დეკანოზი გიორგი მამალაძე საკვებისა და მედიკამენტების მიღებაზე უარს აცხადებს. როგორც „ინტერპრესნიუსს“ დეკანოზის ადვოკატმა მიხეილ რამიშვილმა განუცხადა, ამის მიზეზი სატელეფონო კომუნიკაცია გახდა, რომლის ნორმალურად განხორციელების საშუალება, ადვოკატის მტკიცებით, მამა გიორგი მამალაძეს არ მისცეს.

„დღეს არის მისი შვილის დაბადების დღე და უნდოდა დარეკვა. ვითომ არეკინებდნენ, მაგრამ საუბარი ხარვეზების გამო ვერ შეძლო. მიმართა თანამშრომლებს, რაზეც მათ უთხრეს – ეტყობა ის ტელეფონი ვერ იჭერსო. ამის შემდეგ გადარეკა 4 სხვადასხვა ნომერზე და აბსოლუტურად იგივე განმეორდა, ისევ ხარვეზები იყო. ამაზე გამოთქვა პროტესტი და შეწყვიტა საკვებისა და მედიკამენტების მიღება. შემოიტანეს ოქმები, სადაც წერია, რომ უარს აცხადებს საკვებისა და მედიკამენტების მიღებაზე, თუმცა არ არის მითითებული საფუძველი. მოვთხოვე დოკუმენტის გასწორება და საფუძვლის დამატება, თუმცა წაიღეს ოქმები და კანცელარიაში გაატარეს თითქოს ხელი არ მოაწერა მამა გიორგიმ“, – განაცხადა მიხეილ რამიშვილმა.

მისივე თქმით, ამ ყველაფერზე განცხადება დაიწერა და სახალხო დამცველის წარმომადგენელმაც დააფიქსირა არსებული ვითარება. ადვოკატის თქმით, ციხის თანამშრომლები ყველა ხერხით ცდილობენ დეკანოზზე ფსიქოლოგიური ზეწოლის მოხდენას.

„ეს არის ფსიქოლოგიური ზეწოლა, როცა ბავშვის დაბადების დღეზე არ აძლევ ადამიანს საშუალებას დარეკვის. რომ კითხო, ყველაფერი გამართულად მუშაობს და რაღა მაინცდამაინც დღეს დაიბლოკა და დაიხშო ყველაფერი? ზოგადად მამა გიორგის პირობები ძალიან გაუსაძლისია. მას საკანში ელემენტარული პირობებიც არ აქვს. საშინელი სუნია კანალიზაციის, საკვებთან დაკავშირებით პრობლემებს უქმნიან და ა.შ.“, – განაცხადა მიხეილ რამიშვილმა.

მისივე თქმით, ვიდრე ვითარება არ გამოსწორდება, გიორგი მამალაძე საკვებისა და მედიკამენტების მიღებაზე უარს აცხადებს.

ipn.ge

დატოვეთ კომენტარი

კომენტარები

Загрузка...