობის #1742 განკარგულების საფუძველზე, ქალაქ თბილისის მუნიციპალიტეტის სსიპ არქიტექტურის სამსახურსა და უცხოურ საწარმო – „ფრაისვოთერჰაუსკუპერს ცენტრალური აზია და კავკასია ბი.ვი.-ს ფილიალი საქართველოში“ (PricewaterhouseCoopers) შორის გაფორმდა #42030651A001/015 ხელშეკრულება, რომლის შესაბამისად, აღნიშნული ორგანიზაცია, კომისიას საკონკურსო განცხადებაზე მუშაობის პროცესში, უწევდა საკონსულტაციო მომსახურებას. 20 სამუშაო დღეში აღნიშნული მომსახურების ღირებულებამ შეადგინა 470 000 ამერიკული დოლარი, რაც საკმაოდ დიდ ციფრს წარმოადგენს ამ ტიპის მომსახურებისთვის ასეთ მოკლე დროში და თან იმ კომპანიისთვის, რომლის პროფილს წყალთან დაკავშირებული პროექტები წარმოადგენს და არა ქალაქგეგმარებასთან დაკავშირებული საკითხები. საინტერესო იქნებოდა იმ ადამიანების ვინაობის გასაჯაროებაც, ვინც ამ კომპანიას გაუწიეს რეკომენდაცია საქართველოს მთავრობასთან.

სწორედ ამ კომპანიის მიერ გამოვლინდა სამი გამარჯვებული. პირველი ადგილი ა(ა)იპ-ი „სითი ინსტიტუტი საქართველოს” წარმოდგენილმა პროექტმა დაიკავა და მიიღო კიდეც კონკურსის პირობებით გათვალისწინებული 50.000 ლარი. აღსანიშნავია, რომ საჯარო რეესტრის ამონაწერის თანახმად, ა(ა)იპ „სითი ინსტიტუტი საქართველო“ დაფუძნებულ იქნა 2015 წლის 30 ივნისს, დედაქალაქის მიწათსარგებლობის გენერალური გეგმის განახლების სახელმწიფო შესყიდვის გამოცხადებული კონკურსიდან 41-ე დღეს.

ლოგიკურად აქ უნდა დამთავრებულიყო კონკურსი და დამთავრდა კიდეც, მაგრამ მთელი რიგი იურიდიული მანიპულაციების შედეგად, რომელშიც მონაწილეობდა ქ.თბილისი მერია, საქართველოს მთავრობა და სახელმწიფო შესყიდვების სააგენტო, 2015 წლის 15 ოქტომბერს საქართველოს მთავრობამ მიიღო #2212 განკარგულება ქალაქ თბილისის მუნიციპალიტეტის მერიის მიმართ გამარტივებული შესყიდვის თანხმობის თაობაზე და ამავე დღეს, ა(ა)იპ „სითი ინსტიტუტ საქართველოსთან“ ქალაქ თბილისის მუნიციპალიტეტის მერიამ გააფორმა შესაბამისი ხელშეკრულება 2 800 000 ლარის მომსახურებაზე.

ასე ჩაიგდო 50.000 ლარიან კონკურსში გამარჯვებულმა „სითი-ინსტიტუტ საქართველომ“ ხელში 2.800.000 ლარიანი კონტრაქტი.

წესით და რიგით მომსახურების ხელშეკრულების ხელმოწერიდან 18 თვეში, კომპანიას უნდა შეესრულებინა და წარმოედგინა მიწათსარგებლობის გენერალური გეგმის განახლებული დოკუმენტი. დღეს კონტრაქტზე ხელისმოწერიდან 26 თვეზე მეტი გავიდა და ამ დოკუმენტის ბედი ჯერ კიდევ გაურკვეველია.

თუმცა, ჩვენთვის არც არაფერია გასარკვევი. ეს არ არის ქალაქთმშენებლობითი დოკუმენტი, ეს არის ჯერ კიდევ ნაციონალური მოძრაობის დროს დაგეგმილი და ამავე პოლიტიკური ძალის მმართველი ელიტის პოლიტიკური და ეკონომიკური ინტერესების გამომხატველი დოკუმენტი, რომლის გაკეთილშობილებასაც აგერ უკვე 26 თვეზე მეტია ცდილობენ „სითი ინსტიტუტი საქართველო“ და მისი ლობისტები.

