,,თბილისში, ვაზისუბნის დეპუტატი პარლამენტში ეს ახალგაზრდა კაცი ყოფილა -ირაკლი აბუსერიძე. როგორც გავიგე რაგბისტია და საარჩევნო ბლოკი: „ქართული ოცნება – დემოკრატიულ საქართველო“-ს სიით შესულა პარლამენტში (პარლამენტარმა სპორტსმენებმა და მსახიობებმა ხომ აგვაშენეს!). საჭიდაო მოედანზე მე არ დავდივარ, ეგ კიდევ თავის ამომრჩეველს არ ეკარება, ხოდა, საიდან უნდა ვიცნობდე?! არც ის ვიცი, უნდა მივმართო მას, წერილის მიწერას აქვს რაიმე აზრი თუ არა, მაგრამ მაინც მინდა შევატყობინო, რომ ვაზისუბანში, თითქმის ყოველდღე წყალს წყვეტენ. თავნება gwp ხალხს სიცხე-პაპანაქებაში უწყლოდ ტოვებს და ამას აქვს სისტემატიური ხასიათი. მართალია, ამ დეპუტატის მკაცრი სიტყვა პარლამენტიდან ვაზისუბნელებს არ გაგვიგონია, მაგრამ სიმართლე უნდა ითქვას, პირადად არასდროს არც მიმიმართავს. ეს პირველია და ამიტომ, თხოვნის სახეს მივცემ. ბატონო ირაკლი, იქნებ დაინტერესდეთ თქვენი ამომრჩევლების ბედით და გაარკვიოთ, რეალურად რა არის ვაზისუბანში სისტემატიურად წყლის შეწყვეტის მიზეზი? ,,დაზიანებაა…” _ ამ სიტყვებს არ მივიღებთ, რადგან gwp ყოველთვის ამით იძვრენს თავს. სიმართლეს ამბობს თუ არა, არავინ ამოწმებს და ცხადია, გასდის. უბრალოდ, შეუძლებელია, ასე ხშირად, მხოლოდ დაზიანების გამო არ მოგვეწოდებოდეს წყალი. ამჯერად ჩვენს (ჩემს) გონივრულ ეჭვს თავზე არ შემოგახვევთ და ბოთლის წყლის კომპანიებთან GWP _ს სავარაუდო გარიგებებზე არ ვისაუბრებ. თუ ამ საკითხით სერიოზულად დაინტერესდებით, დარწმუნებული ვარ, ასეთი ეჭვი თქვენც გაგიჩნდებათ. არც იმას გამოვრიცხავ, რომ არაკომპეტენტურობასა და არცოდნასთან გვქონდეს საქმე და კომპანიის თანამშრომელთა უვიცობის მსვერპლი იყოს თქვენი ამომრჩეველი. ყველა შემთხვევაში პასუხისმგებლობა ეკისრება კომპანიას, რომელსაც მოსახლეობა დაწესებულ თანხას პატიოსნად უხდის. დიახ, გადასახადს ვიხდით, წყალი არ გვაქვს და ხალხის მდგომარეობაც არავის ანაღვლებს. თუ შვებულებაში არ ბრძანდებით და რომელიმე ფეშენ კურორტზე არ ისვენებთ, იქნებ შეწუხდეთ და წყალი გამოაშვებინოთ, თორემ თუ ასე გაგრძელდა, უწყლობით დავიხრჩობით 40 გრადუსიან სიცხეში, თქვენ ამომრჩეველი აღარ გეყოლებათ და მეორედ, ხმასაც ვერავინ მოგცემთ. ჯერ კიდევ პატივისცემით – ნელი ვარდიაშვილი” _ წერს ფეისბუქის საკუთარ გვერდზე ჟურნალისტი, ნელი ვარდიაშვილი.

დატოვეთ კომენტარი

კომენტარები

Загрузка...