სამების საკათედრო ტაძარში აფხაზეთიდან გადმოსვენებული 25 პირის სამოქალაქო პანაშვიდი მიმდინარეობს.

ტაძარში ელოდებიან პრემიერ-მინისტრ გიორგი კვირიკაშვილს, პარლამენტის თავმჯდომარეს ირაკლი კობახიძეს და სხვადასხვა პოლიტიკური პარტიის წარმომადგენლებს.

„დღეს მივაბარებთ მიწას 25 გმირს, რომელთა ცხოვრება და თავდადებაც სამშობლოსთვის არის მაგალითი საქართველოს თითოეული მოქალაქისთვის“, – ამის შესახებ ოკუპირებული ტერიტორიებიდან იძულებით გადაადგილებულ ლტოლვილთა და განსახლების მინისტრმა სოზარ სუბარმა განაცხადა.

მისი თქმით, სწორედ ამ ადამიანების მაგალითზე უნდა გაიზარდონ თაობები.

„ძალიან მნიშვნელოვანია ეს ამბავი, რადგან აქამდე მათი საფლავები არ იყო ცნობილი. ძალიან დიდი ძალისხმევა დაგვჭირდა მათი მოძიებისთვის და შემდგომ ნებართვის მისაღებად, რომ მათი გადმოსვენება და იდენტიფიცირება მომხდარიყო. დღეს შესაძლებლობა ექნებათ არა მხოლოდ ოჯახის წევრებს, არამედ მოქალაქეებს, რომ მივიდნენ და სანთელი დაანთონ ამ გმირების საფლავებზე. პროცესი, რომლის შემადგენელი ნაწილიც დღევანდელი დღე არის, არის ძალიან მნიშვნელოვანი, რადგან ბოლო 4-5 წლის განმავლობაში მართლაც სერიოზულად გაუმჯობესდა ურთიერთობები ამ მიმართულებით აფხაზურ მხარესთან. უკვე 126 ადამიანის იდენტიფიცირება და დაკრძალვა მოხდა და რამდენიმე ასეულის იდენტიფიცირების პროცესი ჯერ კიდევ მიმდინარეობს.  მხოლოდ წელს 46 სამარხი გაიხსნა. რაც მთავარია, პროცესი მომდევნო წლებშიც გაგრძელდება. ამაში აფხაზური მხარე და ჩვენ შეთანხმებულები ვართ, რომ მხოლოდ ჰუმანიტარულ საკითხს ვდებთ და ყველანაირ პოლიტიკურ განსხვავებებს განზე ვდებთ და სწორედ ამან მოგვცა შესაძლებლობა, რომ პროცესი დაძრულიყო”, – განაცხადა მინისტრმა.

აფხაზეთის ომის გმირებს გარდაცვალებიდან 24 წლის შემდეგ დიღმის ძმათა სასაფლაოზე სამხედრო პატივით დაკრძალავენ. დაკრძალვის ცერემონიას საქართველოს ოკუპირებული ტერიტორიებიდან იძულებით გადაადგილებულ ლტოლვილთა და განსახლების მინისტრი სოზარ სუბარი და თავდაცვის მინისტრი ლევან ოზორიაც დაესწრებიან.

დატოვეთ კომენტარი

კომენტარები

Загрузка...