ეს დოკუმენტი ქართველი სპეციალისტების, სხვადასხვა სამთავრობო თუ სამოქალაქო ორგანიზაციებისა და საერთაშორისო ექსპერტების მძაფრ კრიტიკას იმსახურებს, ისინი ცალსახად თანხმდებიან, რომ წარმოდგენილი დოკუმენტი საერთოდ არ არის მიწათსარგებლობის გენერალური გეგმა.

თბილისის ყოფილი მერი ბ-ნი ნარმანია თავად იყო ამ მგგ-ს მიღების ინიციატორი და სწორედ მისი თანხმობით მოხდა ის იურიდიული მანიპულაციები, რომლის მეშვებითაც ახლად გამოჩეკილმა კომპანიამ ხელში ჩაიგდო სახელმწიფო შეკვეთა, მაგრამ მანაც ვერ გარისკა ამ არაფრისმთქმელი დოკუმენტის მიღება და ვერ გაბედა პოლიტიკური პასუხისმგებლობის აღება. პრობლემების თავიდან აცილების მიზნით, თვითონვე დაუკვეთა ექსპერტიზა ფრანგ სპეციალისტებს და მათი უკიდურესად უარყოფითი შეფასების შემდეგ, დროის გაყვანის პრინციპი აირჩია, რათა მისი მერობის დროს არ მომხდარიყო მგგ-ს მიღება და ეს პოლიტიკური თავისტკივილი ახალ მერს გადაულოცა.

ბ-ნ კახა თქვენ არაერთხელ განაცხადეთ, რომ ყველაფერს იზამდით, იმისათვის რომ თბილისს ჰქონოდა თანამედროვე, საერთაშორისო სტანდარტების მქონე გენგეგმა და რომ წარმოდგენილი დოკუმენტი არ შეესაბამებოდა ამ სტანდარტებს. ასევე მერიის არქიტექტურის სამსახურმაც მისასალმებელი პრინციპულობა გამოიჩინა და როგორც სამსახურის უფროსმა აღნიშნა, ხარვეზებიდან გამომდინარე, შეიძლება წარმოდგენილი დოკუმენტი საერთოდ არ დამტკიცდეს და შეწყდეს კონტრაქტორთან ხელშეკრულება.

თუმცა, ეს განცხადებებია და მეტი არაფერი, ამ საქმეში ჯერ კიდევ სრული გაურკვევლობაა.

იმ ალბათობის დაშვება, რომ შესაძლებელია გაგრძელდეს მუშაობა წარმოდგენილ მგგ-ზე, გამოსწორდეს ხარვეზები და ა.შ. არის თავის და საზოგადოების მოტყუება, რაც ერთადერთ მიზანს შეიძლება ემსახურებოდეს – არ დადგეს იმ ადამიანების პასუხისმგებლობის საკითხი, რომლთა გამო ქალაქის ბიუჯეტიდან წყალში უკვე გადაიყარა 3 მილიონ ლარზე მეტი და კიდევ 800.000 ლარმაც შეიძლება იგივე ბედი გაიზიაროს.

ბ-ნო კახა, არ შეიძლება, მიიღოთ ის დოკუმენტი, რომლის ავტორებმაც საეჭვო გარემოებებში მოახერხეს კონკურსში გამარჯვება და რომლის საბოლოო სახით ჩაბარება, ავტორთა ბედოვლათობის გამო, რვა თვეზე მეტი ხანია ვერ ხერხდება. არ შეიძლება იგი მივიღოთ იმის გამოც, რომ მისი ავტორები უკვე მეშვიდედ დაჯარიმდნენ (300.000 ლარამდე) ხარვეზებისათვის და მასში აშკარად გამოხატულია ნაციონალური მოძრაობის ინტერესები. მგგ-ს კვალიფიციურობას ეჭვქვეშ აყენებს უამრავი ადგილობრივი და უცხოელი ექსპერტი და თბილისის არქიტექტურის სამსახურიც. სწორედ ამ ყველაფრის გამო, იგი არ შეიძლება იქცეს დედაქალაქის 2030 წლამდე გავითარების მთავარ სახელმძღვანელოდ .

ბ-ნო კახა, ძველ სისტემაზე უარის თქმის გარეშე, ახალი ვერ გაიმართება. თქვენ უნდა იცოდეთ, რომ ამ საკითხზე საზოგადოებაში უკვე მიღწეულია კონსესუსი, დედაქალაქის მოქალაქეებს ჯერათ თქვენი და თქვენგან გაბედული პოლიტიკური ნაბიჯის გადადგმას ელიან.

ჯუმბერ ჯალაღონია

დატოვეთ კომენტარი

კომენტარები

Загрузка...