ხშირად გაიგონებთ ხოლმე ამგვარ ლანძღვას, – ”შე ახვაროო”, ”ნამდვილი საქონელი ხარ, ახვარიო”, ”შე ხვადაგო, ახვაროო”?

ეს ტერმინი ქურდულიცაა და ისეთს უწოდებენ, რომელსაც თავად ქურდები არ სცემენ პატივს, გამყიდველია, უსინდისო.

ზოგადად ახვარი ნიშნავს უდიერ, უტიფარ ადამიანს, რომელსაც ვერაფერს ანდობ, ვისაც საკუთარი თავის გარდა არაფერი ენაღვლება.

ეს დედის გინებას არაფრით ჩამოუვარდება. წესიერ კაცს რომ ”ახვარი” უწოდო, შეიძლება მოსაკლავად გაგიმეტოს.

ამ სიტყვას VIII საუკუნიდან იცნობს ქართული ენა, ოღონდ ცოტა სხვანაირად – ახვარი არაბული სიტყვაა და ”საქონელს”, ”პირუტყვს”

ნიშნავს. აშკარაა, ეს ტერმინი დამპყრობელმა არაბებმა შემოიტანეს ჩვენში და დამკვიდრდა კიდეც ისევე, როგორც არაერთი სხვა სიტყვა.

ახორი – საქონლის სადგომის სახელი ნამდვილად ახვარიდან მომდინარეობს.

სამეფო კარზე პირუტყვის (ფერმის) გამგებელს ამირახორი-ამილახორი-ამილახვარი ერქვა. ის საკმაოდ მაღალი სახელო (თანამდებობა) იყო.

”ვეფხისტყაოსანში” დამოწმებულია: ”ამილახორო, მოასხი რემა, ჯოგი და ცხენია”.

დროთა განმავლობაში ამილახვრობა თანამდებობიდან გვარად იქცა, კერძოდ, მას შემდეგ, რაც XVI საუკუნეში ქართლის მეფე გიორგი VIII-მ თავად იოთამ ზედგინიძის შთამომავალს მეფისადმი ერთგულების გამო ამილახვრობა უბოძა.

ახვარი – არაბული ტომია. ჩანს, საქართველოში მოლაშქრე არაბებს ამ ტომის შვილებიც ახლდნენ. ისინი რა ზნეობისანიც იყვნენ, ამის დასტურია დაპყრობილი ქვეყნის ენაში დარჩენილი ტერმინი.

ახვარები XVIII საუკუნეში გამოეყვნენ ნისაბის სასულთნოს. მერე ადენის დასავლურ პროტექტორატ ზემო ავლაყის სასულთნოში შედიოდნენ 1964 წლის ივნისამდე, ვიდრე სამხრეთ არაბეთის ფედერაციას შეუერთდებოდნენ. 1960-62 წლებში სამხრეთ არაბეთის შემადგენლობაში იყვნენ, 1990 წელს იემენში შევიდნენ. ახვარი სამხრეთ იემენის ქალაქიცაა.

KVIRISPALITRA.GE

დატოვეთ კომენტარი

კომენტარები

Загрузка...