თქვენი დახმარების შედეგად საქართველო დღეს აღარ არის არც საბჭოური და არც პოსტსაბჭოური ქვეყანა, – ასე მიმართა საქართველოს პრემიერ-მინისტრმა გიორგი კვირიკაშვილმა ამერიკის შეერთბული შტატების ვიცე-პრეზიდენტ მაიკ პენსს, მთავრობის ადმინისტრაციაში შეხვედრის დასრულების შემდეგ გამართულ ერთობლივ პრესკონფერენციაზე.

”დღეს საქართველოში ვმასპინძლობთ არა მხოლოდ ჩვენი ქვეყნის ძირითად სტრატეგიული პარტნიორის, ამერიკის შეერთებული შტატების ვიცე-პრეზიდენტს, არამედ ამ მოკლე პერიოდში შეძენილ საქართველოს დიდ მეგობარს, ბატონ მაიკ პენსს და მოხარული ვართ, რომ იგი ჩამობრძანდა მეუღლესთან ერთად. მიუნხენში ჩვენი მოკლე გაცნობის შემდეგ, პატივი მქონდა ბატონი ვიცე-პრეზიდენტის მიწვევით გამემართა შეხვედრები ვაშინგტონში, დღეს კი თბილისში გავაგრძელეთ დიალოგი. ბატონო ვიცე-პრეზიდენტო, თქვენი სტუმრობა ხელისუფლებაში მოსვლიდან უმოკლეს პერიოდში ადასტურებს პრეზიდენტ ტრამპის და თქვენს დიდ სურვილს, გააღრმავოთ საქართველოსთან სტრატეგიული პარტნიორობა და მეგობრობა, რისთვისაც მე დიდ მადლობას გიხდით. წელს 25 წელი შესრულდა ჩვენი დიპლომატიური ურთიერთობის დამყარებიდან და ამ პერიოდის განმავლობაში ამერიკის როლი ჩვენი ქვეყნის დემოკრატიული და ეკონომიკური განვითარების, სუვერენიტეტის განმტკიცების და ნატო-ში გაწევრიანების გზაზე იყო და არის იყო მნიშვნელოვანესი. თქვენი დახმარების შედეგად საქართველო დღეს აღარ არის არც საბჭოური და არც პოსტსაბჭოური ქვეყანა. დღეს ჩვენ ევროკავშირთან ასოცირებული ევროპული დემოკრატია ვართ, ასევე ჩვენ ამაყად ვდგავართ ამერიკელებთან ერთად გლობალური უსაფრთხოების სადარაჯოზე და ჩვენი კონტრიბუცია შეგვაქვს რეგიონული სტაბილურობის პროცესში”, – განაცხადა გიორგი კვირიკაშვილმა.
პრემიერის თქმით, ქართველი ხალხი დიდად აფასებს ამერიკელი ხალხის გვერდით დგომას, მეგობრობას და მტკიცე მხარდაჭერას.
”დღეს ვისაუბრეთ ჩვენი სტრატეგიული პარტნიორობის კიდევ უფრო მეტ სიღრმეებზე. პირველ რიგში მინდა გამოვყო და მივესალმო ჩვენს თანამშრომლობას თავდაცვისა და უსაფრთხოების საკითხებში. თქვენი შეხვედრა ”ღირსეული პარტნიორის” წვრთნებში მონაწილე ქართველ და ამერიკელ ჯარისკაცებთან, ერთმნიშვნელოვნად ადასტურებს აშშ-ის მტკიცე მხარდაჭერას, როგორც საქართველოს სუვერენიტეტის განმტკიცების, ისე ჩვენი ქვეყნის ნატო-ში ინტეგრაციის მიმართ. ჩვენ წელს შევათანხმეთ ერთობლივი სამოქმედო გეგმა, რომელიც უზრუნველყოფს საქართველოს თავდაცვისუნარიანობის განმტკიცებას, რაც უმნიშვნელოვანესია ჩვენი ქვეყნისა და რეგიონის სტაბილურობისა და მდგრადობისთვის”, – აღნიშნა მთავრობის მეთაურმა.

ipn.ge

დატოვეთ კომენტარი

კომენტარები

Загрузка...