– ბატონო ზაზა, თქვენ 24 სექტემბერს გამართულ პრეზენტაციაზე მხარი დაუჭირეთ დავით ასათიანის კანდიდატურას, რით არის განპირობებული თქვენი არჩევანი?

– მე 8 წელია ადვოკატთა კორპუსის თავმჯდომარე ვარ და ვიცნობ თვითოეულ მათგანს. თუმცა, წლების დაკვირვებამ და იმ წინააღმდეგობამ, რასაც ხელისუფლება გვიწევდა და გვიწევს წლებია, გამოკვეთა თუ ვინ იდგა, ადვოკატის უფლებების დაცვის სადარაჯოზე ქვეყნის შიგნით თუ გარეთ და ვინ იბრძოდა პროფესიის გაძლიერებისათვის. ჩემთვის ძალიან მნიშვნელოვანია გაგრძელდეს ადვოკატთა ასოციაციის სწორი განვითარება, ადვოკატის უფლებების დაცვა. ადვოკატის უფლებებისათვის ბრძოლაში ყოველთვის გვერდში მედგა ასოციაციის საერთაშორისო მდივანი დავით ასათიანი.

ამას გარდა, მისი დაუღალავი შრომის გამო საქართველოს ადვოკატთა ასოციაციამ არაერთი წარმატებული პრეცედენტი შექმნა. მე ვიცი, რამდენს აკეთებს ეს ადამიანი, ხშირად ისე, რომ ამას ვერავინ ვერ ხედავს და ამიტომ ვთხოვე კარგი იქნება თუ საზოგადოება გაიგებს და დაინახავს რისი გაკეთება შეგიძლია-მეთქი. ქართული ადვოკატურის ისტორიაში ოქროს ასოებით ჩაიწერება, რომ საქართველო მსოფლიოში მეხუთე ქვეყანა გახდა, სადაც ადვოკატებმა მიიღეს კონსტიტუციური გარანტიები. დარწმუნებით შემიძლია განვაცხადო, საკონსტიტუციო კომისიაში ადვოკატთა კორპუსის სახელით დავით ასათიანის ეს დამსახურება ფასდაუდებელი იქნება პროფესიის განვითარებაში სანამ იარსებებს საქართველოში ადვოკატის ინსტიტუტი.

ასევე, უპრეცედენტოა ის საერთაშორისო აღიარება, რომელსაც ადვოკატთა ასოციაციამ ამ წლების განმავლობაში მიიღო. დღეს ჩვენი ასოციაცია ევროპის ადვოკატთა ასოციაციის სრულუფლებიანი წევრია, რაც წარმოუდგენელი წარმატებაა და ამაში ფასდაუდებელი წვლილი მიუძღვის ამ ადამიანს. ჩვენ დღეს სამაგალითოები ვართ რეგიონში და მთელ აღმოსავლეთ ევროპაში.

დატოვეთ კომენტარი

კომენტარები

Загрузка...