ვენესუელის პრეზიდენტმა ნიკოლას მადურომ ნაციონალური კრიპტოვალუტის „პეტრო“ ემისიის დაწყების შესახებ განაცხადა.

„მე ვბრძანე 100 მილიონი ერთეული „პეტროს“ (ესპანური petroleo-დან – „ნავთობი“) ემისიის შესახებ, რომელიც ვენესუელის მთელი სიმდიდრითაა გამყარებული. თითოეული „პეტრო“ ვენესუელური ნავთობის ერთი ბარელის ღირებულების იქნება“, – განაცხადა მადურომ. „პეტროს“ დაბადების აქტს 14 იანვარს წარმოგიდგენთ“, – დასძენს ვენესუელის ლიდერი.

პრეზიდენტმა ნაციონალური კრიპტოვალუტის შექმნის შესახებ პირველად დეკემბრის დასაწყისში განაცხადა. მისი აზრით, ამ ტექნოლოგიის გამოყენება ქვეყანას ეკონომიკური ბლოკადის სიმძიმეს აარიდებს თავიდან. მისივე თქმით, ეროვნულ კრიპტოვალუტას ქვეყნის ნავთობის, ოქროსა და ბრილიანტის მარაგები დაუჭერს მხარს. ვენესუელის ფინანსთა მინისტრის მტკიცებით, „პეტრო“ აუცილებელია ფინანსური ტრანზაქციების წარმოებისა და დაფინანსების ახალი შესაძლებლობების მოსაძიებლად.

მანამდე ცნობილი გახდა, რომ სანქციებისგან თავის დასაღწევად რუსეთის პრეზიდენტმა ვლადიმერ პუტინმა „კრიპტორუბლის“ შემუშავების ბრძანება გასცა.

რუსეთის ხელისუფლების წარმომადგენლების თქმით, კრიპტოვალუტა ფინანსური ოპერაციების რუბლებში წარმოების საშუალებას იძლევა და, ამავე დროს, თავიდან აარიდებს ქვეყანას სანქციებს, რომლებიც ფინანსების მოზიდვის შესაძლებლობებს ზღუდავენ.

თუმცა, რუსეთი ჯერ კიდევ შორსაა კრიპტოვალუტის გამოშვებისგან, წერს Financial Times. გამოცემა აქვე აღნიშნავს, რომ მოსკოვის მიერ კრიპტოვალუტის გამოშვება შეერთებულ შტატებს რუსეთის ეკონომიკაზე გავლენის შესაძლებლობებს შეუმცირებს.

რუსეთის მიერ კრიპტოვალუტის შექმნის შესახებ განცხადება იმ დროს გაჟღერდა, როდესაც აშშ–ის მარეგულირებელი და კანონმდებლები ამ ტექნოლოგიის ათვისებაზე მუშაობენ.

სრული ვერსიის ნახვა pia.ge

დატოვეთ კომენტარი

კომენტარები

Загрузка...