კახა კალაძე არ აპირებს „სითი პარკს“ კონტრაქტის გაწყვეტისთვის გათვალისწინებული ჯარიმა გადაუხადოს. თბილისის არჩეული მერი სამართლებრივი დავისთვის ემზადება. რა გეგმები აქვს დედაქალაქის ახალ ხელმძღვანელს ახალ პოზიციაზე – ამის შესახებ მან „ქრონიკასთან“ ინტერვიუში ისაუბრა.

ორშაბათს უფლებამოსილებას ოფიციალურად გადაიბარებთ და აქტუალური კითხვაა, ვინ იქნება ახლად არჩეული გუნდი? ამ დრომდე ორი გვარი სახელდება – ირაკლი ხმალაძე და მაია ბითაძე, თუმცა საინტერესოა კიდევ ვის ვიხილავთ თქვენს გუნდში?

როდესაც ორშაბათს მივალ და შესაძლებლობა მომეცემა დავიწყო მუშაობა, ამის შემდეგ წარმოვადგენთ იმ ადამიანებს, ვინც მომდევნო 4 წლის განმავლობაშ ჩემთან ერთად იმუშავებს. თავიდანვე ვიტყვი, რომ საკმაოდ სერიოზული გამოწვევებია, საკმაოდ ამბიციური გეგმები გაქვს, უამრავი პრობლემაა, რომელიც დღეს თბილისს აწუხებს და შესაბამისად 24-საათიანი მუშაობა მოგვიწევს იმისთვის, რომ არსებული პრობლემები მაქსიმალურად შევამსუბუქოთ და მოვაგვაროთ.

იქნება თუ არა მერიაში საკრებულოს იურიდიული კომისიის თავმჯდომარე თედო კობახიძე, რომლის სახელიც ბევრ სკანდალს უკავშირდება? გავრცელდა ინფორმაცია, რომ მას ახლა მერიაში იურიდიული სამსახურის ხელმძღვანელად ვიხილავთ.

ვინ იქნება იურიდიული სამსახურის ან სხვა სამსახური ხელმძღვანელი და ჩემი მოადგილეები, ეს მალე გახდება ცნობილი. მესმის, რომ ეს თქვენთვის საინტერესოა და საზოგადოებასაც აინტერესებს, უახლოეს დღეებში წარმოვადგენთ ამას და ცნობილი გახდება.

თუმცა როგორც არჩილ თალაკვაძის შემთხვევაში უარყავით, კობახიძის შემთხვევაში არ უარყოფთ გავრცელებულ ცნობას?

ვინ იქნებიან ეს ადამიანები, ახლა დეტალებში ვერ ჩავალ. თუ ყველაფერს ახლა ვიტყვი, მაშინ ორშაბათი და სამშაბათი საინტერესო არ იქნება.

უფლებამოსილების გადაბარების შემდეგ ხომ არ გეგმავთ მერიაში აუდიტის სამსახურის მოწვევას? ამის საჭიროებას ხედავთ?

აუდიტის სამსახური ისედაც შედის ხოლმე საჯარო დაწესებულებებში. შემოწმება ნორმალური პროცესია. ჩემთანაც, ენერგეტიკის სამინისტროში 5 წლის განმავლობაში 2-ჯერ იყვნენ შემოსულები და საგანგაშო არაფერი არ არის, მოწმდება. ალბათ, მერიაშიც შემოვლენ.

თქვენ არ მოიწვევთ? შემოწმდება ისე, როგორც პროცედურულად ხდება, თუ თქვენ მოიწვევთ?

კი, არ არის გამორიცხული, რომ ჩვენი მხრიდან მოხდეს მოწვევა. იმიტომ რომ, ჩვენ ვიბარებთ ძალიან სერიოზულ და ძალიან დიდ სტრუქტურას და შესაბამისად, ცუდი არაფერი არ არის იმაში, გავიგოთ რეალურად თუ სადმე იყო პრობლემები, თუ რა არის გამოსაწორებელი და ასე შემდეგ. ბოლო დღეების განმავლობაში ძალიან ხშირად ვსაუბრობ იმაზე, რომ გვინდა ნაკლები ბიუროკრატია, საჭიროა უფრო მეტი თანამედროვეობა, უფრო მეტი ინოვაციები. მერია საზოგადოებაზე, ხალხზე მორგებული სტრუქტურა უნდა იყოს, მოქნილი უნდა იყოს, ყველანაირი სერვისის მიღება ძალიან სწრაფად უნდა ხდებოდეს და პასუხები უნდა იყოს ძალიან სწრაფად. ადამიანებზე უნდა იყოს მორგებული.

ბიუროკრატიის დანგრევაზე ისაუბრეთ დღეს და ამას გულისხმობდით? კონკრეტულად, რა ნაწილშია საჭირო, სად არის ზედმეტი ბიუროკრატია?

