ქართული ოცნების დეპუტატის, ლევან გოგიჩაიშვილის მტკიცებით, საბჭოთა კავშირიდან მოყოლებული, დიდი ხანია საზოგადოებაში დომინირებს აზრი კონსტიტუციურ მონარქიაზე გადასვლასთან დაკავშირებით. მისი თქმით, ამ საკითხზე წინასაარჩევნო კამპანიის დროსაც იყო საუბარი. ამის შესახებ გოგიჩაიშვილმა ტვ პირველის ეთერში განაცხადა.

“ეს იდეა უწმინდესისგან არ ახალია. უწმინდესი ამ იდეასთან დაკავშირებით ხშირად საუბრობს ხოლმე და საზოგადოებაშიც არის დაწყებული დისკუსია. თვითონ იდეა იმისა, რომ უფრო მეტად იყოს გარანტირებული მშვიდობა, სუვერენიტეტი და სახელმწიფოებრიობა, ნებისმიერი საკითხი რომელიც ამას წაადგება არის საინტერესო და სამსჯელოდ გამოსატანი.”

გოგიჩაიშვილის განცხადებით, აღნიშნულ საკითხზე ოფიციალური მსჯელობა პარლამენტში ორ დღეში, ოთხშაბათს დაიწყება:

“ჩვენ როცა გვირჩევდა ამომრჩეველი არჩევნებზე მათ ჩვენ ამის ლეგიტიმაცია მოგვცეს და თავისი უფლება მოგვცეს იმისთვის, რომ საკონსტიტუციო უმრავლესობა შეგვექმნა. ჩვენ ხომ არ მიგვიტაცია საკონსტიტუციო უმრავლესობა. მათ დაუშვეს ის შესაძლებლობებიც, რომ რაღაცა საკითხებს ჩვენ გადავწყვეტდით.”

ილია მეორემ, გუშინ, 18 ივნისს ქადაგებაში საქართველოში მონარქიის აღდგენის საკითხზე ისაუბრა.

“საქართველო არის უძველესი ქვეყანა, უძველესი კულტურით. იქნებ გვეფიქრა იმაზე, თუ ვინ ვიყავით წარსულში, ვინ ვართ დღეს და ხვალ ვინ ვიქნებით. იქნებ გვეფიქრა იმაზე, რომ საქართველო არის უძველესი მონარქიული ქვეყანა. მას მეფე მართავდა და დღესაც ხშირი შემთხვევაა მსოფლიოში, როცა მონარქი მეფობს, მაგრამ არ მართავს. ამას ეწოდება კონსტიტუციური მონარქია და მას სიმშვიდე შემოაქვს ქვეყნაში. ეს, რა თქმა უნდა, დღეს და ხვალ ვერ მოხდება,” – თქვა ილია მეორემ.

on.ge

დატოვეთ კომენტარი

კომენტარები

Загрузка...