საპარლამენტო უმრავლესობის წევრი ლევან გოგიჩაიშვილი აცხადებს, რომ მუნიციპალურ ტრანსპორტში უბილეთობაზე ჯარიმის 5-დან 20 ლარამდე გაზრდის ინიციატივას მმართველი გუნდი მხარს დაუჭერს, თუკი შესაბამისს დასაბუთებას მოისმენენ.

“თუ საკრებულოდან და თვითმმართველი ერთეულიდან შემოვა დასაბუთებული არგუმენტი, რისთვის არის ეს საჭირო და ხელს შეუწყობს თუ არა ეს სატრანსპორტო პოლიტიკის უფრო მეტ ადმინისტრირებას, მგზავრთა ნაკადის რეგულაციას, ადამიანების კომფორტს გააუმჯობესებს, რა თქმა უნდა, ამას მხარს დავუჭერთ. ხოლო თუ იქნება დაუსაბუთებელი არგუმენტები და ჩვენ ვერ დავინახავთ ამის საჭიროებას, რა თქმა უნდა, პარლამენტი ამას მხარს არ დაუჭერს”,- განაცხადა ლევან გოგიჩაიშვილმა და აღნიშნა, რომ თბილისში საჯარო ტრანსპორტის მოწესრიგება ძალიან მნიშვნელოვანია და არსებული ხარვეზები დასარეგულირებელია.

ამ საკითხზე კომენტარი გააკეთა თბილისის ახლადარჩეულმა მერმაც. კახა კალაძე მიიჩნევს, რომ უბილეთო მგზავრობისთვის ჯარიმის გაზრდა აუცილებელია.

მუნიციპალური ტრანსპორტით უბილეთო მგზავრობაზე ჯარიმა 5 ლარიდან 20 ლარამდე იზრდება. მგზავრი ვალდებულია მგზავრობის დასაწყისიდანვე შეიძინოს ბილეთი ან მგზავრობის ტარიფი ელექტრონული გადახდის საშუალებით გადაიხადოს.

ასეთი ცვლილება“ადმინისტრაციულ სამართალდარღვევათა კოდექსში“ შედის. ცვლილებები პარლამენტს გარემოს დაცვისა და ბუნებრივი რესურსების კომიტეტის სახელით წარედგინა. ამასთან, საურავის ოდენობა 50 ლარიდან 40-ლარამდე მცირდება.

წყარო:imedinews.ge

დატოვეთ კომენტარი

კომენტარები

Загрузка...