თუნდაც მაგალითად, ნებართვების გაცემის თვალსაზრისით, თუნდაც მუნიციპალური სერვისები, რომელიც დღეს არსებობს. ამ მიმართულებით სერიოზული პრობლემებია და ვფიქრობთ, გავაუმჯობესოთ. ერთი ფანჯრის პრინციპის დანერგვას ვფიქრობთ, ელექტრონულ მუნიციპალური სერვისების შემოღებას ვფიქრობთ, რომ ადამიანებს სახლიდან გაუსვლელად ჰქონდეთ წვდომა ყველა იმ სერვისზე, რომელიც დღეს მერიაში არსებობს. ამისთვის ჯგუფი უკვე მუშაობს, მზადდება შესაბამისი პლატფორმა და სხვათა შორის, ძალიან საინტერესო იდეებს შევთავაზებთ თბილისის მოსახლეობას, რომ ქალაქის მართვაში იყოს მათი ჩართულობა.

აუდიტთან დაკავშირებით კიდევ გკითხავთ. ხომ არ ფიქრობთ, რომ აუდიტის სამსახურის მუშაობამ შესაძლებელია ყოფილ ან მოქმედ თანამშრომლებს რაიმე სამართლებრივი პრობლემები შეუქმნას?

არ ვიცი. ამაზე საუბარი მე გამიჭირდება. არ ვიცი რეალურად ამ მიმართულებით რაიმე პრობლემა თუ იყო. ერთი-ორი გადაცდომის ფაქტი, რაც იყო, შესაბამისი სამსახურები ჩაერთვნენ და დაუსჯელი არავინ არ დარჩება. მომავალშიც ასე გაგრძელდება. ჩვენ ძალიან პრინციპულები ვიქნებით. მე ყოველთვის ვამბობდი და ახლაც ვიმეორებ, ჩემთვის ადამიანებისა და კადრების შერჩევისას სამი ძირითადი მიმართულებაა: ესაა პროფესიონალიზმი, კომპეტენტურობა და რაც მთავარია, პატიოსნება.

სწორედ საკადრო ცვლილებებზე მინდა გკითხოთ. რა დონეზე ვარაუდობთ საკადრო ცვლილებებს და ასევე მერიაში სტრუქტურული ცვლილებების მიმართულებით რა იქნება?

ამასთან დაკავშირებით მოგახსენებთ, იმის შემდეგ, რაც შევალთ და დავიწყებთ მუშაობას. ცვლილებებს, რა თქმა უნდა, ვგეგმავთ. იქნება სტრუქტურული ცვლილებები, იქნება საკადრო ცვლილებები, თუმცა ყველა პროფესიონალს, ყველა კომპეტენტურ ადამიანს მაქსიმალურად გამოვიყენებთ, ისევ და ისევ ქალაქის და თბილისის მცხოვრებლების საკეთილდღეოდ. საკმაოდ ამბიციური გეგმები გვაქვს და ამ პროექტების განხორციელებას ძლიერი სპეციალისტები, კომპეტენტური ადამიანები სჭირდება. თქვენ იცით, რომ იოლი მოსაძებნი არ არის ძლიერი კადრები, შესაბამისად ყველა რესურსს მაქსიმალურად გამოვიყენებთ.

სტრუქტურულ ცვლილებებში გულისხმობთ თუ არა რამდენიმე სამსახურის გაერთიანებას?

კი, რამდენიმე სამსახურის გაერთიანდება. კონკრეტულად რომელი სამსახური რომელს შეუერთდება, ამასთან დაკავშირებითაც მოგახსენებთ. არქიტექტურის სამსახურში ვგეგმავთ ცვლილებებს სტრუქტურული მიმართულებით, გვინდა ურბანული პოლიტიკა წამოვწიოთ და გაჩნდეს სამსახური, რომელიც ამ მიმართულებით პოლიტიკას გაატარებს. ნებართვების გაცემისთვის ჩვეულებრივი სსიპ-ი იქნება, რომელიც ფასიან მომსახურებას გაწევს და აქაც მაქსიმალურად იქნება დრო დაზოგილი და ნაკლები ბიუროკრატია იქნება.

თბილისელებისთვის „სითი პარკი“ რეალურად მნიშვნელოვანი პრობლემაა. დავით ნარმანიამ განაცხადა, რომ ისურვებდა მომავალი მერი უფრო პრინციპული იყოს ამ კომპანიის მიმართ და რას აპირებთ თქვენ?

ჩვენი მიდგომები სამართლებრივი იქნება. სტატისტიკა რომ ნახოთ, ამ კომპანიის მხრიდან გამოწერილი ჯარიმების, რომელიც გასაჩივრდა, ნახავთ, რომ 90%-ის შემთხვევაში მოქალაქეების სასარგებლოდ გამოტანილი გამამართლებელი განაჩენებია. შესაბამისად, ჩნდება კითხვა, ეს კომპანია არაკანონიერად მოქმედებს? ამდენად, ჩვენ ამას სამართლებრივი გზით მივუდგებით.

