ევროპის კოსმოსურმა სააგენტომ (ESA) და იაპონიის კოსმოსურმა სააგენტომ (JAXA) წარმოადგინეს ზონდი, რომელსაც ისინი 2018 წელს პლანეტა მერკურიზე გაგზავნიან. ხომალდის მთავარი მიზანი იქნება განსაზღვროს, თუ რატომ პატარავდება მზის სისტემის ისედაც ყველაზე პატარა პლანეტა დღითი დღე.

გარდა ამისა, ზონდ BepiColombo-ს კიდევ ერთი დავალება იქნება მოძებნოს წყლის ყინული მერკურის პოლუსებსა და მის ვულკანებში, რაც მრავალ ახალ ცნობას მოგვცემს პლანეტის შემადგენლობისა და ევოლუციის შესახებ.

„მერკური ყველაზე ნაკლებად შესწავლილი კლდოვანი პლანეტაა, მაგრამ არა იმიტომ, რომ იგი უინტერესოა, არამედ იმის გამო, რომ ეს საკმაოდ რთულია — ძნელია იქ მიღწევა და კიდევ უფრო რთულია იქ მუშაობა“, — ამბობს ESA-ს ხელმძღვანელი ალვარო ხიმენეს კანიეტე.

მერკური დედამიწიდან 77 მილიონი კილომეტრის მანძილზე მდებარეობს, თუმცა მეცნიერთათვის ეს იმდენად არაა პრობლემა, რამდენადაც პლანეტის ძალიან თხელი ატმოსფერო, რაც საკმაოდ გაართულებს მერკურის ზედაპირზე ზონდის შენელებას დაშვებისას.

მერკურის მისადგომებთან სვლის შენელების მიზნით, BepiColombo ორბიტაზე ცხრაჯერ შემოუვლის გარშემო დედამიწას, ორჯერ ვენერას, ექვსჯერ კი თავად მერკურის, რათა საკუთარი ენერგიის გარკვეული ნაწილი დახარჯოს.

იმ დროისათვის, დაახლოებით 2025 წელს, როდესაც ზონდი მერკურის ორბიტაზე გავა, მას უკვე იმდენი მანძილი ექნება გავლილი, რომ მზის სისტემას 18,5-ჯერ შემოუვლიდა გარშემო.

მას შემდეგ, რაც პლანეტაზე დაჯდება, BepiColombo-ს მოუწევს გადაურჩეს მერკურის ექსტრემალურ ტემპერატურას, რაც ღამით -170 °C-მდე ვარდება, დღისით კი +430 °C-ს აღწევს.

„ეს დაახლოებით იგივეა, კოსმოსური ხომალდი პიცის საცხობ ღუმელში ამუშაო“, — ამბობს BepiColombo-ს პროექტის მენეჯერი ულრიხ რაინინგჰაუსი.

ორბიტაზე გასვლის შემდეგ, კოსმოსური ხომალდი ორ სხვადასხვა ზონდად გაიყოფა, რომელთაგან ერთი ESA-ს საკუთრებაა, მეორე კი JAXA-სი.

ამის შემდეგ, უკვე შესაძლებელია ნამდვილი სამეცნიერო მუშაობის დაწყება. მერკურის წარსულში უკვე ესტუმრა ორი ზონდი: 1974 წელს მარინერ 10 და 2008 წელს Messenger-ი, რომელთაც ამ პლანეტის ამჟამად ჩვენს ხელთ არსებული საუკეთესო ფოტოები მოგვცეს.

მერკურის ზედაპირის კვლევის შედეგად ირკვევა, რომ პლანეტა ტექტონიკურად აქტიურია და დღემდე განაგრძობს შეკუმშვას, რადგან მისი ბირთვი ცივდება. მეცნიერებს აინტერესებთ, გაარკვიონ ამ პროცესის მიზეზი.

მათ ასევე სურთ იპოვონ კრატერთა და ვულკანთა ჩრდილებში დამალული წყლის ყინულის ნიშნები. თუკი BepiColombo ყინულის ქიმიურ ანალიზებს ჩაატარებს, შესაძლოა შევიტყოთ, თუ რატომ ჩამოყალიბდა მერკური მზესთან ყველაზე ახლოს.

მერკური იმ მხრივაცაა განსაკუთრებული, რომ ის ძალიან ღრმადაა მოთავსებული მზის გრავიტაციულ ველში. მეცნიერებს სურთ BepiColombo გამოიყენონ აინშტაინის ფარდობითობის თეორიის 100-ჯერ მეტი სიზუსტით გასატესტად, ვიდრე ამას დედამიწიდან ახერხებენ.

კიდევ ერთ საიდუმლოს წარმოადგენს ის ფაქტი, თუ რატომ აქვს მერკურის შედარებით დიდი რკინის ბირთვი და მასზე გადაკრული სილიციუმის ქანების თხელი ფენა. ჰიპოთეზა, რომლის მიხედვითაც გარე ფენების გარკვეული ნაწილი მზემ ამოჭამა ან ისინი სხვა პლანეტის შეჯახების შედეგად გაიფანტა — არ ემთხვევა Messenger-ის მიერ ჩატარებულ ზედაპირის სკანირების შედეგებს.

ESA-ს და JAXA-ს მკვლევრებს იმედი აქვთ, რომ უფრო ზუსტი ხელსაწყოების გამოყენებითა და მერკურისთან გაცილებით ახლოს მისვლით, ბოლოსდაბოლოს მიიღებენ პასუხს ზოგიერთ ამ კითხვაზე.

1tv.ge

დატოვეთ კომენტარი

კომენტარები

Загрузка...