სახელმწიფო სათანადოდ მოემზადა წლევანდელი რთველისთვის და არც ერთი კილოგრამი ყურძენი არ დარჩება ჩაუბარებელი, – ამის შესახებ საქართველოს პრემიერ-მინისტრმა და პარტია „ქართული ოცნების“ თავმჯდომარემ, გიორგი კვირიკაშვილმა კახეთის რეგიონში განაცხადა, სადაც მერობის კანდიდატები წარადგინა.

მისი თქმით, კახეთში მხოლოდ მარტო მევენახეობის განვითარებით ქვეყანამ 500 მილიონ ლარამდე შემოსავალი მიიღო.

„ჩვენ დღეს კიდევ ერთხელ შევიკრიბეთ იმისათვის, რომ ერთმანეთს მხარში დავუდგეთ, რათა ჩვენი დაწყებული ყველა მნიშვნელოვანი საქმე გავაგრძელოთ და საბოლოო შედეგამდე მივიყვანოთ. საბოლოო შედეგი კი გახლავთ ის, რომ კახეთმა დაიბრუნოს თავისი სიდიადე და ჩვენი ქართველი კაცი დაუბრუნდეს თავის ფესვებს, სადაც ის ყველაზე ძლიერად გრძნობს თავს. სწორედ ამიტომ, ჩვენ, ადგილობრივი თვითმმართველობის არჩევნებში გვმართებს გაერთიანება, ერთად დგომა იმისათვის, რომ სწორი არჩევანი გავაკეთოთ.

გასული ხუთი წლის განმავლობაში ჩვენ ერთად გადავდგით ის ნაბიჯები, რომელმაც ჩვენი ქვეყანა სწორ გზაზე დააყენა.

ჩვენ მივხედეთ, პირველ რიგში, თითოეული ადამიანის ჯანმრთელობას, მივხედეთ სოფლის მეურნეობას, რომელიც სასიცოცხლოდ მნიშვნელოვანია ჩვენი ქვეყნისთვის. ქართველი კაცი დაუბრუნდა მევენახეობას, ჩვენ გადავარჩინეთ ვენახები გაჩეხვას და დღეს გვაქვს ვენახების გაშენების მზარდი ტენდენცია“, – განაცხადა გიორგი კვირიკაშვილმა.

მისი თქმით, ხელისუფლებამ სოფლის მეურნეობის განვითარების სწორი მოდელი აირჩია და ეს ეხება არა მარტო ​მევენახეობა-მეღვინეობას, არამედ – მეხილეობის განვითარებას. გარდა ამისა, პრემიერ-მინისტრის განცხადებით, წარმატებისთვის ასევე მნიშვნელოვანია ინფრასტრუქტურული პროექტები.

„სწორედ ამიტომ, ჩვენ ჯერ არნახული მასშტაბის ინფრასტრუქტურული პროექტები წამოვიწყეთ. კერძოდ, კახეთზე შემიძლია ვთქვა, რომ ჩვენ გვაქვს მართლაც დღემდე არნახული მასშტაბის  გზების, წყალმომარაგების სისტემების განვითარება და კიდევ ერთხელ ვამბობ, რომ ასეთი მასშტაბი ჩვენს ბიუჯეტში ჯერჯერობით არ ყოფილა.

მინდა, ჩამოვთვალო რამდენიმე ძალიან მნიშვნელოვანი პროექტი. ესენი გახლავთ – 15 კილომეტრიანი გურჯაანი-ბაკურციხის შემოვლითი გზა, რომლის დასრულებასაც მომავალი წლის ზაფხულში ვვარაუდობთ; გარდა ამისა, თბილისი-ბაკურციხის 87-კილომეტრიანი საავტომობილო გზის მოდერნიზება, რომელიც 2018 წლისთვის დაიწყება და ორ წელიწადში დამთავრდება;

ასევე – წნორი-ლაგოდეხის მონაკვეთის 40-კილომეტრიანი საავტომობილო გზის მოდერნიზება. 2018 წლიდან დაგეგმილია ბაკურციხე-წნორის 16-კილომეტრიანი გზის მშენებლობა, რომელიც 2020 წელს დასრულდება და ამას გარდა, 36-კილომეტრიანი გზა გურჯაანი-თელავის შემოვლითი მონაკვეთის, რომელიც 121 მილიონი დოლარი დაჯდება. მთლიანობაში ამ გზების ღირებულება მილიარდ ლარზე მეტია.

ნამდვილად შემიძლია ვთქვა, რომ კახეთს ექნება ჭეშმარიტად ევროპული სტანდარტების გზები და ამას დაემატება ასევე სრულიად ახალი გზა, რომლის დაგეგმარებაც დაწყებულია – ეს გახლავთ თელავისა და თუშეთის დამაკავშირებელი ახალ იგზის მონაკვეთი, რომელიც გაცილებით გააიოლებს თუშეთთან კავშირს.

ჩვენ შარშან უკვე გვქონდა ამის პრეცედენტი, როდესაც საზაფხულო გზა დაიკეტა, ყოველკვირეულად დავნიშნეთ ვერტმფრენის რეისი თუშეთის მიმართულებით, რამაც ძალიან მნიშვნელოვნად გააიოლა იქ მყოფი ადამიანების ყოფა და რა თქმა უნდა, ეს გაგრძელდება მომავალ ზამთარშიც.

გარდა ამისა, 2018 წლიდან დაიწყება და 2020 წლისთვის დამთავრდება თელავის წყალმომარაგების სისტემის სრული რეაბილიტაცია. ამის გარდა, ჩვენ გვაქვს ძალიან ძალიან მნიშვნელოვანი პროექტები, რომელიც ეხება საბავშვო ბაღების, სკოლების, საავადმყოფოების რეაბილიტაციას, რაც უმნიშვნელოვანესია ჩვენი მოსახლეობისთვის. ყველა რაიონში დაგეგმილია სპორტული კომპლექსების მშენებლობა და ჩვენ გვინდა, ამ მიმართულებით განსაკუთრებული ყურადღება დავუთმოთ ჩვენი მოსახლეობის ჯანმრთელი ცხოვრების წესს“, – განაცხადა გიორგი კვირიკაშვილმა.

გიორგი კვირიკაშვილმა კახეთის რეგიონში მერობის კანდიდატები წარადგინა. მერობის კანდიდატების წარდგენა თელავში  გაიმართა. 

1tv.ge

დატოვეთ კომენტარი

კომენტარები

Загрузка...