დიდი ბრიტანეთის პარლამენტში სიტყვით გამოსვლისას დედოფლის ქუდსა და ევროკავშირის დროშის მსგავსებაზე სოციალურ ქსელებში დიდი გამოხმაურებაა. არის თუ არა ფერების მსგავსება დამთხვევა? დიდი ბრიტანეთის დედოფალმა ელიზაბეტ მეორემ ახლადარჩეული პარლამენტის პირველ სხდომაზე მომდევნო ორი წლის განმავლობაში მთავრობის გეგმებზე ისაუბრა. მთავარ პრიორიტეტად ევროკავშირიდან ბრიტანეთის გასვლის საკითხი დასახელდა და დედოფალმა რამდენიმე საკანონმდებლო ზომაზე ისაუბრა, რომელიც ქვეყანას ევროგაერთიანებიდან გასვლისთვის მოამზადებს.

 სოციალურ ქსელებში უფრო მეტად დედოფლის ქუდზე მსჯელობდნენ, ვიდრე მისი გამოსვლის შინაარსზე. დედოფლის სიტვით გამოსვლისას სოციალურ ქსელ Twitter-ზე პოპულარული გახდა პოსტები ბრიტანეთის დედოფლის ქუდზე გამოსახული ლურჯ და ყვითელ ყვავილებთან დაკავშირებით, ფერებზე, რომელიც ძალიან ჰგავს ევროკავშირის დროშას.

საღამოს მონაცემებით, ამ თემაზე “Twitter”-ში 80 ათასზე მეტი პოსტი დაიწერა. პოპულარულ თემას გამოეხმაურა ევროპის ლიბერალებისა და დემოკრატების ალიანსის პრეზიდენტიც.

“ნათელია, რომ ბრიტანეთში ევროკავშირით ზოგიერთი ადამიანი ჯერ კიდევ შთაგონებულია” – დაწერა გი ვერჰოფშტადტმა.

აღსანიშნავია, რომ 1974 წლის შემდეგ დედოფალი პარლამენტში პირველად გამოვიდა სიტყვით საზეიმო შესამოსელის, მანტიისა და გვირგვინის გარეშე. მიზეზად დროის უქონლობა დასახელდა. ტრადიციის თანახმად, პარლამენტის გახსნის ცერემონიაზე მონარქი ეტლით მიდის, ამჯერად კი დედოფალი ავტომობილით მივიდა. ასევე არ იყო ლორდთა პალატაში დედოფლის საზეიმო შესვლის ცერემონიაც. პარლამენტში ტრადიციული ტანსაცმლით მისვლის შემთხვევაში, ნაკლებად სავარაუდოა, რომ ვინმეს ყურადღება დედოფლის ჩაცმულობაზე გაემახვილებინა. სოციალურ ქსელებში ფერების დამთხვევის იდეას მომხმარებლების ნაწილი უარყოფდა, ნაწილი კი ეთანხმებოდა. ზოგიერთი მათგანი წერდა, რომ დედოფლის ჩაცმულობაში სიმბოლიზმის შესაძლო ნიშნები იკვეთებოდა და არ შეიძლებოდა დამთხვევა ყოფილიყო. თუმცა, სოციალურ ქსელებში ასევე წერდნენ, რომ ქუდის ლურჯ ფონზე ყვითელი ჩანართები იყო მონარქის გვირგვინის სიმბოლო, ლურჯი ფერი კი კონსერვატიული პარტიის სიმბოლოა.

დატოვეთ კომენტარი

კომენტარები