რამდენიმე დღეა ქართულ მედიაში ქვეყნდება ინფორმაციები მცხეთაში განვითარებულ მოვლენებთან და მოსალოდნელ პოლიტიკურ სკანდალთან დაკავშირებით. როგორც ირკვევა, სკანდალი მოსალოდნელი არის მმართველ პარტიაში, რადგან, ჩვენს მიერ მოპოვებული ინფორმაციით, მაჟორიტარი დეპუტატობის ერთ-ერთი მსურველი, ნაციონალების ყოფილი თუ ახლაც მოქმედი მაღალჩინოსანი _ ცეზარ ჩოჩელი „ქართული ოცნების“ პოლიტსაბჭოს რამდენიმე წევრის მხარდაჭერით სარგებლობს და სწორედ მათგან გათამამებული აპირებს, კენჭის იყაროს მცხეთის მუნიციპალიტეტში. ოცნების წარმომადგენლები ამასთან დაკავშირებით ზოგადად აცხადებენ, რომ ისინი ყველა ბიზნესმენს ეხმარებიან, ანუ ყოფილ ნაციონალებთან ურთიერთობას ამით ხსნიან.

ასევე ვრცელდება ინფორმაცია, რომ თუ ჩოჩელი დამოუკიდებლად იყრიდა კენჭს არჩევნებში, მეორე ტურში ის დიმიტრი ხუნდაძის სასარგებლოდ მოხსნის თავის კანდიდატურას, რაც, როგორც შევიტყვეთ, დიდი ალბათობით არის ჭორი და იმ პიარ-სტრატეგიის ნაწილი, რომელსაც „ნაციონალები“ და ყოფილი გუბერნატორის გარემოცვა ავრცელებს. ასევე გავრცელებული ინფორმაციით, ცეზარ ჩოჩელი მხოლოდ მაშინ გახდებოდა დამოუკიდებელი მაჟორიტარი კანდიდატი, თუ ოცნება დიმიტრი ხუნდაძეს დაასახელებდა.

რა პოლიტიკური თამაში მიდის მცხეთაში? ადგილობრივების ინფორმაციით, `პატრიოტთა ალიანსის` კანდიდატი კონსტანტინე მორგოშია და ცეზარ ჩოჩელი რამდენიმეჯერ, გვიან ღამით შეხვდნენ ერთმანეთს. საინტერესოა, რა გარიგებას აქვს ადგილი და ცეზარ ჩოჩელმა ე.წ. `პოლიტიკური მანქანები` ხომ არ აამუშავა? როგორც ამბობენ, ჩოჩელი ასევე ავრცელებს ინფორმაციას, რომ დიმიტრი ხუნდაძეს დაბალი რეიტინგი აქვს, თუმცა ამ საქმეში ჩახედული ადამიანების აზრით, მისი ქმედება სულ სხვა რამეზე მიანიშნებს და ასეთ სტრატეგიასაც მხოლოდ ძლიერ მოწინააღმდეგეების არსებობის დროს იყენებენ.

მცხეთაში ორი კითხვა ჯერ კიდევ პასუხგაუცემელია: იყრის თუ არა კენჭს ცეზარ ჩოჩელი მაჟორიტარ კანდიდატად და შეესაბამება თუ არა სიმართლეს, როგორც ამბობენ, მის მიერ გავრცელებული ინფორმაცია „ქართული ოცნების“ ლობის შესახებ?

მოპოვებული ინფორმაციის გადამოწმების მიზნით, ცეზარ ჩოჩელის პრეს-სამსახურის უფროსს -ხათუნა მიქაცაძეს რამდენიმე კითხვით მივმართეთ:

 _ აპირებს თუ არა ცეზარ ჩოჩელი კენჭი იყაროს მცხეთის მაჟორიტარ დეპუტატად?

_ მე პირადად ამ ეტაპზე არანაირი ინფორმაცია არ მაქვს. თუ თავად რაიმეს გადაწყვეტს, ამას ოფიციალურად განაცხადებს.

 _ ანუ არ აპირებს?

_ კიდევ გიმეორებთ, ჩემთვის ამის შესახებ არაფერია ცნობილი.

_ მართალია თუ არა, რომ ბოლო პერიოდში ყოფილ გუბერნატორს საიდუმლო შეხვედრები აქვს სხვადასხვა პარტიის წარმომადგენლებთან?

_ ვერაფერს გეტყვით. ჩემთვის არაფერია ცნობილი.

  `ფოსტალიონი` მცხეთის მაჟორიტარობის კანდიდატს „პატრიოტთა ალიანსიდან“ _ კონსტანტინე მორგოშიასაც დაუკავშირდა:

 _ როგორ ფიქრობთ, რა შანსები აქვს `პატრიოტთა ალიანსს`მცხეთაში?

_ პატრიოტთა ალიანსს ძალიან დიდი შანსები აქვს. დიდი შანსი და რეიტინგი გვაქვს. მიუხედავად იმისა, რომ 8 ივნისს დაიწყო ოფიციალურად საარჩევნო მარათონი, ჩვენ მუშაობა დავიწყეთ 3 აპრილიდან.

 _ დიმიტრი ხუნდაძეს როგორ კონკურენტად თვლით?

_ რაც არ უნდა იყოს, იგი სამთავრობო კანდიდატურაა. აქ ცოტა არ იყოს განსხვავებული დილემებია, მთავრობას აწყობს რაღაც-რაღაცებიდან გამომდინარე მისი წარდგენა. მე დღეს  ცეზარ ჩოჩელს უფრო დიდ კონკურენტად აღვიქვამ, ვიდრე დიმიტრი ხუნდაძეს.

 _ ცეზარ ჩოჩელი დააყენებს თავის კანდიდატურას?

_ დაახლოებით ორ თვეზე მეტია რაც ჩემთვის ცნობილია, რომ სავარაუდოდ, ჩოჩელი დააყენებს თავის კანდიდატურას. ცეზარის ნაცვლად პასუხს მე ვერ გაგცემთ, თუმცა ვიმედოვნებ, დააყენებს.

 _ მოგწონთ ცეზარ ჩოჩელი? 

_ რას გულისხმობთ…

 _ ანუ პატივს სცემთ მას?

_ მას მე პატივს ვცემ როგორც მეწარმესა და ბიზნესმენს. თუმცა ცეზარის პოლიტიკური კუთხით აქტიურობა ჩემში კითხვის ნიშნებს ბადებს, თუმცა ეს მისი პირადი გადაწყვეტილებაა და ამაზე ვერაფერს გეტყვით.

 _ მართალია, რომ ცეზარ ჩოჩელმა თქვენთან შეხვედრის სურვილი გამოთქვა?

_ მასთან მეგობრობა მაკავშირებს და საკმაოდ ნორმალური ურთიერთობა გვაქვს. საქმიანი კაცია, ბიზნესმენია და ერთი მეორეს ხან სად ვხვდებოდით და ხან _ სად. საარჩევნო გარემოსთან დაკავშირებით მე და ცეზარს ერთამენთთან არ გვისაუბრია.

 ლიზა ყენია

წყარო postalioni.com

დატოვეთ კომენტარი

კომენტარები

Загрузка...