შესაძლოა ვიხილოთ სასამართლო – მერია „სითი პარკის“ წინააღმდეგ?

რა თქმა უნდა. ზუსტად ამას ვგულისხმობ, როდესაც სამართლებრივი გზით წასვლაზე ვამბობ. იურისტები ჩაერთვებიან და ამ მიმართულებით იმუშავებენ.

თქვენ თქვით, რომ არა მხოლოდ მერიის, არამედ მერიის საზოგადოებასთან კომუნიკაციის დონე არ მოგწონდათ და ეს ერთ-ერთ პრობლემად დაასახელეთ. შეგიძლიათ გვითხრათ, მოქმედ მერს, დავით ნარმანიას კიდევ სად ჰქონდა ჩავარდნები?

როდესაც დათო დედაქალაქის მერიაში მივიდა, მას უამრავი პრობლემა დახვდა. ძალიან მძიმე მემკვიდრეობა იყო. მხოლოდ წარსულზე არ მინდა ვისაუბრო, მაგრამ უნდა ვთქვათ ის, რაც გაკეთდა. უამრავი პროექტი განხორციელდა, უამრავი მნიშვნელოვანი პროექტი იყო ქალაქისთვის. ის რაც მოხერხდა, მოხერხდა 3 წლის განმავლობაში. თუმცა პრობლემები უამრავია. მე იმის ილუზია არ გამაჩნია, რომ ჩვენ მოვალთ და 4 წლის განმავლობაში აბსოლუტურად ყველა პრობლემას მოვაგვარებთ, რომელიც დღეს ქალაქს აწუხებს. ეს შეუძლებელია. ეს არის პრობლემები, რომელიც 20-25 წლის განმავლობაში გროვდებოდა და ეს ისევ ჩვენ მიერ შექმნილი პრობლემებია. შესაბამისად, ის რაზეც ჩვენ ვსაუბრობთ, რაც გვინდა გავაკეთოთ, რაზეც წინასაარჩევნო კამპანიის დროს ვსაუბრობდი, ყველა ამ პროექტის განხორციელება 4 წლის განმავლობაში არის შესაძლებელი, კი, ამბიციური გეგმაა, ძალიან ბევრი მუშაობა მოგვიწევს, მაგრამ ეს ყველაფერი შესაძლებელია.

რაც შეეხება წინა მერის მუშაობის შეფასებას, ჯერ ერთი, ჩემი მხრიდან ეს არასწორი იქნება, რადგან ის ჩემი თანაგუნდელია, ჩვენი პარტიის წევრია. შეფასება უნდა გააკეთოთ თქვენ, ჟურნალისტებმა, საზოგადოებამ, მოსახლეობამ და ექსპერტებმა.

საზოგადოების ნაწილი ამბობს, რომ დავით ნარმანია არ იყო წარმატებული მერი. ეს იყო მხოლოდ მისი პრობლემა, თუ გარკვეულწილად გუნდის პრობლემაც? ეს ყველაფერი ხომ არ გამომდინარეობდა იქიდან, რომ შესაძლოა აღმასრულებელი ხელისუფლებიდან სათანადო მხარდაჭერა არ ჰქონდა?

არ მგონია, რომ დათოს ამ წლების განმავლობაში იმის ნაკლებობა ჰქონოდა, რომ გუნდი მხარს არ უჭერდა, ან გუნდისგან იყო მიტოვებული. ამას ნამდვილად ვერ დავეთანხმები. როდესაც დებატებზე გამოვდიოდი, ძალიან ხშირად იყო მინიშნება – თუ იღებთ პასუხისმგებლობას? რა თქმა უნდა, დათო ჩვენი გუნდის წევრია და ჩვენ ვიღებთ ჩვენ წილ პასუხისმგებლობას. მე ჩემ წილ პასუხისმგებლობას ვიღებ გაკეთებულზეც და იმ პრობლემებზეც, რომელიც დღეს ქალაქისთვის აქტუალურია. შესაბამისად, ის, რომ დათო გუნდის გარეშე, ცენტრალური ხელისუფლების გარეშე იყო, ამას ნამდვილად ვერ დავეთანხმები. რა თქმა უნდა, მისი მხრიდან ალბათ საჭირო იყო უფრო მეტი აქტიურობა, უფრო მეტი პროექტების წამოწყება და ასე შემდეგ, თუმცა მგონია, რომ მისი მერობის პერიოდში, 3 წლის განმავლობაში რაც შესაძლებელი იყო, ამ ადამიანმა თავის გუნდთან ერთად მოახერხა და გააკეთა.

დატოვეთ კომენტარი

კომენტარები

Загрузка...