ალეკო ელისაშვილი პარლამენტთან მივიდა. როგორც ის განმარტავს, ზაზა სარალიძის ნახვა სურდა, თუმცა ის ადგილზე არ დახვდა. ელისაშვილი ამბობს, რომ რუსთაველზე გამართულ პოლიტიკურ კონსულტაციებს ემიჯნება.

„არანაირი კონსულტაციისთვის არ მოვსულვარ. მე მოვედი, რომ მენახა ზაზა სარალიძე. სამწუხაროდ, ის არც კარავშია, ტელეფონიც გამორთული აქვს. მე მინდოდა მისი ნაციონალური მოძრაობის მძევლობიდან დახსნა. ნაციონალურმა მოძრაობამ ეს კაცი მძევლად აიყვანა. მის ტკივილს და ტრაგედიას აშკარად იყენებენ იმისთვის,რომ რაღაც რევოლუციები დაიწყოს. ეს არის დაუშვებელი უსინდისობა და მთლიანად გაიფანტება ის, – რაც იყო“ – თქვა ელისაშვილმა.

ალეკო ელისაშვილი მიმართავს ქართულ ოცნებას და მოუწოდებს, დღის ბოლომდე დაასახელოს პროკურორობის კანდიდატებად ან შალვა შავგულიძე ან ანა დოლიძე.

დღეს რუსთაველზე ოპოზიციური პარტიების აქცია 18:00 საათზეა დაგეგმილი. „ნაციონალური მოძრაობამ“ და სხვა ოპოზიციურმა პოლიტიკურმა პარტიებმა განაცხადეს, რომ ისინი გაერთიანებული ძალებით აპირებენ სისტემის წინააღმდეგ ბრძოლას და 18:00 საათზე საინფორმაცია აქცია დაანონსეს, სადაც მომავალ გეგმებზე ისაუბრებენ.

დღესვე, ვაკის პარკში აქცია „აღდგეს სამართლიანობა პოლიტიკოსების გარეშე“ გაიმართება. აქცია 15:00 საათზე არის დაგეგმილი და ის ხორავას ქუჩაზე მოკლული არასრულწლოვნების ლევან დადუნაშვილისა და დავით სარალიძის ოჯახების სოლიდარობის ნიშნად იმართება.

2017 წლის 1 დეკემბერს თბილისის ცენტრში, ვერაზე ორი არასრულწლოვანი დავით სარალიძე და ლევან დადუნაშვილი დაჭრეს. ერთი მოზარდი საავადმყოფოში მიყვანამდე გარდაიცვალა. მეორე – მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა.

31 მაისს ხორავას ქუჩაზე მოზარდების მკვლელობის საქმეზე მოსამართლემ განაჩენი გამოაცხადა. პროკურატურა განაჩენს სააპელაციოში გაასაჩივრებს.

31 მაისიდან ზაზა სარალიძე აქციებს მართავს. მიუხედავად იმისა, რომ აქციაზე რამდენიმე დღე აცხადებდნენ, რომ პროტესტს პოლიტიკური ელფერი არ ჰქონდა, დღეს 3 ივნისის, ხმამაღლა განაცხადეს, რომ აქცია პოლიტიკურია და სისტემის წინააღმდეგაა მიმართული.

დატოვეთ კომენტარი

კომენტარები

Загрузка...