„ჩვენი ზემდგომი ორგანოები ყველაფერს აკეთებენ იმისთვის, რომ აქედან წავიდეთ. დღესვე წავიდოდით და სხვა ქვეყნის სახელით ვიჭიდავებდით, უბრალოდ გულშემატკივრების გვრცხვენია.“ -ეს განცხადება საქართველოს ძიუდოისტთა ნაკრების კაპიტანმა ვარლამ ლიპარტელიანმა for.ge-სთან გააკეთა.

ქართველი ძიუდოისტი ზურაბ ზვიადაურის მიერ გაკეთებულ განცხადებას ადასტურებს და ამბობს, რომ სავარჯიშო დარბაზში გათბობის პრობლემაა. ლიპარტელიანი ძიუდოს ფედერაციის პრეზიდენტს ღიად უპირისპირდება და აღნიშნავს, რომ დავით ქევხიშვილს მათი პრობლემები არ აინტერესებს.

„დარბაზის გათბობის პრობლემა ერთი დღის წინ არ დაწყებულა, ორი კვირის განმავლობაში ანალოგიური პრობლემა იყო. ყოველ დღე იგივე პრობლემაზე ვსაუბრობთ, რეაგირება კი, არ ხდება. სიცივის გამო წინდებით, ქურთუკებითა და ქუდებით ვვარჯიშობდით. ფედერაციას ვეუბნებით, ეს პრობლემა მოგვიგვარონ, მათი მხრიდან რეაგირება კი ნულია. მოდიან, ვითომ რაღაცას აკეთებენ და სინამდვილეში არაფერს აკეთებენ. მათი დამოკიდებულებაა, გინდათ? – გინდათ, თუ არადა, რაც გინდათ ის ქენითო. იქნებ, ვინმემ ყურადღება მოგვაქციოს.

სიცივის გარდა პრობლემაა ის, რომ ბიჭები შეკრებაზე არ დატოვეს, რომლებსაც ჩვენთან ერთად უნდა ევარჯიშათ და რომლებიც მომზადებაში გვეხმარებიან. საუბარი ოთხ დღეზე იყო, მაგრამ თქვეს, ფინანსები არ არისო. ფედერაციას ამ პირობების მოგვარება ევალება, რომელმაც ინფორმაცია სპორტის სამინისტროს უნდა მიაწოდოს. ქვეყანას ავალდებულებთო და ვითომ, მათ ვაწუხებთ. ბიჭებს ისეთი განწყობა აქვთ, საშუალება რომ იყოს, დღესვე წავიდოდით და სხვა ქვეყნის სახელით ვიჭიდავებდით. უბრალოდ გულშემატკივრებს და იმ ხალხის გვრცხვენია, ვინც ჩვენ გვგულშემატკივრობს. ჩვენი ზემდგომი ორგანოები ყველაფერს აკეთებენ იმისთვის, რომ აქედან წავიდეთ.
ქევხიშვილი კაბინეტში ზის, იქედან არ გამოდის და როცა ჩვენთან დარბაზში შემოიხედავს, უკან გადის. ოთხ-ხუთ კაცს სიცხე აქვს, დარბაზში გაცივდნენ და ვეღარ ვარჯიშობენ. ჩვენთან რა შეხვედრა უნდა? – არ გველაპარაკება და როცა გველეპარაკება, გვუებნება, რაც გინდათ, ის ქენითო. პირადული ინტერესები იყო, დეტალებზე საუბარი არ მინდა, რადგან ეს ჩვენი სპორტის სირცხვილია და არ მინდა, ოჯახის რაიმე საკითხი გარეთ გავიდეს. ქევხიშვილმა თქვა, ყველაფერი იდეალურად არისო და ალბათ, მათთვის არის. აბა, მოვიდნენ და ჩვენ გვკითხონ! ადამ ოქრუაშვილი ერთი კვირაა ტატამზე ვერ შემოდის და ვერ ვარჯიშობს, რადგან ძალიან სცივა. ეს ადამიანი კი ისეთი კანდიდატია, რომელიც მედალს მოიპოვებს“. განაცხადა ვარლამ ლიპარტელიანმა for.ge-ის ჟურნალისტ თეონა მანაგაძისთვის მიცემულ ინტერვიუში.

 

წყარო: sazogadoeba.ge

დატოვეთ კომენტარი

კომენტარები

Загрузка...