ევროკავშირის წევრ 20 ქვეყანაში ინტერნეტ სარეკლამო ბაზარი ბოლო 6 წელიწადში 93%-ით გაიზარდა, მაშინ როცა სატელევიზიო და რადიო რეკლამა ფაქტობრივად არ იზრდება, ბეჭდური სარეკლამო ბაზარი კი მნიშვნელოვნად მცირდება. კვლევას ამ მონაცემების შესახებ ევროპის აუდიოვიზუალური ობსერვატორია აქვეყნებს.

კვლევის შედეგების თანახმად, 2016 წელს ონლაინ მედიამ 36.8 მილიარდი ევროს სარეკლამო შემოსავალი მიიღო, ხოლო სატელევიზიო რეკლამამ 31.4 მილიარდი ევრო. ვიდეო, იგივე მობილური რეკლამიდან მიღებულმა შემოსავალმა 2016 წელს ევროკავშირის 20 ქვეყანაში 2.7 მილიარდი ევრო შეადგინა.

„სარეკლამო ინდუსტრია მთლიანად ტრანსფორმაციას განიცდის, რაც პროვოცირებულია ახალი სარეკლამო ტექნოლოგიებისა და მოთამაშეების მიერ. Google-ი და Facebook- ი ონლაინ რეკლამაში დომინანტები არიან“, – ნათქვამია ევროპული აუდიოვიზუალური ობსერვატორიის ახალ ანგარიშში.

ანგარიშში ასევე ვკითხულობთ, რომ ონლაინ რეკლამის ბაზარი ევროკავშირის ქვეყნებში ლიდერი 2015 წელს გახდა. ამ წელს გადააჭარბა ტელევიზიაში განთავსებული რეკლამის შემოსავლებმა ონლაინ მედიაში განთავსებული რეკლამის შემოსავლებს. 2011-2016 წლებში საერთო სარეკლამო ბაზარი 14%-ით გაიზარდა (შემოსავლები 88.8 მილიარდი ევროდან 101,3 მილიარდ ევრომდე გაიზარდა), რაც ონლაინ მედიაში რეკლამის ზრდის ხარჯზე მოხდა, ონლაინ რეკლამა 2016 წელს წინა წელთან შედარებით გაორმაგებულია.

კვლევის ავტორები წერენ, რომ ინტერნეტ რეკლამამ სატელევიზიო რეკლამას მთელ ევროპაში მნიშვნელოვნად გაუსწრო.

„12.5 მილიარდი ევრო რომელიც სარეკლამო ბაზარმა 2016 წელს მიიღო ძირითადად ონლაინ რეკლამიდან მიღებული შემოსავლების ხარჯზე მოხდა და ის, ჯამში, 93%-ით არის გაზრდილი, სატელევიზიო და გარე რეკლამა მხოლოდ – 9-9%-ით გაიზარდა,  რადიო რეკლამა 8%-ით. ყველაზე დიდი დანაკარგი ბაზარმა ბეჭდურ მედიაში მიიღო, ჟურნალებსა და გაზეთებში რეკლამა 29%-ით დაეცა, კინო რეკლამა კი 20%-ით გაიზარდა“, – წერია ანგარიშში.

კვლევის ავტორები მიიჩნევენ რომ  ახალმა ტენდენციამ როგორც რეკლამის დამკვეთებისთვის, ისე მედიისთვის ახალი გამოწვევები გააჩინა. სწორედ ამ გამოწვევების გამო ევროკავშირის სატელევიზიო მაუწყებლებმა შექმნეს ალიანსი, რათა კონკურენცია გაუწიონ Google-სა და Facebook-ს.

„სარეკლამო ინდუსტრია აცნობიერებს, რომ დრო, როდესაც კონკურენცია ეროვნულ ბაზარზე ადგილობრივ მოთამაშეებს შორის მიდიოდა, დასრულებულია. ციფრული ტრანსფორმაცია ბადებს ახალ „გამარჯვებულებს. 2016 წელს, Google -მა და Facebook-მა, არა მხოლოდ ციფრული არამედ  მთლიანი სარეკლამო ბაზრის 20%-იანი წილი დაიკავეს და შესაბამისად მათი გავლენა გლობალურ სარეკლამო ბაზარზე კიდევ  უფრო გაიზარდა. მიუხედავად იმისა, რომ ბაზარზე კონკურენცია რთული იქნება, ეროვნული მოთამაშეები შეერთებულ შტატებსა და ევროპაში ცდილობენ კონკურენციის ახალი გზები   გამონახონ და ციფრული ტექნოლოგიების დანერგვა და ადაპტირება მოახდინონ“, – ნათქვამია ანგარიშში.

18 მარტს, ტელეკომპანია „იმედის“ ეთერში, საქართველოს კომუნიკაციების ეროვნული კომისიის თავმჯდომარემ, კახა ბექაურმა სატელევიზიო სარეკლამო ბაზრის მოცულობაზე საუბრისას მედია კომპანიებს ახალი რეალობის გათვალისწინებისა და სიახლეებზე მორგებისკენ მოუწოდა.

“კლასიკური მედიაპლატფორმებისგან განსხვავებით, როგორიცაა ტელევიზია, რადიო და ბეჭდური მედია, ბოლო პერიოდში ძალიან ვითარდება მულტიმედიური კონტენტი. სმარტფონებითა და გაჯეტებით ძალიან აქტიური გახდა მომხმარებლების მხრიდან როგორც ვიდეო, ასევე ტექსტური კონტენტის მოხმარება. ამიტომ მინდა ვთხოვო და მოვუწოდო მედიაკომპანიებს, აუცილებლად გადაეწყონ ამ სიახლეზე. იმიტომ, რომ ბაზარზე არ არის ამ მხრივ კარგი სიტუაცია. რასაც ვუყურებ, ისინი ვერ ერგებიან ახალ გამოწვევებს. დიახ, ისინი ცდილობენ ინტერნეტის კონტენტის შექმნასაც, მაგრამ უჭირთ. ეს ტრენდი მთელ მსოფლიოში ასეა – კლასიკური სატელევიზიო ბაზარი აღარ გაიზრდება ან თუ გაიზრდება ძალიან მცირედით, მაგრამ ძალიან მზარდი იქნება ინტერნეტის სარეკლამო ბაზარი. შესაბამისად, მედიაკომპანიებმა უნდა მოახერხონ მულტიმედიური კონტენტის განვითარება, რომ მაყურებლის მოთხოვნა, ამ შეცვლილი ქცევის შესაბამისად დააკმაყოფილონ”, – განაცხადა კახა ბექაურმა.

imedinews.ge

დატოვეთ კომენტარი

კომენტარები

Загрузка...